Mâǁaets tao tide
1 Tare-i ǀgui-en ga khoena sa xa ǂâi, xawe tā sao ra xūna tao. Tā gu ǁîn di mûǂgāǀgauga satsa ǁoreb ǃoa ǂgaeǂhapu.
2 Hoan xa ǀGapib di ǂhanub tsî ǁîb di ǃgaeǀhaos,
eloxoresa khoen tsîna ǂhanu-aise ǀgoraǃgâs,
3 ǀhûǂharugu-ao-i tamas ka io daob aits hâ-ū khoe-i ǀkha māǂuisa ǀgoragus
ǀumisa ǀgoragus,
4 ǂhanu ǃgommi tsî ǀnōba sîsenūs,
5 kais kas, ǂkharis kas hoasa hōǂgābasensa dīs,
ǁamaǂharugusa, ǂharugu-ao-i ǀkhas,
hoaǁae sa ôasanna ǂūga ǁkhāǁkhās,
îǂhôaoǃnâ khobo-e ǀaob nî dâus kōse ǂnaus.
6 Aogo, sago tarade go ga ǂgomǃgâ tama i tamas ka ion ga ǂgui khoena oms ǃnâ hâo, o i ge a ǃgâi sa ama-ai xūn hoana ǃnau-amsa. 7 Mâ maris hoas hîats ra sâus tamas ka io mâ xū-i hoa-i māǂui tamas ka iots ra ǃkhōǃoa-i xa ǂōrisa xoaǁguiba mā. 8 Tā khoe-i hîa gâse ra dī-i tamas ka io kaira khoeb hîa ǀai-aodi ǀkha dīxūxaba mî-unubasa îganǀgē. Nēn hoan ge ǂhâǂhâsa ǀapemāna tsîts ga ǁîna sao, o i ge mâ-i hoa-e sa tanisens ǃnâ ǃgâiǃgâibasensa nî ūhâ.
ǁGûgu tsî ôasadi
9 Sago ǁgûgo ra ǂganǃgâsib ǃnâ sago ôadi xa ǂâiǂhansen, tsî dîdi ra sago ǂâidi ǃnâ ǁnora, hîa ǁom ǁoa ǃkhaisa ta ge ǂan. ǂKhams ka, ob ge ǀnîsis ǃgame tide ǃkhais xa ra ǂâiǂhansen. ǀNais ga ǃgame hâ ǃnās aib ge aob xas nî ǀnamhe tamas ka io ǀnamhe tide ǃkhais xa ra ǂâiǂhansen. 10 ǂKhams ka, ob ge ǁîs oaxaesisa ǂoaǃnâ tsîs nî ǁîb oms ǃnâs hâ, hîa ǀgamǀkhā ǃkhais xa ra ǂâiǂhansen. ǃGames ka hâ, ob ge ǁîs nî aob ǃoagu ǂhanuoǃnâ tamas ka io, os ǀgôa-e hō ǁkhā tide ǃkhais xa ra ǂâiǂhansen.
11 Sa ǃnâudanaxa ôasas ga ǁîs di ǂâisa sao ǂgao, ots ge ǂōrisase ǁîsa nî kōǃgâ. ǁNāsats ga dī tama i, os ge nî taotao tsi tsîn ge sa khākhoena nî âiǂui tsi. ǃĀs ǃnâ hâ-i hoa-i ge ǀûs ose ǁnā ǃkhais xa nî ǃhoa tsîts ge kai taosib ǃnâ nî mâ. Tās ǁîs di ǁomǃnâǃnā-oms di mûǂuidaosa aisǀkhāb dao-ams ǁga ǃoa tsî mûǂuidao-e ūhâ tama ǃnā-om-i ge ǁkhāti a ǃgâi. 12 Tās ǁîs di îsasiba aorekhoegu aiǃâ ǁgau tamas ka io tarekhoedi ǀkha ǃhoamas ǀkha ǁaeǁore. 13 Tarekhoedi ra ǂkhababa ǀnî tarekhoede xu ǁkhāǁkhāsens ǁkhās khamib ge ǁguriba sarana ra hîkākā.
14 Aorekhoeb di ǂkhabasib ge tarekhoes di ǃgâisib xa a ǃgâi. Tarekhoes ge taob tsî ǃharaxūb tsîkha ra hā-ū.
Elob di ǂkhaisib kurus ǃnâ
15 Nēsi ta ge Elob di sîsengu xa nî ǂâiǂâiǃnâ du
tsî mû ta ge xūna nî xoaǃgāǃgā.
Mîmāb ge khami i ge mâ xū-i hoa-e ge ī,
tsîs ge hoaraga kurusa ǁîb di mîmāde ra ǁnâuǀnam.
16 Sores ra ǃhūbaiba ǀkhâuǂam,
ob ge Elob di ǂkhaisiba hoa ǃkhaigu ai mûhe ǁkhā.
17 Hoaǀgaixa ǃKhūb ge ǁîb di hoaraga ǂkhaisib ǃnâ
hoa buruburuxa xūna ǁîb di kurus ǃnâ ge kuru,
tsîn ge ǀamose ǁaposase mâ.
ǁÎb di ǃanu ǀhomǃgāgu tsînab ge Eloba,
ǁîb di hoaraga sîsenga xoaǃgāǃgās ǁkhāsiba mā tama ge i.
18 ǃKhūb Hoan xa ǀGapib ge ǂanhe ǁkhā a xū-i hoa-i
tsî ǁkhāti noxopa ī tama xūn tsîn hoana a ǂan.
ǁÎb ge mâ xū-i hoa-e, ǃgamsib hurib diba xu,
ǂganǃgâsa ǂâidi khoesi ǂgaob didi kōse a ǂan.
19 ǁÎb ge ǀnai ge hâ in tsî hâhâ nîn tsîna ǂan,
ǁîb ge gaugausa xūna ra ǂhaiǂhai.
20 Sada ra ǂâin hoanab ge ǂan
tsî ǃhoa da ra mîs hoasa ra ǁnâu.
21 ǃAmkusib ǃhūbaib dib ge kaisib ǁîb gā-aisib diba ra ǁgau
tsî ǁîb ge ǀamosiba xu ǀamosib kōse hâ.
Xū-i xare-i ge ǀarohe tamas ka io ūbēhe tide,
tsîb ge khoe-i xare-i di ǀapemā-i tsîna ǂhâba tama hâ.
22 Hoa sîsengu ǁîb digu ge îsa,
mâtikōse gu mûdi ǃnâ ra ǂkhai.
23 ǃKhūb ge kuru xū-i hoa-i ge ǁî-i di ǂâibasensa ūhâ
tsî ǀamose ra aiǃgû, ǁîb ǂâisa ra ǁnâuǀnamse.
24 Hoa xūn ge ǀgamse kuruhe hâ, nē-i nau-e ra mâǃoase,
xawe kurub ge xūn hoan ge a ǀoasa.
25 Xū-i hoa-i ge ǀnî xū-i di ǃgâisiba ra ǀoaǀoa.
Khoe-e xare nē ǂkhaisiba mûǂâu i nî?
