Jonatan ta kwatha David
1 Nena David okwa zi mongulu yaahunganeki muRama e ta yi ontuku kuJonatan e te mu pula ta ti: “Onda ningi ano shike? Onda yono ngiini? Oshike sha puka nda ningi puho, sho a hala okudhipaga ndje?”
2 Jonatan okwa yamukula a ti: “Aawe, ito si. Tate oha lombwele ndje ashihe shoka ta ningi, oshinene nenge oshishona. Ite shi holeke ndje nokuli, ngele a hala oku ku dhipaga. Aawe, ite shi ningi.”
3 Ihe David okwa yamukula a ti: “Ho oku shi shi nawa kutya ou hole ndje. Onkee okwa tokola, kee shi ku tseyithile, oshoka otashi ku ehameke unene. Otandi ku ganene koshipala shOmuwa omunamwenyo kutya ondi na ko owala onkatu yimwe, ndi se.”
4 Jonatan okwa ti: “Otandi ka ninga shaa shoka wa hala.”
5 David okwa yamukula: “Ngula oku na oshituthi shomwedhi omupe, notandi tegelelwa, ndi lye pamwe nomukwaniilwa. Ihe ngele oshe ku opalela, otandi ka holama melundu sigo ongulohi yahela. 6 Ngele ho ta dhimbulula kutya kandi po poshitaafula, mu lombwela kutya owa pitika ndje, ndi matukile kuBetlehem, oshoka pethimbo ndika ezimo lyetu alihe ohali yamba ondjambo yokomumvo. 7 Ngele ta ti: ‘Onawa,’ nena kandi na mbudhi; ihe ngele ota geye, oto tseya kutya okwa tokola, a yone ndje po. 8 Omolwehangano lyetu lyuukuume sila ndje ohenda. Ihe ngele ondi na ondjo, dhipaga ndje ngoye mwene! Ino fala ndje kuho, a dhipage ndje!”
9 Jonatan okwa yamukula a ti: “Ino shi dhiladhila nokuli. Ando tandi dhimbulula kutya tate okwa hala oku ku yona po, ando otandi shi ku lombwele. Osho oshili.”
10 Nena David okwa pula a ti: “Olye ta ka tseyithila ndje, ngele ho ta yamukula nongeyo?”
11 Jonatan okwa yamukula: “Tu ye kelundu.” Oyo noya yi. 12 Jonatan okwa ti kuDavid: “Omuwa Kalunga kaIsrael na ninge onzapo yetu. Ngula nahela pethimbo ngaandika otandi ka pula tate. Ngele oku na ohenda nangoye, otandi ku tumine elaka. 13 Ngele ota dhiladhila oku ku yona po, Omuwa na dhipage ndje, ngele itandi shi ku tseyithile, opo u ye ontuku. Omuwa na kale nangoye, ngaashi a li natate! 14 Nongele te kala ndi na omwenyo, kwatha ndje, u dhiginine euvaneko lyoye nou inekele ndje; ihe ngele te si, 15 sila ohenda oluvalo lwandje ndoka talu ka kala ko. Uuna Omuwa a adhika a mana po aatondi yoye ayehe, 16 ehangano lyetu nali kale inaali teka po. Ngele tali teka po, Omuwa ote ke ku geela.”
17 Lumwe natango Jonatan oku uvathanitha David kutya oku mu hole, oshoka Jonatan okwa li e hole unene David, ngaashi i ihole mwene. 18 Nena Jonatan okwa ti kuye: “Oshoka ngula oku na oshituthi shomwedhi omupe, okwaahakalapo kwoye poshililo otaku ka dhimbululwa. 19 Hela okwaahakalapo kwoye otaku ka dhimbululwa ishewe noonkondo; onkee ano inda kehala nkoka wa ka holamene nale e to holama konima yondumba yomamanya. 20 Otandi ka umba iikuti itatu lwaankoka nda fa tandi umbu oshoodhekwa. 21 Nena otandi ka lombwela omupiya gwandje, a ye, e ke yi toole. Nongele tandi mu lombwele te ti: ‘Tala, iikuti oyi li kombinga ndjika yoye; yi toola,’ otashi ti kutya ku na mbudhi noto vulu okuhololoka mo. Otandi ku ganene koshipala shaKalunga omunamwenyo kutya ito kala nando moshiponga. 22 Ihe ngele otandi mu lombwele te ti: ‘Iikuti oyi li kombinga ndjiyaka yoye,’ nena inda, oshoka Omuwa okwe ku laleke, u ye. 23 Omuwa ne tu kwathe, tu dhiginine ehangano lyetu sigo aluhe.”
24 Onkee David okwa holama melundu. Moshituthi shomwedhi omupe omukwaniilwa Saul okwe ya koshililo 25 e ta kuutumba pehala lye lyoshito lwopekuma. Abner okwa li a kuutumba ontega naye, naJonatan okwa kuutumba e mu taalela. Eha lyaDavid olya li owala, 26 ihe Saul ina tya sha esiku ndyoka, oshoka okwa dhiladhila: “Ngiika oku na po sha, noku li po ino opala pamisindilo.” 27 Esiku lya landula oshituthi shomwedhi omupe ehala lyaDavid olya li natango owala, naSaul okwa pula Jonatan: “Omolwashike ano David inee ya koshililo ohela ndele nonena?”
28 Jonatan okwa yamukula: “Okwi indile ndje epitikilo okuya kuBetlehem. 29 Okwa ti: ‘Nandi ye, oshoka ezimo lyetu otali dhana oshituthi shoondjambo moshilando, nomumwameme okwa lombwele ndje, ndi kale po. Onkee ano ngoye ngele okuume kandje, pitika ndje, ndi ka talele po aakwetu.’ Omolwashoka inee ya koshililo.”
30 Saul okwa geele Jonatan nokwa ti kuye: “Muna gwomudhimbwe ngoye! Nena ondi shi shi kutya ngoye owa panga uukuume naDavid nowi iyetele ohoni ngoye mwene nanyoko. 31 Ku shi shi nani kutya manga David e na omwenyo, ito ka ninga omukwaniilwa gwoshilongo shino? Ngashingeyi inda, u ke mu tale, e ye huka, oshoka oku na okusa!”
32 Jonatan okwa yamukula: “Omolwashike ano e na okusa? Okwa ningi shike ano?”
33 Nena Saul oku umpile Jonatan negonga, e mu dhipage, naJonatan okwa dhimbulula kutya he okwa mana mo shili, a dhipage David. 34 Jonatan okwa yambuka po a zi poshitaafula a thita po kondjahi noina lya sha esiku ndyoka etiyali lyoshituthi shomwedhi omupe. Okwa li e ehamenwa shili David, oshoka Saul okwe mu sitha ohoni.
35 Ongula ya landula Jonatan okwa yi komalundu, a ka tsakaneke David, ngaashi yu uvathana. Okwa yi ko nokamati 36 nokwa ti kuko: “Matuka, u ka toole iikuti mbyoka tandi ka umba.” Omumati okwa matuka, naJonatan oku umbu oshikuti komeho ge. 37 Omumati sho a thiki peha mpoka oshikuti sha ndjakele, Jonatan okwe mu igidha ta ti: “Oshikuti oshi li komeho! 38 Ino thikama mpoka! Endelela!” Omumati okwa toola oshikuti nokwe ya kumwene gwe 39 ye ina tseya shoka tashi ti; Jonatan naDavid oyo ayeke ya li ye shi tseya. 40 Jonatan okwa gandja omatati ge komumati nokwe mu lombwele, e ga fale koshilando.
41 Omumati sho a yi, David okwa hololoka mo a zi konima yondumba yomamanya. Okwa tsu oongolo nokwa sizimike oshipala she pevi lutatu. Ayehe yaali oya li taa lili, sho taa thipathana komilungu; oluhodhi lwaDavid olwa li olunene lu vule lwaJonatan. 42 Nena Jonatan okwa ti kuDavid: “Kalunga na kale nangoye. Omuwa oye onzapo nokutya tse nangoye, osho wo oluvalo lwoye naandoka lwandje otalu ka dhiginina euvaneko ndyoka eyapuki twe li uvanekelathana.” Nena David okwa yi, naJonatan okwa shuna koshilando.
© Oshindonga Bible © Bible Society of Namibia, 2008.
