1 Nena Samuel okwa kutha ohanga yomagadhi e te ga tile komutse gwaSaul e te mu thipi komilungu e ta ti: “Omuwa okwe ku gwayeke, u ninge omuleli gwaantu ye Aaisraeli. Oto ka lela aantu mbaka e to ya popile kaatondi yawo. Naandika olyo endhindhiliko kungoye kutya Omuwa okwe ku hogolola, u ninge omuleli gwaantu ye: 2 Shaa wa zi pungame nena, oto ka tsakaneka aalumentu yaali popepi nombila yaRakel puZelzak moshitopolwa shaBenjamin. Otaye ke ku lombwela kutya uusino mboka to kongo, owa monika, onkee ho ke na we oshimpwiyu nawo, ihe onangoye noti ipula: ‘Akwetu, ote ningi ngiini molwomumwandje?’ 3 Okuza mpoka oto ka tsikila, sigo wa thiki pomwandi gwiidhila puTabor, mpoka to ka tsakaneka aalumentu yatatu mondjila taa ka yamba omayambo kuKalunga kuBetel. Gumwe gwomuyo okwa humbata uukombwena utatu, mukwawo okwa humbata iikwiila itatu nomutitatu okwa humbata ombago yu udha omaviinu. 4 Otaye ke ku kunda e taa ku pe iikwiila iyali, mbyoka u na oku yi taamba. 5 Nena oto ka ya kondundu yaKalunga muGibea, nkoka ku na ontanda yAafilisti. Posheelo shoshilando oto ka tsakaneka ongundu yaahunganeki taa zi koshiyambelo kondundu taa hiki uuharpa, oontunda, oohiya nuushandja yo taa kakuka. 6 Nanziya ombepo yOmuwa otayi ya mungoye noto kakuka pamwe nayo e to lunduluka. 7 Shaa iinima mbika ya ningwa, nena ninga shoka Kalunga te ku ulukile, u shi ninge. 8 Oto ka tetekela ndje kuGilgal, nkoka tandi ke ku tsakaneka noku ka yamba omafikilondjambo nomakwatathanondjambo. Tegelela nkoka omasiku gaheyali, sigo tandi ya, ndi ku lombwele shoka u na okuninga.”
9 Saul sho a punguluka, a ze po puSamuel, Kalunga okwe mu shitulula. Naashihe shoka e shi lombwelwa kuSamuel, osha ningwa esiku ndyoka. 10 Saul nomumati gwe sho ya thiki kuGibea, ongundu yaahunganeki oye mu tsakaneke. Ohaluka ombepo yaKalunga oye ya muye, nokwa tameke okukakuka pamwe nayo. 11 Aantu mboka ya li ye mu shi nale, sho ye mu mono mokati kaahunganeki, oya pulathana ya ti: “Oshike sha adha omuna gwaKish? Saul okwa ningi omuhunganeki?” 12 Omulumentu gumwe gwaankoka okwa pula a ti: “Aahunganeki mbaka yalwe oolye, noohe oolye?” Mpaka opwa zi omukalo gwokupula: “NaSaul wo okwa ningi omuhunganeki?” 13 Saul sho a mana okukakuka, okwa yi koshiyambelo kondundu.
14 Hekulu yaSaul okwe mu mono pamwe nomumati nokwe ya pula a ti: “Omwa li peni?”
Saul okwa yamukula a ti: “Otwa li tatu kongo uusino. Sho twa nyengwa oku u mona, otwa yi kuSamuel.”
15 Hekulu yaSaul okwa pula: “Okwe mu lombwele shike?”
16 Saul okwa yamukula a ti: “Okwe tu lombwele kutya owa monika,” ihe ina lombwela hekulu shoka a lombwelwa kuSamuel kutya ota ningi omukwaniilwa.
Saul ta ligolelelwa uukwaniilwa
17 Samuel okwa gongaleke aantu kelongelokalunga muMispa 18 nokwa ti kuyo: “Omuwa Kalunga kaIsrael ota ti: ‘Onde mu tembudha muEgipiti nonde mu yululula miikaha yAayegipiti noyaantu yalwe mboka ya li taye mu hepeke. 19 Ongame Kalunga keni, ngoka nde mu mangulula momaudhigu nomomaupyakadhi geni agehe, ihe nena omwa dhini ndje nomwi indile ndje, ndi mu pe omukwaniilwa. Ano ngashingeyi gongaleni koshipala shOmuwa ezimo nezimo, oludhi noludhi.’ ”
20 Samuel okwa hedhitha kuye omazimo agehe, Omuwa nokwa totha mo ezimo lyaBenjamin. 21 Nena Samuel okwa hedhitha kuye omaludhi gomezimo lyaBenjamin, noludhi lwaMatri olwa tomonwa mo. Nena aalumentu yomoludhi lwaMatri oye ya po, naSaul yaKish okwa tothwa mo. Oye mu kongo, ihe sho ya li kaaye mu wete, 22 oya pula Omuwa ya ti; “Ope na ngaa natango omuntu gulwe mpano?”
Omuwa okwa yamukula a ti: “Saul oye ngwiyaka a holama konima yomatemba.”
23 Mbaka oya matuka noye eta mo Saul e taye mu thikameke mokati koshigwana. Oya dhimbulula kutya oye omule, omutse gwe ogwa lunda aantu ayehe yalwe. 24 Samuel okwa ti koshigwana: “Omulumentu oye nguka a hogololwa kOmuwa. Mokati ketu kamu na muntu e mu fa.”
Aantu ayehe oyi igidha ya ti: “Omukwaniilwa na kale aluhe e na omwenyo!”
25 Samuel okwa fatululile aantu oompango niinakugwanithwa yomukwaniilwa nokwe yi nyolele membo, ndyoka e li pungula muuyapuki. Nena okwa shunitha aantu kaandjawo. 26 Saul naye wo okwa yi kaandjawo kuGibea. Aalumentu yamwe aanankondo, mboka oomwenyo dhawo dha li dha gumwa kuKalunga, oya yi naye. 27 Ihe aadhudhu yamwe oya ti: “Omumentu nguka ota vulu ngiini, e tu ningile uuwanawa washa?” Oya dhini Saul noinaye mu etela nando omagano gasha.
© Oshindonga Bible © Bible Society of Namibia, 2008.
