Ehanauno laEgipiti
1 Ondjovo yOmwene ye uya kwaame ndele tai ti: 2 “Kaana komunhu, xunganeka u tye: Omwene Kalunga ta ti ngaha:
‘Kemeni! Woo efiku olo!’
3 Osheshi efiku lOmwene oli li popepi,
heeno, efiku lOmwene oli li popepi, efiku lomudimbi:
olo efimbo loiwana yovapaani.
4 Opo nee eongamukonda tali ka faukila Egipiti,
ndele muEtiopia tamu ka kala oumbada,
ovadipawa ngeenge tava wile po muEgipiti,
ndele ngeenge tava kufa oupuna washo
ndele tava teyaula po omakanghameno asho.
5 Etiopia, Libia naLydia nOvaarabia aveshe, va lumbakana naKub novalumenhu voshilongo sha hangana nasho
otava ka dipawa pamwe navo keongamukonda.”
6 Omwene ta ti ngaha:
“Heeno, vo ava hava yambidida Egipiti tava ka wila po,
nepangelonghono lasho lelinenepeko tali ka xutulwa.
Okudja kuMigdol fiyo okuSiene
vo otava ka wila po musho keongamukonda,
Omwene Kalunga osho ta ti.
7 Sho otashi ka ninga ofuka mokati koilongo ya tokekwa,
noilando yasho otai ka kala mokati koilando ya hanaunwa po.
8 Ndele vo otava ka shiiva nokutya, Aame Omwene,
ngeenge handi ekele muEgipiti omundilo
ndele ovakwafi aveshe vasho tava ka teka po.
9 “Mefiku tuu olo ovatumwa tava di pwaame tava ende neeskepa va ye okutilifa Etiopia, sho shihe noshisho; ndele muvo tamu ka kala oumbada ngaashi mefiku laEgipiti. Osheshi, tala, tali uya.”
10 Omwene Kalunga ta ti ngaha:
“Ame ohandi ka manifa po eemhunga domuEgipiti
keke laNebukadnesar, ohamba yaBabilon.
11 Ye pamwe novanhu vaye oiwana idjuu i dule aishe,
otai ke uya okuhanauna po oshilongo.
Ndele vo otava ka yelulila Egipiti omaongamukonda avo,
ndele tava ka yadifa oshilongo novadipawa.
12 Ndele Ame ohandi ka pwiininifa Nil
ndele oshilongo ohandi shi landifa po momake ovanawii
ndele handi ka tokekifa oshilongo naashishe shi li mo
komake ovanailongo.
Aame, Omwene, nde shi tya.”
13 Omwene Kalunga ta ti ngaha:
“Ame ohandi ka hanauna po oikalunga
nokuxulika muMemfis oikalunga yoipupulu,
ndele itamu kala vali eehamba medu laEgipiti.
Ndele ohandi ka tilifa edu laEgipiti.
14 Ndele Ame ohandi ka tokeka Patros
ndele handi ka ekela muSoan omundilo
nomuThebes ohandi ka wanifila mo omatokolo.
15 Ndele oupyuhandu wange
ohandi ke u tilashi kombada yaPelusium,
ohotengulu yaEgipiti,
ndele handi ka halakanifa eemhunga muThebes.
16 Ndele Ame ohandi ka ekela muEgipiti omundilo:
Pelusium otashi ka kakamifwa kokutila;
naThebes otashi ka tewa,
naMemfis otashi ka mona ovahanauni pokati komutenya!
17 Ovanyashamati vomuOn nomuPi-Beset
tava ka dipawa keongamukonda,
ndele vo vene tava ka ya moupika.
18 Ndele muTahpanhes efiku tali laula,
Ame eshi handi teyaula po ondjoko yaEgipiti,
nelinenepeko lasho tali xulu po musho.
Oshilemo tashi shi uvikile,
novana vasho oukadona tava ka ya moupika.
19 Osho ngaha Ame ohandi ka wanifila muEgipiti omatokolo ange.
Ndele vo otava ka shiiva nokutya, Aame Omwene.”
20 Ndele momudo omutimulongo nowotete, mefiku etiheyali lohani, ondjovo yOmwene ye uya kwaame ndele tai ti: 21 “Kaana komunhu, Ame onda teyaula po okwooko kwaFarao, ohamba yaEgipiti, ndele tala, ko inaku mangelwa sha, opo ku pamekwe okukwata eongamukonda. 22 Onghee hano, Omwene Kalunga ta ti ngaha: Tala, Farao, ohamba yaEgipiti, Ame ohandi mu vele eembedi! Ndele Ame ohandi ka teyaula po omaoko aye, oko kwa pama nako kwa teywa ndele handi ka wilifa poshi eongamukonda lomeke laye. 23 Ndele ohandi ke lihanifa Ovaegipiti moiwana noku va halakanifila moilongo. 24 Ndele Ame ohandi ka pameka omaoko ohamba yaBabilon, ndele eongamukonda lange ohandi ke li tula meke layo, ndelenee omaoko aFarao ohandi ke a teyaula po, opo ye a keme moipafi yayo ngaashi ondjashe tai keme. 25 Heeno, Ame ohandi ka pameka omaoko ohamba yaBabilon, ndelenee omaoko aFarao taa ka endjelela. Ndele vo otava ka shiiva nokutya, Aame Omwene, ngeenge Ame ohandi tula eongamukonda lange meke lohamba yaBabilon, opo yo i shiive oku li yelulila edu laEgipiti. 26 Ndele Ovaegipiti Ame ohandi ke va halakanifa moiwana noku va halakanifila moilongo. Osho ngaha vo otava ka shiiva nokutya, Aame Omwene.”
Ehanauno laEgipiti
1 Ondjovo yOmwene ye uya kwaame ndele tai ti: 2 “Kaana komunhu, xunganeka u tye: Omwene Kalunga ta ti ngaha:
‘Kemeni! Woo efiku olo!’
3 Osheshi efiku lOmwene oli li popepi,
heeno, efiku lOmwene oli li popepi, efiku lomudimbi:
olo efimbo loiwana yovapaani.
4 Opo nee eongamukonda tali ka faukila Egipiti,
ndele muEtiopia tamu ka kala oumbada,
ovadipawa ngeenge tava wile po muEgipiti,
ndele ngeenge tava kufa oupuna washo
ndele tava teyaula po omakanghameno asho.
5 Etiopia, Libia naLydia nOvaarabia aveshe, va lumbakana naKub novalumenhu voshilongo sha hangana nasho
otava ka dipawa pamwe navo keongamukonda.”
6 Omwene ta ti ngaha:
“Heeno, vo ava hava yambidida Egipiti tava ka wila po,
nepangelonghono lasho lelinenepeko tali ka xutulwa.
Okudja kuMigdol fiyo okuSiene
vo otava ka wila po musho keongamukonda,
Omwene Kalunga osho ta ti.
7 Sho otashi ka ninga ofuka mokati koilongo ya tokekwa,
noilando yasho otai ka kala mokati koilando ya hanaunwa po.
8 Ndele vo otava ka shiiva nokutya, Aame Omwene,
ngeenge handi ekele muEgipiti omundilo
ndele ovakwafi aveshe vasho tava ka teka po.
9 “Mefiku tuu olo ovatumwa tava di pwaame tava ende neeskepa va ye okutilifa Etiopia, sho shihe noshisho; ndele muvo tamu ka kala oumbada ngaashi mefiku laEgipiti. Osheshi, tala, tali uya.”
10 Omwene Kalunga ta ti ngaha:
“Ame ohandi ka manifa po eemhunga domuEgipiti
keke laNebukadnesar, ohamba yaBabilon.
11 Ye pamwe novanhu vaye oiwana idjuu i dule aishe,
otai ke uya okuhanauna po oshilongo.
Ndele vo otava ka yelulila Egipiti omaongamukonda avo,
ndele tava ka yadifa oshilongo novadipawa.
12 Ndele Ame ohandi ka pwiininifa Nil
ndele oshilongo ohandi shi landifa po momake ovanawii
ndele handi ka tokekifa oshilongo naashishe shi li mo
komake ovanailongo.
Aame, Omwene, nde shi tya.”
13 Omwene Kalunga ta ti ngaha:
“Ame ohandi ka hanauna po oikalunga
nokuxulika muMemfis oikalunga yoipupulu,
ndele itamu kala vali eehamba medu laEgipiti.
Ndele ohandi ka tilifa edu laEgipiti.
14 Ndele Ame ohandi ka tokeka Patros
ndele handi ka ekela muSoan omundilo
nomuThebes ohandi ka wanifila mo omatokolo.
15 Ndele oupyuhandu wange
ohandi ke u tilashi kombada yaPelusium,
ohotengulu yaEgipiti,
ndele handi ka halakanifa eemhunga muThebes.
16 Ndele Ame ohandi ka ekela muEgipiti omundilo:
Pelusium otashi ka kakamifwa kokutila;
naThebes otashi ka tewa,
naMemfis otashi ka mona ovahanauni pokati komutenya!
17 Ovanyashamati vomuOn nomuPi-Beset
tava ka dipawa keongamukonda,
ndele vo vene tava ka ya moupika.
18 Ndele muTahpanhes efiku tali laula,
Ame eshi handi teyaula po ondjoko yaEgipiti,
nelinenepeko lasho tali xulu po musho.
Oshilemo tashi shi uvikile,
novana vasho oukadona tava ka ya moupika.
19 Osho ngaha Ame ohandi ka wanifila muEgipiti omatokolo ange.
Ndele vo otava ka shiiva nokutya, Aame Omwene.”
20 Ndele momudo omutimulongo nowotete, mefiku etiheyali lohani, ondjovo yOmwene ye uya kwaame ndele tai ti: 21 “Kaana komunhu, Ame onda teyaula po okwooko kwaFarao, ohamba yaEgipiti, ndele tala, ko inaku mangelwa sha, opo ku pamekwe okukwata eongamukonda. 22 Onghee hano, Omwene Kalunga ta ti ngaha: Tala, Farao, ohamba yaEgipiti, Ame ohandi mu vele eembedi! Ndele Ame ohandi ka teyaula po omaoko aye, oko kwa pama nako kwa teywa ndele handi ka wilifa poshi eongamukonda lomeke laye. 23 Ndele ohandi ke lihanifa Ovaegipiti moiwana noku va halakanifila moilongo. 24 Ndele Ame ohandi ka pameka omaoko ohamba yaBabilon, ndele eongamukonda lange ohandi ke li tula meke layo, ndelenee omaoko aFarao ohandi ke a teyaula po, opo ye a keme moipafi yayo ngaashi ondjashe tai keme. 25 Heeno, Ame ohandi ka pameka omaoko ohamba yaBabilon, ndelenee omaoko aFarao taa ka endjelela. Ndele vo otava ka shiiva nokutya, Aame Omwene, ngeenge Ame ohandi tula eongamukonda lange meke lohamba yaBabilon, opo yo i shiive oku li yelulila edu laEgipiti. 26 Ndele Ovaegipiti Ame ohandi ke va halakanifa moiwana noku va halakanifila moilongo. Osho ngaha vo otava ka shiiva nokutya, Aame Omwene.”
