Iilando yokwiigamena
(Num. 35:9-28Jos. 20:1-9)1 “Omuwa Kalunga koye ngele a hanagula po iigwana yevi ndyoka te ke li ku pa, nangoye ngele wa lala iilando nomagumbo gawo nowa tula mo. 2-3 Topola evi ndyoka Omuwa Kalunga koye te ke li ku pa, miitopolwa itatu. Moshitopolwa kehe yoolola oshilando shimwe shopokati, moka omuntu ta vulu okuholama, ngele a dhipaga mukwawo. 4 Ngele omuntu ta dhipaga mukwawo hanowina ye ke shi omutondi gwe, ota vulu okumatukila mushimwe shomiilando mbika, a holame. 5 Ngaashika ando aantu yaali taa yi mokuti ya ka komangele omiti, ndele gumwe ta keke omuti, ekuya e tali hukuka ko e tali dhipaga mukwawo, ota vulu okumatukila kushimwe shomiilando mbika itatu e ta hupu. 6 Ngele oku na owala oshilando shimwe, noshinano oshile noonkondo, omukwawo gwanakudhipagwa ngoka te mu galulile iikonene yokudhipaga, ote mu kwata nomondjahi ota dhipaga omukeenandjo. Ndishi shika oshiponga, sho omuntu a dhipaga mukwawo ngoka a li kee shi omutondi gwe. 7 Omolwashoka tandi ku lombwele, wi iyoololele iilando itatu.
8 “Omuwa Kalunga koye ngele ta taandelitha oshilongo, ngaashi a lombwele oohokulu kutya ote shi ningi note ku pe evi alihe e li uvaneka, 9 ihogololela tuu natango iilando itatu. (Ote ke ku pa evi ndika, ngele oto gwanitha ayihe mbyoka tandi ku lombwele nena ndjika nongele ou hole Omuwa Kalunga koye e to ende pamalongo ge.) 10 Shi ninga, opo aantu aakaanandjo yaa se nowaa kale u na ondjo yoku ya dhipaga mevi ndyoka Omuwa Kalunga koye te li ku pe.
11 “Ihe ngele oku na ngoka e tonde mukwawo e te mu langele note mu dhipaga owina e ta ka holama mushimwe shomiilando mbika itatu, 12 nena aakuluntu yoshilando she naye mu tume ko a ze ko notaye mu gandja miikaha yanakupula ombinzi, opo e mu dhipage. 13 Ino mu sila ohenda. Kutha Israel momadhipagathano, opo u kale u na elago.”
Oongamba dhaakulu yonale
14 “Ino lundulula ongamba yamushiinda shoye ndjoka ya tendwa nalenale koohokulu mevi ndyoka Omuwa Kalunga koye te ke li ku pa.”
Kombinga yoonzapo
15 “Onzapo yimwe ayike inayi gwana okutompitha omuntu moontamanana, shila ongele oonzapo dhi li po mbali nenge ndatu dhi holole kutya omuntu omusama. 16 Ngele ope na omuntu te ehameke mukwawo te mu etele ondjo yiifundja nenge uusama, 17 ayehe yaali naa ye kehala lyelongelokalunga e taa tokolwa kaayambi naatokolihapu mboka ye li moshilonga. 18 Aatokolihapu naa konakone oshinima nawa, nongele omuntu okwa ningi onzapo yiifundja okutamaneka mukwawo, 19 na geelwe negeelo ndyoka lya li li na okugeelwa mukwawo a lundilwa. Pahedhi ndjika oto kombo po uuwinayi mbuka. 20 Nena ayehe taye shi kundana, otaa tila nokape na we ngoka ta ka halela mukwawo uuwinayi u thike mpoka. 21 Miinima ya tya ngeyi ino kala nando u na ohenda; egeelo nali kale tuu omwenyo omomwenyo, eho omeho, eyego omeyego, oshikaha omoshikaha nompadhi omompadhi.”
© Oshindonga Bible © Bible Society of Namibia, 2008.
