2 ONDJALULO 11 - Oshindonga Bible (ONDB)

Ehunganeko lyaShemaia

1 Rehoboam sho a thiki muJerusalem, okwa hiya aakwiita ya pyoka 180 000 yomomazimo gaBenjamin nogaJuda. Okwa dhiladhila, a ye miita, a galule omazimo gAaisraeli gokuumbangalantu, e ga pangele natango. 2 Ihe Omuwa okwa lombwele omuhunganeki Shemaia, 3 a fale elaka ndika komukwaniilwa Rehoboam nokaantu ayehe yomazimo gaJuda nogaBenjamin 4 tali ti: “Inamu matukila aamwanyoko Aaisraeli. Shuneni komagumbo amuhe. Shika sha ningwa, ongame nde shi hala.” Oya vulika keutho lyOmuwa noinaa ka kondjitha Jeroboam.

Rehoboam ta koleke iilando

5 Rehoboam okwa kala muJerusalem e ta tungithile iilando mbika yomuJuda naBenjamin omadhingililokuma: 6 Betlehem, Etam, Tekoa, 7 Bet Sur, Soko, Adullam, 8 Gat, Maresha, Sif, 9 Adoraim, Lakish, Aseka, 10 Soar, Ajalon naHebron. 11 Okwe yi koleke, yi ninge iilandohote, nomukehe shimwe shomuyo okwa langeke mo elenga, nokwa pungulithile mo iikwakuliwa, omagadhi nomaviinu, 12 osho wo iikandekitho nomagonga. Mokuninga ngeyi okwa kaleke Juda naBenjamin mepangelo lye.

Aayambi nAalevi taa ya kuJuda

13 Aayambi nAalevi oya zi noshilongo ashihe shaIsrael noye ya kuumbugantu kuJuda. 14 Aalevi oya thigi po iinapelo yawo nomapya gawo e taa tembukile kuJuda naJerusalem, oshoka omukwaniilwa gwaIsrael Jeroboam noluvalo lwe inaye ya pitika, ya longe iilonga yaayambi yOmuwa. 15 Jeroboam okwa langeke aayambi ye mwene, ya nonomene pomahala giinonoma yuupagani, ya saagelele oompwidhuli niimenka mbyoka e yi hambulithitha molupe lwoontsezi. 16 Momazimo agehe gaIsrael aantu mboka ya li ya hala okulongela shili Omuwa, Kalunga kaIsrael, oya landulile Aalevi kuJerusalem, opo ya vule okuyamba omayambo kOmuwa, Kalunga koohekulu. 17 Shika osha koleke oshilongo shaJuda, nomomimvo ndatu oya popile Rehoboam yaSalomo noya kala ngaashi muuyuni womukwaniilwa David nowomukwaniilwa Salomo.

Egumbo lyaRehabeam

18 Rehoboam okwa hokana Mahalat gaJerimot yaDavid, yina oAbihail yaEliab lyaIsai. 19 Oya mono aamati yatatu: Jeush, Shemaria naSaham. 20 Konima Rehoboam okwa ka hokana po ishewe Maaka gaAbsalom noya mono aamati yane: Abia, Attai, Sisa naShelomit. 21 Aakiintu yaRehoboam ayehe kumwe oya li omulongo nayahetatu noohonda omilongo hamano. Okwa ningi he yaamati omilongo mbali nayahetatu naakadhona omilongo hamano. Maakadhi ayehe nomoohonda dhe okwa li e hole mo unene Maaka, 22 nomoyana okwa li a hokwa Abia e vule yalwe ayehe, e te mu hogolola, e mu landule muukwaniilwa. 23 Okwa longo pandunge, sho a halakanithile oyana miilandohote ayihe miikandjo yaJuda naBenjamin nokwe ya kongele iikulya naakiintu oyendji.