Okuhanagulwapo kwaIsrael
1 Otashi ka kala oshitilithi ngiini kune mboka mu li nawa muSion nokune mboka mu uvite kaamu na mbudhi muSamaria — ne aanenentu yoshigwana shika oshinene shaIsrael, ne mboka aantu taa ya kune, ya konge ekwatho! 2 Indeni, mu tale oshilando Kalne. Nena tsikileni, sigo okoshilando oshinene Hamat nomu kulukile koshilando shAafilisti Gat. Iilongo mbyoka iiwanawa andola yi vule iilongo Juda naIsrael? Iilongo yawo iinene ngaa yi vule yeni? 3 Otamu tindi okuzimina kutya esiku lyomupya otali ya, ihe otamu panda uukolokoshi mokati keni. 4 Otashi ke mu lulila ngiini molwokwiiyalela iipundi yomafulafula go opala, mu kale ko tamu li onyama yomitanda noyoonzi! 5 Omu hole okutota omaimbilo, ngaashi David a ningile, notamu ga hiki nuuharpa. 6 Ohamu nwine omaviinu miitenga iinene nohamu longitha iizimba ya nika nawa, ihe ihamu lili nando etekepo lyaIsrael, 7 onkee otamu ka ya tango muupika. Iituthi yeni noonshingo dheni odha tya ko nee.
8 Omupangeliawike Omuwa Omunankondoawike okwa gandja elondodho ndika nokugana tali ti: “Ondi tonde okwiitanga kwaIsrael; otandi dhini omagumbo gawo guuyamba ga tungikika. Otandi ka gandja kaatondi oshilandopangelo shawo noshaa shoka shi li mo.”
9 Megumbo ngele tamu hupu aalumentu omulongo, otaa ka sa. 10 Omukwanezimo lyanakusa, ngoka ta ka paka mukwawo, ota kutha mo omudhimba megumbo. Ota ka pula ngoka a kuutumba kosindo yegumbo ta ti: “Pungoye ope na tuu natango gumwe?”
Ewi otali yamukula: “Aawe!”
Nena mukwawo ota ti: “Mwena thilu! Natu kotoke nokuli, inatu tumbula edhina lyOmuwa.”
11 Omuwa shampa a popi, omagumbo omanene nomashona otaga ka teka po iihanuhanu. 12 Uukambe otau pwapwata tuu komamanya? Aantu otaa pulula tuu efuta noonani? Onkene tuu ne omwa shitukitha uuyuuki uuzigo nomwa goyokitha omautho.
13 Otamu itangele okukwata po omukunda Debir. Otamu itanga tamu ti: “Otwa li aanankondo twa gwana okukutha po Karnajim.”
14 Omuwa Kalunga Omunankondoawike oye mwene ta ti: “Aaisraeli, otandi ka tuma etangakwiita lyaakwiilongo, li lwe po oshilongo sheni. Otali ke mu laminina po okuza ketaulilo lyaHamat muumbangalantu, sigo okolusilu lwaArab muumbugantu.”
© Oshindonga Bible © Bible Society of Namibia, 2008.
