1 SAMUEL 27 - Oshindonga Bible (ONDB)

David mokati kAafilisti

1 David okwi ipopile a ti: “Siku limwe Saul ona ka dhipaga ndje. Ondi na ashike ompito yimwe, okufadhukila kevi lyAafilisti. Nena Saul ote etha okukonga ndje muIsrael, note hupu ihe.” 2 Onkee David naantu ye omathele gahamano oya yi kuAkish yaMaok, omukwaniilwa gwaGat. 3 David naantu ye oya kala muGat nomagumbo gawo. David okwa kala naakiintu ye yaali, Ahinoam a za kuJesreel naAbigal, omuselekadhi gwaNabal, a za kuKarmel. 4 Saul sho u uvu kutya David a yi ontuku kuGat, okwe etha oku mu landula.

5 David okwa ti kuAkish: “Ngoye ngele okuume kandje, pe ndje okalando, ndi kale mo, oshoka ite pumbwa okukala pamwe nangoye moshilandopangelo.” 6 Akish okwe mu pe oshilando Ziklag. Osho ngaaka Ziklag sha ningi shaakwaniilwa yaJuda nokuli. 7 David a lumbu mevi lyAafilisti oomwedhi omulongo nahamano.

8 Methimbo ndyoka David naantu ye oya li haa ponokele Aageshuri, Aagirzi nAayamaleki, mboka ya kala ethimbo ele moshitopolwa shoka sha taandela sigo oShur nokuEgipiti. 9 Okwa dhipaga aalumentu naakiintu ayehe e ta kutha po oonzi, oongombe, uusino, oongamelo nomizalo nokuli. Sho a galukile kuAkish, 10 Akish okwe mu pula: “Nena omwa ka yugile peni?” David okwe mu hokololele kutya okwa yile kuumbugantu waJuda nenge koshilongo sholudhi lwaJerakmeel nenge koshilongo shAakeni. 11 David okwa dhipaga shaa ngoka, aalumentu naakiintu; inapa hupa nando ogumwe, e ke shi hokolole kuGat kutya ye naantu ye oya longo shike. David osho a li ha ningi ngaaka ethimbo alihe, sho a kala mevi lyAafilisti. 12 Ihe Akish okwa li i inekele David nokwi ipopile ta ti: “Oku tondike unene koyaandjawo Aaisraeli, ota ka longela ndje okukalamwenyo kwe akuhe.”