Omasindano gaDavid
(1 Ondjal. 18:1-17)1 Konima yaambika omukwaniilwa David okwa matukile ishewe Aafilisti, okwe ya dhenge e ta hulitha po epangelo lyawo lyokulela evi.
2 Nena David okwa dhenge Aamoabi. Oonkwatwa okwe dhi langeke pevi noonkwatwa mbali dhomoonkwatwa ndatu kehe okwe dhi dhipaga. Onkene Aamoabi ya ningi aapiya ye nohaa fendele kuye.
3 Nena okwa dhenge Hadadezer yaRehob, omukwaniilwa gwaZoba, ombinga yimwe yaSiria. Hadadeser okwa li mondjila oku ka lala evi sigo okomulonga Eufrat. 4 David okwa kwata po aakawilinkambe ye eyuvi limwe nomathele gaheyali naakwiita yokolupadhi omayuvi omilongo mbali. Okwa hupitha ko uukambe ethele wokomatembakwiita nokwa lemaneke auhe ulwe.
5 Aasiria yokuDamaskus sho ya tumu etangakwiita lyokukwatha omukwaniilwa Hadadeser, David okwe li matukile e ta dhipaga aalumentu omayuvi omilongo mbali nagaali. 6 Nena okwa yungile ko oontanda dhuukwiita koshilongo shawo noya ningi aantu ye haye mu pe oompale. Omuwa okwa ningi David omusindani kehe nkoka a yile ko. 7 David okwa hakana ko omahuuyanza giingoli ga li haga humbatwa kaambala yaHadadeser e te ga fala kuJerusalem. 8 Okwa yugu ko ishewe iikushu oyindji kuBeta naBerotai, iilando ya lelwa kuHadadeser.
9 Omukwaniilwa Toi gwokuHamat okwa kundana kutya David a dhenga etangakwiita alihe lyaHadadeser. 10 Toi okwa tumu omwana Joram, a kunde omukwaniilwa David te mu halele elago molwesindano lye, sho a sindi Hadadeser, oshoka Hadadeser okwa adhika a kondjitha Toi olule. Joram okwa faalele David omagano goshingoli noshisiliveli noshikushu. 11 Omukwaniilwa David okwe yi yoololele elongelokalunga pamwe niisiliveli niingoli mbyoka a yugu kiigwana mbyoka a sindi: 12 Edom, Moab, Ammon, Filistia naAmalek, osho wo ombinga yimwe yoshihakanwa shoka a yugu kuHadadeser.
13 David okwa kala a simana unene, sho a galuka kedhipago lyAaedom omayuvi omulongo nagahetatu mEkango lyomongwa. 14 Okwa tula oontanda dhuukwiita muEdom alihe, naantu oya ningi aapiya ye. Omuwa okwa sinditha David shaa nkoka a yile ko.
15 David okwa lele Israel alihe nokwa kala a kotoka, aantu ye ya ningwe nawa noya kalwe nayo nuuyuuki. 16 Joab, omuna gwomukulukadhi Zeruia, okwa li ondjayi yaakwiita; Jehosafat yaAhilud okwa li amushangandjayi. 17 Sadok yaAhitub naAhimelek yaAbiatar oya li aayambi; Seraia okwa li amushangampangu. 18 Benaia yaJehoiada okwa li omukuluntu gwaalangeli yaDavid, naana yaDavid, ya li aayambi.
© Oshindonga Bible © Bible Society of Namibia, 2008.
