1 Ohugunina otwa shuna e tatu yi mombuga twa lambalala ondjila yokEkololo lyaAkaba, ngaashi Omuwa a popi, notwa kala tatu endagula noshilongo shokoondundu dhaEdom.
2 “Omuwa okwa lombwele ndje a ti: 3 ‘Omwa kala unene tamu endagula noondundu ndhika; ukeni ihe kuumbangalantu. 4 Lombwela aantu to ti: Otamu taakana oshilongo shokoondundu dhaEdom, oshilongo shaakweni, oluvalo lwaEsau. Otaa ke mu tila, 5 ihe inamu ya hingila iita, oshoka itandi ke mu pa nando okapambu kevi lyawo ke thike pepandja lyompadhi. Edom onde li pa oluvalo lwaEsau. 6 Futeni niimaliwa iikulya nomeya ngoka tamu landa kuyo.’
7 “Dhimbulukweni, nkene Omuwa e mu yambeke mwaayihe mwe yi longo. Okwe mu sile oshimpwiyu, sho mwa li tamu endagula nombuga ndjika onene. Okwa kala pamwe nane omimvo adhihe omilongo ne, nomwa kala mu na ayihe mwe yi pumbwa.
8 “Otwa humu ko notwe etha ondjila ndjoka ya za kiilando Elat naEziongeber yu uka kEfuta lya sa notwa pungulukile lwokuuzilombangalantu lwokuMoab. 9 Omuwa okwa lombwele ndje a ti: ‘Ino piyaganeka Aamoabi, oluvalo lwaLot nenge u ya hingile iita. Onde ya pe oshilando Ar, noitandi mu pe nando oshitopolwa mevi lyawo.’ ”
10 (Nale muAr omwa li mwa kala Aaemimi, oshigwana oshinene shaalefule naanankondo ngaashi Aayanaki. 11 Pamwe nAayanaki oya li yomoludhi lwAarafa, ihe Aamoabi oye ya luku Aaemimi. 12 MuEdom nale omwa li Aahori, ihe oluvalo lwaEsau olwe ya tidha mo nokuhanagula po oshigwana shawo e talu tula mo, naanaa ngaashi Aaisraeli ya tidha mo aatondi yawo mevi ndyoka Omuwa e li ya pe.)
13 “Otwa taaguluka omulonga Sered, ngaashi Omuwa e tu lombwele tu shi ninge. 14 Omumvo nguka omutimilongondatu nahetatu, sho twa zi muKadesh Barnea. Aakwiita ayehe yepipi ndyoka oya sa po, ngaashi Omuwa a tile, otaa ka sa po. 15 Oshikaha shOmuwa oshe ya dhenge, sigo e ya yonagula po ayehe.
16 “Ayehe sho ya si po, 17 Omuwa okwe tu lombwele a ti: 18 ‘Nena otamu ka taakana oshilongo Moab tamu piti muAr. 19 Otamu ka ya popepi nevi lyAayammoni, oluvalo lwaLot. Inamu ya piyaganeka tuu nenge mu ya hingile iita, oshoka itandi ke mu pa nando oshitopolwa shevi lyawo ndyoka nde ya pele.’ ”
20 (Noshilongo shika wo osha li nale shAarafa, ihe Aayammoni oye ya luku Aasamsumi. 21 Oya li aaleeleka ya fa Aayanaki. Oya li mo oyendji naanankondo. Ihe Omuwa okwe ya hanagula po, nAayammoni oya kutha po evi lyawo noya tula mo. 22 Osho Omuwa a ningi wo omolwoluvalo lwaEsau, ndoka lu li koshilongo shokoondundu dhaEdom, sho a hanagula po Aahori. Oya tidha mo Aaedom mevi lyawo noye li lala nomo ye li natango. 23 Evi lya kunkula nEfuta lyopokati olya kwatwa po kaantu yokontuntu Kreta. Oya hanagula po Aayavvim, aakalimo yamo aakulu, e taa kutha po evi lyawo sigololo okoshilando Gaza kuumbugantu.)
24 “Sho twa taakana Moab, Omuwa okwe tu lombwele ta ti: ‘Thikameni mu tokole omulonga Arnori. Otandi gandja miikaha yoye omukwaniilwa gwAayammon Sihon, ngoka a kala muHeshbon, pamwe noshilongo she. Mu ponokela u lale oshilongo she. 25 Okuza konena otandi ku ningi omutilithi gwuuyuni auhe. Shaa ngoka ota ka kakama kuumbanda, shaa te ku uvu to popiwa.’ ”
Israel ta sindi Sihon
(Num. 21:21-30)26 “Onda tumu aatumwa okuza mombuga Kedemot, ya ye komukwaniilwa gwaHeshbon edhina lye Sihon ye na elaka lyombili tali ti: 27 ‘Tu pitika tu taakane oshilongo shoye. Otatu ende tu ukilila; itatu zi mondjila tu uka kolulyo nenge kolumoho. 28 Otatu landa iikulya nomeya gokunwa. Otwa hala ashike tu pite moshilongo shoye, 29 sigo twa tokola omulonga Jordan tu ye kevi ndyoka Omuwa Kalunga ketu te li tu pe. Oluvalo lwaEsau, ndoka lu li muEdom, nAamoabi, mboka ye li muAr, oye tu zimine tu taakane miilongo yawo.’
30 “Ihe omukwaniilwa gwaHeshbon Sihon ine tu pitika, tu tokole oshilongo she. Omuwa Kalunga keni okwe mu ningi omutangalali nomunandumbo, opo tu mu dhenge nokukutha po oshilongo she, shoka twe shi lala wo tuu shili.
31 “Omuwa okwa lombwele ndje a ti: ‘Tala ko, onda tyololokitha omukwaniilwa Sihon noshilongo she; ponokela evi lye, opo u li lale.’ 32 Sihon okwe ya naakwiita ye ayehe, e tu kondjithe popepi naJahas, 33 ihe Omuwa Kalunga ketu okwe mu gandja miikaha yetu, e tatu mu dhipaga pamwe noyana naantu ye ayehe. 34 Pethimbo tuu ndyoka otwa kwata po nokuhanagula po oshilando kehe notwa dhipaga aalumentu, aakiintu naanona. Inatu hupitha nando ogumwe e na omwenyo. 35 Otwa kutha po iimuna notwa yugu iilando. 36 Omuwa Kalunga ketu okwe tu kwatitha po omikunda adhihe okuza kuAroer kooha dhesilu lyaArnon noshilando pokati kesilu, ondjila ayihe sigo oGilead. Kakwa li ku na oshilando shi na omakuma ge tu nyenge ando. 37 Ihe inatu ya nando popepi noshilongo shAayammoni nenge komunkulo gwomulonga Jabbok nenge kiilando yokoshilongo shokoondundu nenge ehala lilwe nkoka Omuwa Kalunga ketu inee tu lombwela tu ye ko.”
© Oshindonga Bible © Bible Society of Namibia, 2008.
