Manasse, omukwaniilwa gwaJuda
(2 Ondjal. 33:1-20)1 Manasse okwa li e na omimvo omulongo nambali, sho a ningi omukwaniilwa gwaJuda, nokwa lele omimvo omilongo ntano nantano muJerusalem. Yina oHefzi Bah. 2 Manasse okwa yono kOmuwa. Okwa landula iilonga iinyanyalithi yiigwana mbyoka Omuwa e yi tidha mo mevi, opo aantu ye ya kale mo. 3 Okwa tungulula omahala giinonoma yuupagani ngoka he Hiskia a li a hanagula po. Okwa tungu iiyambelo yokusimanekela Baal, okwa ningitha iiyelekela yoshikalungakiintu Asheera, ngaashi Ahab, omukwaniilwa gwaIsrael, a ningile. Manasse okwa simaneke wo oonyothi. 4 Okwa tungitha iiyambelo yuupagani motempeli, moka Omuwa a tile e na okusimanekelwa. 5 Momahale agehe gaali gotempeli okwa tungile mo iiyambelo yokusimanekela oonyothi. 6 Okwa yamba omwanamati efikilondjambo. Okwa anekelitha e ta pulitha oonganga noompulile. Okwa yono nayi kOmuwa e ta tukulutha ondjahi ye. 7 Okwa tula oshiyelekela shoshikalungakiintu Asheera motempeli, mehala tuu ndyoka Omuwa a lombwele omuntu gwe David nomwana Salomo ta ti: “Muka muJerusalem, motempeli ndjika, omo mu na ehala ndyoka nde li hogolola mokati komazimo omulongo nagaali gaIsrael, li ninge ehala moka tandi simanekelwa. 8 Ngele Aaisraeli otaa vulika kiipango yandje ayihe e taa dhiginine ompango ayihe ndjoka ya pewa komuntu gwandje Moses, nena itandi ka pitika nando, ya tidhwe mo mevi ndyoka nde li pe oohekulu.” 9 Ihe Aajuda inaa vulika kOmuwa, naManasse okwe ya fala mepogolo enene li vule ndyoka lya pogolwa kiigwana mbyoka Omuwa e yi tidha mo moshilongo, opo aantu ye ya kale mo.
10 Omuwa okwe ya lombwelitha aamati ye aahunganeki ta ti: 11 “Omukwaniilwa Manasse okwa longo iihuna mbika yi vule mbyoka ya longwa kAakaanana; nopamwe niimenka ye okwa fala Aajuda muulunde. 12 Omolwashika ngame, Omuwa, Kalunga kaIsrael, otandi undulile Jerusalem naJuda omupya, noshaa ngoka te gu kundana, ota ka kunkwa. 13 Otandi ka geela Jerusalem, ngaashi nda ningi Samaria nongaashi nda ningi Ahab, omukwaniilwa gwaIsrael noluvalo lwe. Otandi ka komba po aantu muJerusalem, ngaashi aantu haa pyaana iiyaha e taye yi sizimike. 14 Otandi ka thiga po aantu mboka taa ka hupa ko, e tandi ke ya gandja miikaha yaatondi yawo, mboka taa ke ya sinda e taa yugu po evi lyawo. 15 Aantu yandje otandi ke ya longela ngeyi, oshoka oya yono kungame e taa tukula ondjahi yandje okuza kethimbo ndiyaka oohekulu ya tembuka muEgipiti sigo ongashingeyi.”
16 Manasse okwa dhipaga aantu oyendjiyendji yaa na ndjo, nombinzi yawo ya tondokele momapandaanda gaJerusalem. Okwa gwedhele shika kondjo ye yokufala Aajuda mokusimaneka iimenka noku ya yonitha kOmuwa.
17 Ashihe shilwe shoka Manasse a ningi, mwa kwatelelwa omayono ge, osha nyolelwa membo lyondjokonona yaakwaniilwa yaJuda. 18 Manasse okwa si nokwa fumvikwa meyana lyuuwa, meyana lyaUssa, nomwanamati Ammon okwe mu landula muukwaniilwa.
Ammon, omukwaniilwa gwaJuda
(2 Ondjal. 33:21-25)19 Ammon okwa li e na omimvo omilongo mbali nambali, sho a ningi omukwaniilwa gwaJuda nokwa lele muJerusalem omimvo mbali. Yina oMeshullemet yaHaruz gwokuJotba. 20 Okwa yono kOmuwa a fa he Manasse. 21 Okwa lamba oshinkoti shahe e ta simaneke iimenka mbyoka ya li hayi simanekwa kuhe. 22 Okwe ekelehi Omuwa, Kalunga koohekulu, ye ina vulika kiipango yOmuwa.
23 Omalenga gaAmmon oge mu tsile ondumbo e tage mu dhipagele muuwa we miineya. 24 Ihe Aajuda oya dhipaga aadhipagi yaAmmon e taa kwaniilekitha omwana Josia.
25 Ashihe shilwe shoka Ammon a ningi, osha nyolelwa membo lyondjokonona yaakwaniilwa yaJuda. 26 Ammon okwa fumvikwa mombila yomeyana lyaUssa, nomwana Josia okwe mu landula muukwaniilwa.
© Oshindonga Bible © Bible Society of Namibia, 2008.
