Oompango dhaKalunga dha nyolelwa momamanya
1 Moses naawiliki yaIsrael oya lombwele aantu ya ti: “Dhiginineni iipango ayihe tandi yi mu lombwele nena ndjika. 2 Uuna tamu ka tokola Jordan, mu ye mevi ndyoka Omuwa Kalunga keni te li mu pe, omu na okudhika omamanya omanene e tamu ga gwayeke nokaalaka. 3 Nyoleleni kugo oompango ndhika adhihe nomalongo. Uuna mwa thiki kevi ndyoka lya tondoka omahini nomagadhi goonyushi, Omuwa Kalunga koohokulu e li mu uvanekele, 4 nomwa yi handiyaka yaJordan, dhikeni omamanya ngaka kondundu Ebal, ngaashi tandi mu lombwele nena ndjika, ne mu ga gwayeke nokaalaka. 5 Tungilii ko oshiyambelo shomamanya inaaga gumithwa osheela, 6 molwashoka oshiyambelo kehe tamu tungile Omuwa Kalunga keni, oshi na okutungwa nomamanya inaaga hongwa. Oko nkoka tamu yambele Omuwa Kalunga keni omafikilondjambo, 7 noko nkoka tamu yambele ko nokulya omakwatathanondjambo e tamu nyanyukilwa koshipala shOmuwa Kalunga keni. 8 Komamanya ngoka ga gwayekwa nokaalaka, otamu nyolele ko iitya ayihe ya tonata nawa yoompango dhaKalunga.”
9 Moses pamwe naayambi Aalevi oya lombwele ihe Aaisraeli ayehe ya ti: “Aaisraeli ne, mweneni ne mu pulakene ndje. Onena tuu ndjika mwa ningi oshigwana shOmuwa Kalunga keni. 10 Vulikeni ano kuye ne mu dhiginine oompango dhe adhihe tandi dhi mu pe nena ndjika.”
Etulomutima kaatangalali
11 Moses okwa lombwele Aaisraeli e ta ti: 12 “Shampa mwa tokola Jordan, omazimo ngoka ge na okuthikama kondundu Garizim, uuna omayambeko taga tumbulilwa aantu, ogo: Simeon, Levi, Juda, Issaskar, Josef naBenjamin. 13 Omazimo taga thikama kondundu Ebal, uuna etulomutima tali tumbulwa, ogo: Ruben, Gad, Aser, Sebulon, Dan naNaftali. 14 Aalevi otaa ka popya oohapu ndhika mokule taa ti:
15 “ ‘Kalunga na tule omutima kehe ngoka ta hongo oshimenka shemanya, shoshiti nenge shosheela note shi saagele meholamo; Omuwa oha tondo iimenka.’
“Aantu ayehe naa yamukule taa ti: ‘Amen!’
16 “ ‘Kalunga na tule omutima shaa ngoka ta dhini he nenge yina.’
“Aantu ayehe naa yamukule taa ti: ‘Amen!’
17 “ ‘Kalunga na tule omutima shaa ngoka ta lundulula ongamba yamukwawo.’
“Naantu ayehe naa yamukule taa ti: ‘Amen!’
18 “ ‘Kalunga na tule omutima shaa ngoka ta pukitha omuposi.’
“Naantu ayehe naa yamukule taa ti: ‘Amen!’
19 “ ‘Kalunga na tule omutima shaa ngoka ta goyokitha uuyuuki waakwiilongo, woothigwa nowaaselekadhi.’
“Naantu ayehe naa yamukule taa ti: ‘Amen!’
20 “ ‘Kalunga na tule omutima shaa ngoka ta lala nomukulukadhi gwahe, oshoka okwa sitha he ohoni.’
“Naantu ayehe naa yamukule taa ti: ‘Amen!’
21 “ ‘Kalunga na tule omutima shaa ngoka ta lala noshimuna.’
“Naantu ayehe naa yamukule taa ti: ‘Amen!’
22 “ ‘Kalunga na tule omutima shaa ngoka ta lala nomumwayina nenge nomumwahe.’
“Naantu ayehe naa yamukule taa ti: ‘Amen!’
23 “ ‘Kalunga na tule omutima shaa ngoka ta lala nayinamweno.’
“Naantu ayehe naa yamukule taa ti: ‘Amen!’
24 “ ‘Kalunga na tule omutima shaa ngoka ta dhipaga meholamo.’
“Naantu ayehe naa yamukule taa ti: ‘Amen!’
25 “ ‘Kalunga na tule omutima shaa ngoka ta taamba ombumbo, opo a dhipage omukeenandjo.’
“Naantu ayehe naa yamukule taa ti: ‘Amen!’
26 “ ‘Kalunga na tule omutima shaa ngoka itaa vulika koompango nomalongo gaKalunga agehe ngaka.’
“Naantu ayehe naa yamukule taa ti: ‘Amen!’ ”
© Oshindonga Bible © Bible Society of Namibia, 2008.
