1 “Ngele to mono ongombe nenge onzi yamukweni ya kana, yi galula e to yi shuna kumwene. 2 Mwene ngele oku li kokule nenge ku mu shi, nena yi fala kaandjeni. Uuna mwene gwayo te yi kongo, yi mu pa. 3 Osho wo ninga, ngele owa mono okasino, oonguwo nenge shaa shoka shilwe mukweni a kanitha.”
4 “Ngele okasino nenge ongombe yamukweni ya gundila mondjila, ino mu holama. Mu kwatha mu yi tumbe po, yi thikame ishewe.”
5 “Aakiintu inaa zala omizalo dhoshilumentu, naalumentu inaa zala omizalo dhoshikiintu; Omuwa Kalunga koye oha tondo aantu haa ningi iinima ya tya ngaaka.
6 “Ngele ou li mondjila e to itsu oshihandhila momuti, nenge pevi pu na omvugo nondhila yu utumanena uunimona nenge omayi, ino kutha po yina nuunimona wayo. 7 Oto vulu okukutha po uudhilona, ihe yina yi etha yi ye, opo ngoye u kale nelago nonomwenyo omule.”
8 “Ngele to tungu ongulu ompe, kontala yayo tungila ko omushigo, opo waa etele egumbo lyoye ondjo yombinzi, ngele gulwe ta gu ko e ta si.”
9 “Moshitsambe shoye shomiviinu ino kuna mo oombuto dhomaludhi gaali. Ngele oto shi ningi, owa keelelwa okulongitha omaludhi agehe gaali, omandjembele noshilikolwa shoka shilwe.”
10 “Ino kutila onani nokasino kondjoko yimwe mepululo.”
11 “Ino zala onguwo ya tungwa momafufu goonzi noliina mumwe.”
12 “Itungila oondjendjelela dhi endjelele koonkotso ne dhomuzalo gwoye.”
Oompango dhuuyogoki
13 “Ngele oku na omulumentu ta hokana omukiintu e ta lala naye, ndele te mu kunyukwa 14 te mu lundile nokutaandelitha oohapu oombwinayi ta ti: ‘Onda hokana omukiintu nguka, ihe sho nda yi kuye, ine mona uukadhona we,’ 15 nena he nayina naa kuthe endhindhiliko lyuukadhona we e taye li fala koompangu kaawiliki yoshilando. 16 He yomukadhona ota ti kuyo: ‘Onda gandja omumwandjekadhona komulumentu nguka a ninge omukadhi, ihe okwe mu tondo. 17 Okwe mu lundile oohapu dhiifundja ta ti, ka li omukadhona, sho e mu hokana, ihe mpaka ope na endhindhiliko tali holola kutya omumwandjekadhona okwa li shili omukadhonalela.’ Oyo notaa yala onguwo komeho gaawiliki. 18 Nena aawiliki yoshilando naa kuthe omuntu ngoka e taye mu dhenge. 19 Naye mu futithe iimaliwa iisiliveli ethele, niimaliwa mbika otaye yi pe he yomukadhona, oshoka omuntu ngoka okwe etele omukadhona Omuisraeli ohoni. Ota ningi omukadhi sigo aluhe, noita vulu oku mu henga po omasiku ge agehe, manga e na omwenyo.
20 “Ihe ngele omufuko oku na uusama, noinapu monika endhindhiliko kutya oye omukadhonalela, 21 na falwe keelo lyaandjahe, nkoka aalumentu yomoshilando taye mu dhipagele nomamanya. Okwa ningi esithahoni muIsrael, sho a hondelelwa maandjahe. Pahedhi ndjika oto dhimi po uuwinayi wa tya ngaaka.
22 “Ngele oku na omulumentu ta kwatwa moluhondelo a lala nomukiintu gwamukwawo, ayehe yaali naa dhipagwe. Osho ngeyi to kombo mo uuwinayi muIsrael.
23 “Ngele oku na omukiintu a yalekwa kumwene, nomuntu gulwe te mu tsakaneke moshilando e ta lala naye, 24 nena ayehe yaali ya faleni keelo lyoshilando e tamu ya dhipaga nomamanya. Omukiintu na dhipagwe, oshoka okwa li e na okukuga onkugo moshilando, nomulumentu, oshoka okwa lala nomuyalekwa gwamukwawo. Osho ngeyi to kombo po uuwinayi mokati keni.
25 “Ngele oku na omulumentu ta adha omukadhona a yalekwa e li melundu, e te mu kwata nokulala naye, omulumentu ngoka a lala naye, oye awike na se. 26 Ihe omukadhona ina ningwa sha, ke na ondjo yokusa. Shika osha fa owala omuntu a ponokelwa kumukwawo e te mu dhipaga. 27 Omulumentu okwe mu tsakaneke melundu, omukadhona omuyalekwa okwa kugu, ihe kakwa li ngoka a tondoka onkugo ye.
28 “Ngele oku na omulumentu ta adha omukadhona ngoka inaa yalekwa, e te mu kwata nokulala naye e taa adhikilila, 29 nena omulumentu ngoka a lala naye oku na okufuta he yomukadhona iimaliwa iisiliveli omilongo ntano noku na oku mu hokana po, oshoka okwe mu kwata koonkondo. Na kale itee mu henge po sigo aluhe.
30 “Hamulumentu ta hokana omukiintu gwahe, opo kaa sithe he ohoni.”
© Oshindonga Bible © Bible Society of Namibia, 2008.
