Ondjila yomwenyo noyeso
1 “Onde ku pe ngashingeyi ehogololo pokati keyambeko netulomutima. Uuna ayihe mbika tayi ku ningilwa noto kala mokati kiigwana, moka Omuwa Kalunga koye e ku halakanithila mo, nena oto ka dhimbulukwa ehogololo ndyoka nde li ku pe. 2 Ngele oto galukile kOmuwa, ngoye mwene noluvalo lwoye, e to vulika komwenyo gwoye aguhe kiipango mbika tandi yi ku pe nena, 3 Omuwa Kalunga koye ote ku sile ohenda. Ote ke ku kongolola mo miigwana, moka e ku halakanithila mo, note ke ku ninga omunelago ishewe. 4 Nonando u halakanene kooha dhuuyuni, Omuwa Kalunga koye ote ke ku gongela e te ku galula ko, 5 opo u ka likole ishewe evi ndyoka lya kalwa koohokulu. Ote ke ku ninga omunelagolela noku ku indjipaleka u vule oohokulu. 6 Omuwa Kalunga koye ote ke ku pa, ngoye noluvalo lwoye, omutima omuvuliki e to kala u mu hole komutima gwoye aguhe, noto kala ihe mevi ndyoka. 7 Omatulomutima agehe ngaka ote ga tula maatondi yoye, mboka ye ku tonde nohaa ku hepeke, 8 ongoye noto ka vulika kuye e to dhiginine iipango ayihe mbika tandi yi ku pe nena. 9 Omuwa ote ke ku yambekela ayihe to yi ningi, noto kala u na oluvalo olwindji, iimuna oyindji neloolo lyiilya. Ota ka nyanyukilwa oku ku ninga omunelago, ngaashi a ningile oohokulu aanelago, 10 ihe ngoye ou na okuvulika kuye e to dhiginine iipango nomautho ge ga nyolelwa membo ndika lyompango. Ou na okugalukila kuye komutima gwoye aguhe nokomwenyo gwoye aguhe.
11 “Oshipango shika tandi shi ku pe nena ndjika, kashi shi oshidhigu unene nenge shi li kokule nangoye. 12 Kashi li pombanda megulu, u pule ando u tye: ‘Olye ta londo e ke shi tu talele ko, opo tu shi uve tse tu vulike kusho?’ 13 Kashi li handiyaka yefuta, u pule ando u tye: ‘Olye ta taaguluka a ye handiyaka yefuta e ke shi tu talele ko?’ 14 Aawe, oshi li mpaka pungoye. Ou shi shi noto vulu oku shi tumbula nokuvulika kusho.
15 “Nena otandi ku pe, u hogolole pokati kuuwananwa nuuwinayi, pokati komwenyo neso. 16 Ngele oto vulika kiipango, omautho noompango dhOmuwa Kalunga koye ndhoka tandi dhi ku pe nena, ngele ou mu hole, to vulika kuye e to dhiginine oompango dhe adhihe, nena oto ka ninga omunelago e to ningi oshigwana oshinene. Omuwa Kalunga koye ote ke ku yambeka mevi ndyoka to ke li lala. 17 Ihe ngele oto tangalala e to tindi okupulakena e to falafalwa kelongelo lyiikalunga, 18 oto ka hanagulwa po — otandi ku londodha shili mpaka. Ito kala mo olule mevi ndyoka lyahandiyaka yaJordan ndyoka to ke li lala. 19 Nena otandi ku pe, u hogolole pokati komwenyo neso, pokati keyambeko lyaKalunga netulomutima lye, notandi hiya egulu nevi li ninge onzapo yehogololo ndyoka to hogolola. Hogolola omwenyo. 20 Hola Omuwa Kalunga koye, vulika kuye nou mu dhame, nena ngoye mwene noluvalo lwoye otamu ka kala olule mevi ndyoka u uvaneke te li pe oohokulu Abraham, Isak naJakob.”
© Oshindonga Bible © Bible Society of Namibia, 2008.
