Ehala lyelongelokalunga limwe
1 “Ndhika odho oompango ndhoka mu na oku dhi dhiginina nawa, manga mu li mevi ndyoka Omuwa Kalunga koohokulu te li mu pe. Dhi pulakeneni! 2 Hanagulii po omahala agehe moka aantu ya li haa simanekele ookalunga yawo koondundu oondeendeka, kiikulundundu nomomizile dhomiti omitalala mevi ndyoka tamu ke li lala. 3 Kumunii po iiyambelo yawo ne mu teyagule po oongundhimanya dhawo dhiidhila. Fikii po iiyelekela yawo yoshikalungakiintu Asheera ne mu komangele po iimenka yawo, opo yaa simanekwe we pomahala ngoka.”
4 “Inamu longela Omuwa Kalunga keni pahedhi ndjoka aantu mbaka haa longele iikalunga yawo. 5 Ihe ehala limwe ndyoka Omuwa Kalunga keni te li hogolola moshitopolwa shomazimo geni, otamu li kongo, nopulyo opo tamu kala hamu gongalele, mu mu longele. 6 Oko tuu hoka tamu fala omafikilondjambo noontselelandjambo dheni, iitimulongo yeni, omagano ngoka gu uvanekelwa Omuwa nomayambo pahalo lyeni yene niisheeli yoongombe noonzi dheni. 7 Noko nkoka koshipala shOmuwa Kalunga keni, ngoka e mu yambeka nomagumbo geni, otamu li nokunyanyukilwa iinima iiwanawa mbyoka mwa longo.”
8 “Ethimbo ndyoka nge lya thiki, inamu ninga ngaashika mwa ningile. Sigo onena shaa ngoka okwa longo ngaashika e shi wete sho opala, 9 oshoka inamu thika natango mevi ndyoka Omuwa Kalunga te li mu pe, moka tamu ka kala mu na ombili. 10 Shampa mwa tokola Jordan, Omuwa ote ke mu langeka moshilongo e tamu kala mo. Ote mu gamene kaatondi yeni ayehe, e tamu kala nombili. 11 Omuwa ota ka hogolola ehala lyontumba, moka ta longelwa, nopulyo otamu ka eta po ashihe shoka tandi mu lombwele: omafikilondjambo noontselelandjambo dheni, iitimulongo yeni nomagano ngoka gu uvanekelwa Omuwa. 12 Nyanyukilweni koshipala shOmuwa Kalunga keni pamwe naana yeni, aapiya yeni nAalevi mboka ya kala miilando yeni; dhimbulukweni kutya Aalevi itaa ka kala ye na oshitendelwa shevi lyawo yene. 13 Inamu yamba omafikilondjambo geni shaa mpoka tamu hogolola, 14 ihe opehala limwe alike ndyoka Omuwa te li hogolola moshitopolwa shomazimo geni. Nopo apeke tamu yambele omafikilondjambo geni e tamu gwanitha iinima ayihe tandi yi mu lombwele.”
15 “Owa manguluka okudhipaga oshimuna shoye noku shi lya shaa mpoka u li. Oto shi li, ngaashi Omuwa te shi ku pe. Ashihe shimwe nge omuyogoki nenge ngoka a nika oshidhila, ota vulu oku shi lya, ngaashi naanaa haku liwa onyama yomenye nenge yohumba. 16 Ihe ombinzi yayo ino yi lya nando, yi tilahi pevi ya fa omeya. 17 Shoka to yambele Omuwa, inashi lilwa pehala ndyoka wa kala, nashi kale iitimulongo yiilya yomaviinu nenge yomagadhi goye gooholivi, osheeli shongombe nenge shonzi yoye, omagano ngoka wu uvanekele Omuwa, omagano to ga gandja pahalo lyoye mwene nenge omayambo galwe. 18 Ongoye naamwoye, pamwe naapiya yoye nAalevi mboka ye li miilando yeni, u na okulila omayambo ngaka koshipala shOmuwa Kalunga koye mehala tuu ndyoka limwe lyelongelokalunga lya hogololwa kOmuwa Kalunga koye. Nowu na okunyanyukilwa ayihe mbyoka we yi longo. 19 Sa oshimpwiyu waa dhimbwe po Aalevi ethimbo alihe to kala mevi lyeni.
20 “Omuwa Kalunga koye ngele ta nenepeke oshilongo shoye, ngaashi u uvaneka, oto vulu okulya onyama, ngaashi wa hala. 21 Ehala lyelongelokalunga ngele oli li kokule unene, nena pahalo lyoye mwene oto vulu okudhipaga oongombe nenge oonzi ndhoka Omuwa e dhi ku pe noto lile onyama maandjeni, ngaashi nde ku lombwele. 22 Shaa ngoka omuyelele nenge a nika oshidhila, ota vulu okulya onyama ndjoka, ngaashi haku liwa onyama yomenye nenge yohumba. 23 Shaa owala itoo yi li yi na ombinzi, oshoka omwenyo ogwa kala mombinzi, onkee ino lya omwenyo pamwe nonyama. 24 Ombinzi ino yi ninga iikulya; yi tilahi pevi ya fa omeya. 25 Ngele to vulika koshipango shika, Omuwa ota ka nyanyukwa, oku na ombili nangoye, naayihe otayi ke ku opalela, ongoye mwene naamwoye. 26 Ihe omayambo goye nomagano goye ngoka wu uvanekele Omuwa, ga fala kehala lyelongelokalunga tuu ndyoka limwe. 27 Onyama nombinzi yomafikilondjambo goye yi yambela koshiyambelo shOmuwa Kalunga koye. Moontselelandjambo ombinzi nayi tilwe koshiyambelo shOmuwa Kalunga koye, ihe onyama oto vulu oku yi lya. 28 Vulika shili kwaayihe mbika nde ku lombwele, ngoye noluvalo lwoye, noto kala nawa aluhe sigo aluhe, oshoka oto ningi shoka shu uka nosho opalela Omuwa Kalunga koye.”
Angaleni iimenka
29 “Omuwa Kalunga keni ota ka hanagula po iigwana, nge tamu ka matukila evi lyawo. Otamu ke li kwata po e tamu tula mo. 30 Omuwa nge a hanagula po iigwana mbyoka, taleni nawa mwaa landule uupagani wawo, oshoka otashi ka ninga omwigo gweni. Inamu simonona tuu, nkene haa longele iikalunga yawo, opo mu shi yelekele. 31 Inamu longela Omuwa Kalunga keni pahedhi ndjoka haa longele iikalunga yawo, oshoka mokulongela kwawo iikalunga otaa ningi iinima iikungitha mbyoka Omuwa te yi tondo. Nokuli ohaa fikile oyana kiiyambelo yawo.”
32 “Gwanitheni ayihe mbyoka nde yi mu lombwele; inamu gwedha ko sha ne inamu kutha mo sha.”
© Oshindonga Bible © Bible Society of Namibia, 2008.
