Omaopaleko gaAsa
1 Ombepo yaKalunga oye ya muAzaria yaOded, 2 oye nokwa yi komukwaniilwa Asa. Okwi igidha a ti: “Omukwaniilwa Asa nAajuda amuhe nAabenjamin, pulakenii ndje! Omuwa ota kala nane, ngele otamu kala naye. Ngele otamu mu kongo, ote ke mu ihololela, ihe ngele otamu mu pilamene, ote ke mu etha. 3 Opwa piti ethimbo ele Israel kee na Kalunga kashili, kee na aayambi yoku ya longa nokee na ompango. 4 Ihe uudhigu sho wa holoka, oya galukile kOmuwa, Kalunga kaIsrael. Oye mu kongo noye mu mono. 5 Momasiku ngeyaka kapwa li ngoka ta vulu okuya nokushuna kee na oshiponga shasha, oshoka moshilongo kehe omwa li uudhigu nevundakano. 6 Oshigwana shimwe osha hepeke oshigwana oshikwawo, noshilando shimwe osha hepeke oshilando oshikwawo, oshoka Kalunga okwa li te ya undulile omalwa nomupya. 7 Ihe ne ikoleleleni ne inamu tyololoka nando. Iilonga mbyoka tamu longo, oyi na ondjambi.”
8 Asa sho a uvu ehunganeko ndyoka lya popiwa kuAzaria yaOded, okwa nkondopala e ta vudha mo iimenka ayihe moshilongo shaJuda naBenjamin niimenka ayihe miilando mbyoka e yi kwatele po mevi lyokoondundu dhaEfraim. Okwo opaleke wo oshiyambelo shOmuwa shoka shi li mehale lyotempeli.
9 Aantu oyendji oye ya kombinga yaAsa ya zi komazimo gaEfraim, gaManasse nogaSimeon e taa kala moshilongo she, oshoka oya dhimbulula kutya Omuwa oku li pamwe naye. Asa okwe ya gongele ayehe kumwe nAajuda nAabenjamin. 10 Oya gongala muJerusalem momwedhi omutitatu gwomumvo omutimulongo nomutitano guukwaniilwa waAsa. 11 Esiku ndyoka oya yamba omagandjelondjambo kOmuwa ga zi miihakanwa mbyoka ye etelele: oongombe omathele gaheyali noonzi omayuvi gaheyali. 12 Oya ningi ehangano, moka ya zimine okulongela Omuwa, Kalunga koohekulu, nomitima dhawo adhihe noomwenyo dhawo adhihe. 13 Shaa omuntu, omugundjuka nenge omukuluntu, omulumentu nenge omukiintu, ngoka inaa simaneka Omuwa, Kalunga kaIsrael, okwa li e na okudhipagwa. 14 Oya popi pombanda ya gana medhina lyOmuwa, ya dhiginine ehangano, nena oya kugilile taa ligola nokuhika omankuma. 15 Aajuda ayehe oya li ya nyanyukwa, oshoka ya hangana ehangano ndika nomitima dhawo adhihe. Oya nyanyukilwa okulongela Omuwa, oye nokwe ya taamba e te ya pe ombili koombinga adhihe.
16 Omukwaniilwa Asa okwa shundula yinakulu Maaka, kaa kale we muunenentu, oshoka okwa li a hambulitha oshimenka oshinyanyalithi Asheera, oshikalungakiintu sholuvalo. Asa okwa ke po oshimenka shoka, e shi tetagula e ta fikile iintimbu yasho mesilu lyaKidron. 17 Asa nando ina hanagula po omahala agehe giinonoma yuupagani moshilongo, okwa kala i inekela Omuwa mokukala kwe akuhe. 18 Okwa tula motempeli iinima ayihe mbyoka he Abia e yi yoololela Kalunga, osho wo oshingoli noshisiliveli shoka ye mwene e shi yoololele Kalunga. 19 Inaku kala we iita sigo okomumvo omutimilongontano gwelelo lye.
© Oshindonga Bible © Bible Society of Namibia, 2008.
