Eyambeko lyoonakuvulika
(Lev. 16:3-13Deut. 7:12-24)1 “Ngele oto vulika kOmuwa Kalunga koye e to dhiginine shili iipango ye ayihe mbyoka tandi yi ku pe nena, ote ke ku nenepeka u vule iigwana ayihe kombanda yevi. 2 Vulika ano kOmuwa Kalunga koye, nomayambeko ngaka agehe otaga ka ninga goye.
3 “Omuwa ota yambeke omikunda dhoye nomapya goye.
4 “Omuwa ote ku yambekele oluvalo lwoye, eloolo lyiimeno yoye niimuna yoye oongombe noonzi.
5 “Omuwa ota yambeke iilya yoye niikulya ya za muyo.
6 “Omuwa ota yambeke ashihe to shi ningi.
7 “Omuwa ota ka dhenga aatondi yoye, uuna taye ku ponokele. Nge taye ya, otaa ziilile kombinga yimwe, ihe otaa ka halakana noondjila heyali taa yi ontuku.
8 “Omuwa Kalunga koye ota ka yambeka iilonga yoye nota ka udhitha iigandhi yoye iilya. Ote ku yambeke mevi ndyoka te li ku pe.
9 “Ngele oto vulika kOmuwa Kalunga koye e to gwanitha ayihe mbyoka a popi, ote ku ningi oshigwana she mwene, ngaashi u uvaneke. 10 Nena iigwana ayihe kombanda yevi otayi ka mona kutya Omuwa okwe ku hogolola u ninge oshigwana she mwene, oyo notayi ku tila. 11 Omuwa ote ke ku pa oluvalo olwindji, iimuna oyindji neloolo lyiilya mevi ndyoka e li uvanekele oohokulu te li ku pe. 12 Ota ka lokitha omvula pethimbo lyo opala tayi zi mompungulo ye yeloolo megulu nokuyambeka iilonga yoye ayihe; oto ka lilwa oongunga kiigwana oyindji, ihe ngoye ito pumbwa okuhehela nando okushimwe shayo. 13 Omuwa Kalunga koye ote ke ku ninga omuwiliki mokati kiigwana, hamulandulishinkoti; oto ka kala aluhe u na elago noito shunduka, ngele to vulika shili kiipango mbyoka ayihe tandi yi ku pe nena ndjika. 14 Ihe ino gamuka ko kuyo, u uke kolulyo nenge kolumoho nenge u simaneke nokulongela iikalunga.”
Egeelo lyaatangalali
(Lev. 26:14-46)15 “Ihe ngele ito vulika kOmuwa Kalunga koye noito dhiginine shili omautho niipango ye ayihe mbyoka tandi yi ku pe nena, etulomutima alihe ndika otali ku adha e tali ku thingi:
16 “Omuwa ota ka tula omutima iilando yoye nomalundu goye.
17 “Omuwa ota ka tula omutima iilya yoye niikulya ya za muyo.
18 “Omuwa ote ke ku tula omutima gwoluvalo lwa pumba, gwiilya ya theta noongombe noonzi dhimwedhimwe adhike.
19 “Omuwa ota ka tula omutima ashihe to shi ningi.
20 “Ngele oto ningi nayi nokutinda Omuwa, ote ku undulile omupya, evundakano nomalwa mwaayihe to yi ningi, sigo wa yonuka po thiluthilu. 21 Ote ku tumine omalega, sigo wa pu mo naanaa moshilongo shoka to ka lala. 22 Omuwa ote ku umbu uuvu wepunga, olwiidhi nomuthithilalo; ote ku tumine omutenya gwetokopya noluteni nokukukutika po iimeno yoye. Omupya nguka otagu ku hepeke, sigo wa si. 23 Omvula itayi ka loka we, nevi lyoye otali ka kalanda lya fa emanya. 24 Peha lyomvula Omuwa ote ke ku tumina ontsi nomutoko, sigo wa hanagulwa po.
25 “Omuwa ote ku sinditha kaatondi yoye. Oto ya homona to ziilile kombinga yimwe, ihe oto ke ya ya ontuku wa lamba oondjila heyali, naantu ayehe kombanda yevi otaa ka tila, ngele taa mono mbika tayi ku ningilwa. 26 Uuna tamu ka sa, oondhila niithitukuti otayi ka lya po omidhimba dheni, nokape na ngoka te yi halutha. 27 Omuwa ote ke ku tumina iitumbuka, ngaashi a ningile Aayegipiti. Olutu lwoye ote ke lu tutitha iilalo. Oto ka kakata iitumbuka nomaankadhi e to ka kala to nyu, ihe itaku ka kala omuti gwasha. 28 Omuwa ote ku umbu uuvu woonkwengu e te ku umbile uuposi nepiyagano. 29 Oto ka pampadhala moshanga shomutenya wa fa omuposi, noito vulu okumona ondjila yoye. Ito ka kala u na elago mwaayihe to yi ningi. Oto ka thindilwa pevi aluhe nokuyugwa, nopwaa na ngoka te ku kwatha.
30 “Oto ka yaleka omukadhona — ihe gulwe te ke mu hokana po. Oto ka tunga ongulu — ihe ito ka kala mo nando. Oto ka tsika omiviinu — ihe ito li omandjembele gadho. 31 Oongombe dhoye otadhi ka tselelwa montaneho yoye, ihe onyama yadho ito ke yi lya. Uusino woye otau ka kookololwa po, manga we u tala, noitau ke ku galulilwa we. Oonzi dhoye otadhi ka pewa po aatondi yoye, nokape na ngoka te ke ku kwatha. 32 Aamwoye aamati naakadhona otaa ka gandjwa po kaakwiilongo, ya ninge aapika, manga we shi tala. Esiku kehe oto ka nzana mo omeho goye to ligamene, pamwe aamwoye otaa galuka, ihe osima yowala. 33 Oshigwana oshikwiilongo otashi ka kutha po iimeno yoye ayihe mbyoka wi ihepekele oku yi kokitha, manga to kala po owala, kakele kedhiginino lyomahepeko nonyanya. 34 Omahepeko goye otaga piyaganeke omutse gwoye. 35 Omuwa ote ku umbu iitumbuka okuza komutse sigo okoshithi shompadhi.
36 “Omuwa ote ke ku kutha po ngoye nomukwaniilwa gwoye e te mu fala kevi lyaakwiilongo, nkoka ngoye mwene nenge oohokulu inaamu kala ko nale; nkoka oto ka longela iikalunga ya hongwa miiti nomomamanya. 37 Miilongo mbyoka Omuwa te ke ku halakanithila mo, aantu otaa ka haluthwa kwaashoka she ku ningilwa: otaye ke ku nyekelela noku ku sheka.
38 “Oto ka kuna ombuto oyindji, ihe oto ka teya oshishonashona, oshoka oombahu otadhi ka lya po iimeno yoye. 39 Oto ka tsika iitsambe yomiviinu e to yi helele, ihe ito ka likola omandjembele nenge u nwe omaviinu gayo, oshoka omazinyo otaga ka lya po oomviinu. 40 Omiolivi otadhi ka mena shaa mpoka mevi lyeni, ihe ito ka kala nando u na omagadhi gooholivi, oshoka ooholivi otadhi ka yagumuka ko. 41 Oto ka kala u na aamati naakadhona, ihe oto ke ya kanitha, oshoka otaa ka kwatwa po oonkwatwa miita. 42 Omiti dhoye adhihe niilikolwa yevi lyoye otayi ka lika po kuupuka.
43 “Aakwiilongo mboka ya kala mevi lyoye, otaye ke ku gwililila po ye ku vule, ngoye noto ka kanitha oonkondo. 44 Otaa ka kala ye na iimaliwa ye ku pe oongunga, ihe ngoye ito ka kala u na sha u ya pe oongunga. Pehulilo otaa ka ninga aapangeli yoye.
45 “Omathingano ngaka agehe otage ku adha, e taga kala ge ku na, sigo wa hanagulwa po thiluthilu, oshoka ino vulika kOmuwa Kalunga koye nokudhiginina omautho niipango ayihe e yi ku pe. 46 Omathingano ngoka otaga ka ninga endhindhiliko sigo aluhe kutya ngoye noluvalo lwoye omwa pangulwa kuKalunga. 47 Omuwa okwe ku yambeke pamikalo adhihe, ihe ino mu longela nenyanyu nonomwenyo gwa tundulukwa. 48 Onkee ano oto ka longela aatondi mboka Omuwa te ku tumine, ye ku kondjithe. Oto ka kala wa sa ondjala nenota nou li omudhuu — u li moluhepo lwiinima ayihe. Omuwa ote ke ku hepeka nayi, sigo wa hanagulwa po thiluthilu. 49 Omuwa ote ke ku tukulila oshigwana tashi zi kokule kooha dhevi, shi ye shi ku kondjithe, oshigwana shoka elaka lyasho kuu li shi. Otashi ke ku fegula po sha fa ekodhi. 50 Otaa ka kala aananyanya, itaa ningile mo molwaakulupe noitaa si ohenda aagundjuka. 51 Otaa ka lya po oongombe dhoye niilikolwa yomevi lyoye, nangoye oto ka sa po kondjala. Itaye ku thigile po nando omuma yimwe yiilya, eta lyomaviinu, uugadhi wooholivi, ongombe nenge onzi; nangoye oto ka sa po. 52 Otaa ka ponokela oshilando kehe moshilongo shoka Omuwa Kalunga koye te shi ku pe sigo omadhingililokuma omaleeleka ngoka wi itula, otaga ka kumunwa po.
53 “Uuna aatondi yoye taa kondeke iilando yoye, oto ka pumbwa iikulya, oto kala muuwehame nomeiyekelelo, sigo to li po aamwoye, onyama aamwoye aamati naakadhona mboka Omuwa Kalunga koye e ku pe. 54 Nokuli omulumentu omvalekele nomulelwa ondembula ke na ohenda namumwayina, omukadhi omuholike nenge oyana mboka ya hupu ko; 55 ite ya pe nando okantumba konyama yoyana ndjoka ye mwene ta li muuwehame nomeiyekelelo molwompumbwe yiikulya, sho u li wa kondekwa kaatondi. 56 Omukiintu omvalekele nomulelwa ondembula, ngoka moluuyamba inee enda kolupadhi nando olumwe, ke na ohenda nomulume omuholike nenge omwana omumati nomukadhona. 57 Ite ya pe okahanona e ka vala, nontungwa yako tayi zi moshivalelo she, oshoka muuwehame nomeiyekelelo omolwompumbwe yiikulya ye mwene ote yi li po meholamo, sho u li wa kondekwa kaatondi.
58 “Ngele ito dhiginine shili oompango ndhika adhihe nomalongo ga nyolwa membo ndika, nongele ito simaneke edhina lyOmuwa Kalunga koye ekumithi netilithi, 59 ote ku tumine ngoye noluvalo lwoye omauwehame gaa shi kupangwa, omalega omatilithi nomikithi omiwinayi dhomambwengelela. 60 Ote ku undulile ishewe omikithi omitilithi ndhoka we dhi mwene muEgipiti noito ka hwepopala we. 61 Ote ke ku undulila omavu nomalega ngeyaka gi ili nogi ili inaaga tumbulwa membo ndika lyoompango nomalongo gaKalunga, ongoye noto ka hanagulwa po. 62 Nonando u indjipale u thike poonyothi dhokegulu, yamweyamwe yomune ayeke taa ka hupa ko, oshoka ino vulika kOmuwa Kalunga koye. 63 Omuwa ngaashi a li a nyanyukilwa elago lyoye nokwiindjipala kwoye, osho wo ta ka nyanyukilwa moku ku yona po noku ku hanagula po. Oto ka nakulwa mo mevi ndyoka to ke li lala.
64 “Omuwa ote ke ku halakanithila mokati kiigwana ayihe okuza kooha dhevi sigo okoonkwawo, naankoka oto ka longela iikalunga ya hongwa miiti nomomamanya, iikalunga mbyoka ngoye mwene nenge oohokulu inaaye yi longela nale. 65 Ito ka mona ombili akuhe, kape na ehala to ka tya olyoye. Omuwa ote ke ku tula uumbanda, etyololoko neziyalalo. 66 Okukala kwoye aluhe otaku kala moshiponga. Uusiku nomutenya oto ka kala nomwenyo tagu nuka mo noto ka kala muumbanda weso wa pitilila. 67 Ongula oto ka tya: ‘Ando okwa li ongulohi,’ nongulohi oto ka tya: ‘Ando okwa li ongula.’ Osho u li u na ehaluko lya tya ngeyi momutima nomahaluhalu ga tya ngeyi momeho goye. 68 Omuwa ote ke ku shunithila kuEgipiti mooskepa, nando ye mwene a tile: ‘Ito ka shuna we kuEgipiti.’ Oko hoka to ki ilanditha po kaatondi yoye u ninge omupika, ihe kaku na ngoka ta hala oku ku landa po.”
© Oshindonga Bible © Bible Society of Namibia, 2008.
