Oshikethahangano tashi etwa kuJerusalem
(1 Ondjal. 13:1-141 15:25—16:6,43)1 Konima yaambika David okwa hiya e ta gongele aakwiita ya pyokoka muIsrael, ayehe kumwe aalumentu omayuvi omilongo ndatu. 2 Okwe ya fala kuBaala muJuda, ya ka tale ko oshikethahangano shaKalunga shi na edhina lyOmuwa Omunankondoawike, oshipangelapundi she shi li kombanda yaakerubi. 3 Oye shi kutha maandjaAbinadab kondundu e taye shi tula metemba epe. Ussa naAhio, aana yaAbinadab oya li taa hingi etemba, 4 naAhio e li komeho. 5 David nAaisraeli ayehe oya li taa tanta yo taa imbi noonkondo dhawo adhihe taa simaneke Omuwa. Oya li taa hiki iihikomwa — uuharpa, uuliri, oontunda, ooshakashaka noosimbaale.
6 Sho ya thiki kolupale lwaNakon, oonani odha lyatakana, naUssa okwa ganeke oshikaha she, a shige oshikethahangano. 7 Ohaluka Omuwa Kalunga okwa geele Ussa e te mu dhipaga moluusama we. Ussa okwa sile ontega noshikethahangano, 8 onkee ehala ndyoka lya lukwa Perez Ussa sigo onena. David okwa geye, oshoka Omuwa okwa geele Ussa mondjahi.
9 Nena David okwa li a tila Omuwa nokwa ti: “Ote vulu ngiini okupitika, oshikethahangano shi ye kungame?” 10 Sho kwa li inaa hala oku shi fala kuJerusalem, okwa peguka mondjila e te shi fala kaandjaObed Edom, omvalele yomoshilando Gat. 11 Osha kalele nkoka oomwedhi ndatu, Omuwa nokwa yambeke Obed Edom negumbo lye.
12 Omukwaniilwa David sho a kundana kutya omolwoshikethahangano Omuwa okwa yambeke egumbo lyaObed Edom naayihe mbyoka e na, okwa ka tala ko oshikethahangano kaandjaObed Edom e te shi fala kuJerusalem nenyanyu olindji. 13 Aahumbati yoshikethahangano sho ya adhika ya katuka oonkatu hamano, David okwe ya kankameke, manga ta yamba ontsezi nompunya yo ondodhwa. 14 David okwa li a zala onguwo yoliina e yi idhingila, ta tanta a mana mo oonkondo dhe adhihe, a simaneke Omuwa. 15 Osho ngaaka oye nAaisraeli ayehe oya fala oshikethahangano kuJerusalem nomaligolo noshihomo shomankuma.
16 Oshikethahangano sho sha li tashi etwa moshilando, Mikal yaSaul okwa talele mekende e ta mono omukwaniilwa David ta tanta ye ta nuka koshipala shOmuwa muudhano uuyapuki, nokwe mu dhini. 17 Oye eta oshiketha e taye shi tula peha lyasho motenda ndjoka ye shi dhikilwa kuDavid. Nena David okwa yambele Omuwa omafikilondjambo nomakwatathanondjambo. 18 Sho a mana okuyamba oondjambo, okwa yambeke aantu medhina lyOmuwa Omunankondoawike 19 nokwa topolele ayehe iikulya a pe omulumentu kehe nomukiintu kehe oshipambu shoshikwiila, ontumba yonyama ya yothwa nekaka lyomandjembele. Konima yokulya shaa ngoka okwa shuna kaandjawo.
20 Konima sho David a yi megumbo, a kunde yaandjawo, Mikal okwa piti mo te mu tsakaneke e ta ti: “Omukwaniilwa gwaIsrael okwi inenepekele edhina enene ye mwene nena! Okwi ishundula ye mwene a fa egoya montaneho yaadhike yaambala ye!”
21 David okwa yamukula a ti: “Onda li te tantele Omuwa noku mu simaneka, ngono a hogolola ndje peha lyaho nezimo lye, a ninge ndje omuwiliki gwaantu ye Aaisraeli. Notandi tsikile okutantela Omuwa noku mu simaneka. 22 Koshipala she onda hala okwiishonopeka natango. Ngoye oto vulu okutala ndje omunima gwowala, ihe aadhike mboka wa popi, otaa yele ndje momadhiladhilo gawo!”
23 Mikal yaSaul ina kala e na okanona sigo okeso lye.
© Oshindonga Bible © Bible Society of Namibia, 2008.
