Eudifo lokomhunda: ovanelao oolyelye
(Luk. 6:20-23)1 Ndele Ye eshi a mona ko eengudu dovanhu okwa londa komhunda; ndele eshi a kala omutumba, ovalongwa vaye ove uya kuye. 2 Ndele Ye okwa hovela okupopya, e va longa ndele ta ti:
3 “Ovanelao eehepele domhepo, osheshi Ouhamba weulu owavo.
4 “Ovanelao ovo va nyika oluhodi, osheshi ovo tava ka hekelekwa.
5 “Ovanelao ovananheni, osheshi ovo tava ka fyuulula edu.
6 “Ovanelao ava va fya ondjala nenota louyuki, osheshi ovo tava ka kutifwa.
7 “Ovanelao ovananghenda, osheshi ovo tava ka filwa onghenda.
8 “Ovanelao ovo ve nomitima da yela, osheshi ovo tava ka mona Kalunga.
9 “Ovanelao ovanambili, osheshi ovo tava ka ifanwa ovana vaKalunga.
10 “Ovanelao ava, tava hepekelwa ouyuki, osheshi ouhamba weulu owavo.
11 “Ovanelao onye, ovanhu ngeenge tave mu sheke ndele tave mu taataa ndele tave mu popile mowii aushe nokufufya molwange. 12 Hafeni nye mu nyakukwe pombada, osheshi ondjabi yeni oinene meulu; osho ngaha va li va taataa ovaxunganeki, ve mu tetekela.
Omongwa nouyelele
(Mark. 9:50Luk. 14:34-35)13 “Onye omongwa wedu; ndele omongwa ngeenge tau tutuka, otau shunwa eenghono koshike? Kau na vali oshilonga, ou nokweekelwashi nokulyatwa kovanhu.
14 “Onye ouyelele wounyuni. Oshilando sha tungilwa komhunda itashi dulu okuhondama. 15 Ngaashi olamba ihai temwa i tulwe koshi yoshimbale, ndelenee koshikwatelwalamba, ndele tai minikile aveshe ve li meumbo.
16 “Osho ngaha nouyelele weni nau minikile moipafi yovanhu, va mone oilonga yeni iwa nova hambelele Xo yeni meulu.
Jesus ta fatulula omhango
17 “Inamu diladila Ame nde uya okudima po omhango novaxunganeki; inandi uya oku di dima po, ndelenee oku di wanifa. 18 Osheshi oshili handi mu lombwele: fiyo eulu nedu tali xulu po, momhango itamu di nande okandada kamwe ile oshinghwanyu shimwe fiyo aishe ya wanifwa. 19 Hano ngeenge ku na ou ta dimi po nande oshimwe shomoipango ei inininini ndele ta longo ngaha ovanhu, oye ota ifanwa omunininini mouhamba womeulu; ndele ou te i wanifa note i longo, ye ota ifanwa omunene mouhamba womeulu. 20 Osheshi Ame ohandi mu lombwele: ouyuki weni ngeenge kau dule shili ou wovanongo vomishangwa nowOvafarisai, itamu i nande mouhamba womeulu.
Edipao
(Luk. 12:57-59)21 “Onye mwe shi uda ooxokulu va lombwelwa: ‘Ino dipaa; na: Ou ta dipaa, oye okwe lilongela okutokolwa.’ 22 Ndelenee Ame ohandi mu lombwele: keshe ou ta handukile omumwaina, oye okwe lilongela ehandu letokolo, okeshe tuu ou ta handukile omumwaina ndele ta ti: ‘Oshinhu ove,’ ye okwe lilongela ehandu loshiongalele shovakulunhu; naau ta ti: ‘Elai ove,’ oye okwe lilongela omundilo woheli. 23 Onghee hano, ove ngeenge to twala oshali shoye koaltari, ndele oko wa dimbulukila omumwanyoko nokutya, e na sha naave, 24 fiya ko oshali shoye koaltari, u ye manga mu ka paafane ombili nomumwanyoko, ove u aluke u ka yandje oshali shoye. 25 Itavela diva mu paafane ombili nomutamaneki woye, fimbo mu li mondjila naye, omutamaneki woye ehe ku yandje komutokoli, nomutokoli ehe ku yandje komupiya, ove to twalwa modolongo. 26 Osheshi oshili handi ku lombwele: ku na efiku limwe to di mo, fiyo to futu okapeni kaxuuninwa.
Enyono lohombo
(Mark. 9:43-48)27 “Onye mwe shi uda sha tiwa: ‘Ino nyona ohombo.’ 28 Ndelenee Ame ohandi mu lombwele: okeshe tuu ou ta tale omukainhu nokahalu, oye okwe mu haela momutima waye. 29 Eisho loye lokolulyo ngeenge tali ku hongaula, li kolola mo, ove u li ekeleshi: osheshi okunyona po oshinhimbu shoye shimwe kwe ku wapalela, shi dule olutu loye alishe tali ekelwa moheli. 30 Neke loye lokolulyo ngeenge tali ku hongaula li teta ko, ove u li ekeleshi, osheshi okunyona po oshinhimbu shoye shimwe oshipu, shi dule olutu loye alishe li ekelwe moheli.
Ehengo
(Mark. 10:11-12Luk. 16:18)31 “Okwa tiwa yo: ‘Ou ta henge po omukainhu waye, oye ne mu pe ombapila yehengo.’ 32 Ndele Ame ohandi mu lombwele: Keshe ou ta hengele po omukainhu waye oshinima shimwe shihe fi oluhaelo, ote mu haelifa, ndele ou ta hombola po omuhengwa, ye ota haele.
33 “Ndele vali mwa udile ooxokulu va lombwelwa: ‘Ino ana oipupulu, ndele eano loye li wanifila Omwene.’ 34 Ndelenee Ame ohandi mu lombwele: Inamu ana nandenande, hakeulu, osheshi olo olukalwa laKalunga, 35 hakedu, osheshi olo oshilyatelo shokeemhadi daye, hakuJerusalem, osheshi osho oshilando shohamba inene; 36 ino ana komutwe woye, osheshi ove ku dulu okushitukifa nande oluxwiki limwe li ninge litoka ile lilaula; 37 ndele eendjovo deni nadi tye: ‘Heeno, heeno’, ile: ‘ahowe, ahowe.’ Odo da wedwa ko, odo oda dja mowii.
Okwaalulila owii
(Luk. 6:29-30)38 “Onye mwa uda eshi sha tiwa: ‘Eisho omeisho, eyoo omeyoo.’ 39 Ndelenee Ame ohandi mu lombwele: Inamu kondjifa omunawii; ndele ngeenge ku na ou te ku denge kolupanda lokolulyo, mu alulila nalikwao; 40 ndele ngeenge ku na ou te ku twala koihokolola a hala e ku kufe ngeno oshikutu shoye shokoshi, mu pa yo oshikutu shoye shokombada; 41 ndele ngeenge ku na ou te ku fininike u mu findikile shinano shimwe, mu findikila ivali. 42 Pa ou te ku indile, ino pilamena ou a hala e ku lile oshikolo.
Okuhola ovatondi
(Luk. 6:27-28, Luk. 32-36)43 “Onye omwa uda kwa tiwa: ‘Hola omukweni, tonda omutondi woye.’ 44 Ndelenee Ame ohandi mu lombwele: Holeni ovatondi veni, ilikaneneni ovahepeki veni; 45 Opo mu ninge ovana vaXo yeni meulu, osheshi etango laye ote li pitifile ava vai naava vawa, nodula ote i lokifile ovayuki naava vehe fi ovayuki. 46 Osheshi ngeenge mu hole ava, ve mu hole, omu noku ka pewa ondjabi yashike? Novafutifi ihave shi ningi yo? 47 Ndele ngeenge hamu popifa vakweni aveke, mu shii hamu ningi oshinima shinene? Novapaani ihave shi ningi yo? 48 Kaleni hano mwa wana mwa pwa, ongaashi Xo yeni meulu a wana a pwa.
Eudifo lokomhunda: ovanelao oolyelye
(Luk. 6:20-23)1 Ndele Ye eshi a mona ko eengudu dovanhu okwa londa komhunda; ndele eshi a kala omutumba, ovalongwa vaye ove uya kuye. 2 Ndele Ye okwa hovela okupopya, e va longa ndele ta ti:
3 “Ovanelao eehepele domhepo, osheshi Ouhamba weulu owavo.
4 “Ovanelao ovo va nyika oluhodi, osheshi ovo tava ka hekelekwa.
5 “Ovanelao ovananheni, osheshi ovo tava ka fyuulula edu.
6 “Ovanelao ava va fya ondjala nenota louyuki, osheshi ovo tava ka kutifwa.
7 “Ovanelao ovananghenda, osheshi ovo tava ka filwa onghenda.
8 “Ovanelao ovo ve nomitima da yela, osheshi ovo tava ka mona Kalunga.
9 “Ovanelao ovanambili, osheshi ovo tava ka ifanwa ovana vaKalunga.
10 “Ovanelao ava, tava hepekelwa ouyuki, osheshi ouhamba weulu owavo.
11 “Ovanelao onye, ovanhu ngeenge tave mu sheke ndele tave mu taataa ndele tave mu popile mowii aushe nokufufya molwange. 12 Hafeni nye mu nyakukwe pombada, osheshi ondjabi yeni oinene meulu; osho ngaha va li va taataa ovaxunganeki, ve mu tetekela.
Omongwa nouyelele
(Mark. 9:50Luk. 14:34-35)13 “Onye omongwa wedu; ndele omongwa ngeenge tau tutuka, otau shunwa eenghono koshike? Kau na vali oshilonga, ou nokweekelwashi nokulyatwa kovanhu.
14 “Onye ouyelele wounyuni. Oshilando sha tungilwa komhunda itashi dulu okuhondama. 15 Ngaashi olamba ihai temwa i tulwe koshi yoshimbale, ndelenee koshikwatelwalamba, ndele tai minikile aveshe ve li meumbo.
16 “Osho ngaha nouyelele weni nau minikile moipafi yovanhu, va mone oilonga yeni iwa nova hambelele Xo yeni meulu.
Jesus ta fatulula omhango
17 “Inamu diladila Ame nde uya okudima po omhango novaxunganeki; inandi uya oku di dima po, ndelenee oku di wanifa. 18 Osheshi oshili handi mu lombwele: fiyo eulu nedu tali xulu po, momhango itamu di nande okandada kamwe ile oshinghwanyu shimwe fiyo aishe ya wanifwa. 19 Hano ngeenge ku na ou ta dimi po nande oshimwe shomoipango ei inininini ndele ta longo ngaha ovanhu, oye ota ifanwa omunininini mouhamba womeulu; ndele ou te i wanifa note i longo, ye ota ifanwa omunene mouhamba womeulu. 20 Osheshi Ame ohandi mu lombwele: ouyuki weni ngeenge kau dule shili ou wovanongo vomishangwa nowOvafarisai, itamu i nande mouhamba womeulu.
Edipao
(Luk. 12:57-59)21 “Onye mwe shi uda ooxokulu va lombwelwa: ‘Ino dipaa; na: Ou ta dipaa, oye okwe lilongela okutokolwa.’ 22 Ndelenee Ame ohandi mu lombwele: keshe ou ta handukile omumwaina, oye okwe lilongela ehandu letokolo, okeshe tuu ou ta handukile omumwaina ndele ta ti: ‘Oshinhu ove,’ ye okwe lilongela ehandu loshiongalele shovakulunhu; naau ta ti: ‘Elai ove,’ oye okwe lilongela omundilo woheli. 23 Onghee hano, ove ngeenge to twala oshali shoye koaltari, ndele oko wa dimbulukila omumwanyoko nokutya, e na sha naave, 24 fiya ko oshali shoye koaltari, u ye manga mu ka paafane ombili nomumwanyoko, ove u aluke u ka yandje oshali shoye. 25 Itavela diva mu paafane ombili nomutamaneki woye, fimbo mu li mondjila naye, omutamaneki woye ehe ku yandje komutokoli, nomutokoli ehe ku yandje komupiya, ove to twalwa modolongo. 26 Osheshi oshili handi ku lombwele: ku na efiku limwe to di mo, fiyo to futu okapeni kaxuuninwa.
Enyono lohombo
(Mark. 9:43-48)27 “Onye mwe shi uda sha tiwa: ‘Ino nyona ohombo.’ 28 Ndelenee Ame ohandi mu lombwele: okeshe tuu ou ta tale omukainhu nokahalu, oye okwe mu haela momutima waye. 29 Eisho loye lokolulyo ngeenge tali ku hongaula, li kolola mo, ove u li ekeleshi: osheshi okunyona po oshinhimbu shoye shimwe kwe ku wapalela, shi dule olutu loye alishe tali ekelwa moheli. 30 Neke loye lokolulyo ngeenge tali ku hongaula li teta ko, ove u li ekeleshi, osheshi okunyona po oshinhimbu shoye shimwe oshipu, shi dule olutu loye alishe li ekelwe moheli.
Ehengo
(Mark. 10:11-12Luk. 16:18)31 “Okwa tiwa yo: ‘Ou ta henge po omukainhu waye, oye ne mu pe ombapila yehengo.’ 32 Ndele Ame ohandi mu lombwele: Keshe ou ta hengele po omukainhu waye oshinima shimwe shihe fi oluhaelo, ote mu haelifa, ndele ou ta hombola po omuhengwa, ye ota haele.
33 “Ndele vali mwa udile ooxokulu va lombwelwa: ‘Ino ana oipupulu, ndele eano loye li wanifila Omwene.’ 34 Ndelenee Ame ohandi mu lombwele: Inamu ana nandenande, hakeulu, osheshi olo olukalwa laKalunga, 35 hakedu, osheshi olo oshilyatelo shokeemhadi daye, hakuJerusalem, osheshi osho oshilando shohamba inene; 36 ino ana komutwe woye, osheshi ove ku dulu okushitukifa nande oluxwiki limwe li ninge litoka ile lilaula; 37 ndele eendjovo deni nadi tye: ‘Heeno, heeno’, ile: ‘ahowe, ahowe.’ Odo da wedwa ko, odo oda dja mowii.
Okwaalulila owii
(Luk. 6:29-30)38 “Onye mwa uda eshi sha tiwa: ‘Eisho omeisho, eyoo omeyoo.’ 39 Ndelenee Ame ohandi mu lombwele: Inamu kondjifa omunawii; ndele ngeenge ku na ou te ku denge kolupanda lokolulyo, mu alulila nalikwao; 40 ndele ngeenge ku na ou te ku twala koihokolola a hala e ku kufe ngeno oshikutu shoye shokoshi, mu pa yo oshikutu shoye shokombada; 41 ndele ngeenge ku na ou te ku fininike u mu findikile shinano shimwe, mu findikila ivali. 42 Pa ou te ku indile, ino pilamena ou a hala e ku lile oshikolo.
Okuhola ovatondi
(Luk. 6:27-28, Luk. 32-36)43 “Onye omwa uda kwa tiwa: ‘Hola omukweni, tonda omutondi woye.’ 44 Ndelenee Ame ohandi mu lombwele: Holeni ovatondi veni, ilikaneneni ovahepeki veni; 45 Opo mu ninge ovana vaXo yeni meulu, osheshi etango laye ote li pitifile ava vai naava vawa, nodula ote i lokifile ovayuki naava vehe fi ovayuki. 46 Osheshi ngeenge mu hole ava, ve mu hole, omu noku ka pewa ondjabi yashike? Novafutifi ihave shi ningi yo? 47 Ndele ngeenge hamu popifa vakweni aveke, mu shii hamu ningi oshinima shinene? Novapaani ihave shi ningi yo? 48 Kaleni hano mwa wana mwa pwa, ongaashi Xo yeni meulu a wana a pwa.
