Aayegipiti taa matukile Juda
(1 Aak. 14:25-28)1 Rehoboam sho a koleke oshilongo she nokwa ningi omunankondo, oye pamwe naantu ye oye etha ompango yOmuwa. 2 Momumvo omutitano gwepangelo lyaRehoboam okwaainekelwa kwawo kOmuwa okwa geelwa. Omukwaniilwa gwaEgipiti Shishak okwa matukile Jerusalem 3 e na omatembakwiita eyuvi limwe nomathele gaali, aakawilinkambe omayuvi omilongo hamano naakwiita oyendjiyendji yaa shi kuyalulwa, ya kwatelela mo Aalibia, Aasuki nAasudani. 4 Okwa kwata po iilandohote yaJuda nokwa humu ko sigo okuJerusalem.
5 Omuhunganeki Shemaia okwa yi komukwaniilwa Rehoboam naawiliki yAajuda mboka ya li ya gongala muJerusalem, ya ye Shishak ontuku. Okwa ti kuyo: “Elaka lyOmuwa kune olyo ndika: ‘Ne omwe ekelehi ndje, onkee ngashingeyi nde mu ethele miikaha yaShishak.’ ”
6 Omukwaniilwa naakuluntu oya zimine kutya oya yona noya ti: “Shoka Omuwa ta longo, osho shu uka.”
7 Omuwa sho e shi mono, okwa lombwele Shemaia ishewe a ti kuye: “Itandi ya hanagula po we, sho ya zimine epuko lyawo. Ihe uuna Shishak ta homona, otaa ka hupa ko ngaa. Jerusalem itashi ka gumwa koonkondo adhihe dhondjahi yandje, 8 ihe Shishak ote ke ya sinda, notaa ki ilonga eyooloko pokati kokulongela ndje nokulongela aapangeli yiilongo.”
9 Omukwaniilwa Shishak okwe ya kuJerusalem nokwa yugu po omaliko agehe gomotempeli nogomombala. Okwa kutha shaa shoka sigo iikandekitho yoshingoli mbyoka ya hambulithilwe kuSalomo. 10 Peha lyayo Rehoboam okwa hambulithile po iikandekitho yoshikushu nokwe yi pe aambala mboka ya li ye na oshimpwiyu shokutonatela eelo lyuuwa. 11 Aluhe omukwaniilwa nge ta yi kotempeli, nena aalangeli ohaa humbata iikandekitho noku yi shuna ishewe kongulu yetonatelo. 12 Molwashoka okwi ifupipike koshipala shOmuwa, ondjahi yOmuwa inayi mu hanagula po thilu, niinima oye ende nawa muJuda.
Epangelo lyaRehoboam
13 Rehoboam okwa lele muJerusalem e ta taneke oonkondo dhe dhuukwaniilwa. Okwa li e na omimvo omilongo ne nagumwe, sho a ningi omukwaniilwa, e ta lele omimvo omulongo naheyali muJerusalem, oshilando shoka Omuwa a hogolola mokati kiilando yomuIsrael, shi kale eha moka ta simanekelwa. Rehabeam oye omuna gwomukulukadhi Naama gwokoshilongo Ammon. 14 Okwa longo uuwinayi, oshoka inu ukitha omwenyo gwe a konge Omuwa.
15 Iilonga yaRehoboam okuza ketameko ndongo kehulilo negumbo lye oya nyolelwa mondjokonona yomuhunganeki Shemaja nomondjokonona yomuhunganeki Iddo. Rehoboam naJeroboam oya li ya hingilathana iita aluhe. 16 Rehoboam okwa si nokwa fumvikwa moombila dhaakwaniilwa moshilando shaDavid, nomwana Abia okwe mu landula muukwaniilwa.
© Oshindonga Bible © Bible Society of Namibia, 2008.
