ǀAesenni tsî sōǀôan
1 ǃKhūb ge sōǀôadī-aona ge kuru, xuige ǁîna ǁîn di sîsenni ǃaroma ǃgôasiba mā. 2 ǃKhūb, Hoan xa ǀGapib ge ǁîna ǂuruǂurus di ǁkhāsiba ge mā tsî gu ge gao-aoga ǁîna ǁnās ǃaroma ra mādawa-am. 3 ǁÎn di sîsenǁkhāsib ge khoen xan nî ǃgôahe ǃkhaisa ra ǃaroma. ǁKhātin ge ǁkhāsiba ūhâ khoena ǁîna ǃgôasiba ra mā.
4 ǃKhūb ge ǃhūbaib ai sōǀôahaina ge kuru tsî ǁnâuǃāxats ka, ots ge ǁîna nî sîsenū. 5 Haiǃâro-i ge ǀnî ǃnā-i ai au ǁgam-e, āhe ǁkhā i nîse ge dī tsî nēs ge ǃKhūb di ǁkhāsiba ra ǁgauǂui. 6 ǁÎb ge khoena ǀaedīs di ǂansa ge mā, ǁîba da dīb ge buruxa xūn ǃaroma nî koase. 7-8 Sōǀôahaba-aob ge nē sōǀôana ra haba, tsîb ge sōǀôadī-aoba ǀaega ǂuruǂuru tsî tsûba ra ǃopoǃopo. ǃKhūb ge hugaǀgui ǃhūbaib di khoena ǂurusiba mās di sîsenni ǀkha ra aiǃgû.
9 Ti ôatse, ǀaesents ka o, tā ǁnāsa ǁnāti hâ-ū, xawe ǃKhūb ǃoa ǀgore, ob ge ǁîba nî ǂgauǂgau tsi. 10 Sa ǁorena ǁguiǁnâ, î ǂhanusets nî dī ǃkhaisa mîǁgui. Mâ ǁore-i hoa-e xu xoresen. 11 ǃGâihamxūna ǁguiba; ǃhoroǁguibasa dī, î oli-i ǀkha ǂnâ-ai. 12 Ab sōǀôadī-aoba hā hui tsi. ǂÂis ǃnâ ūhâ, ǃKhūb ge ǁîba ge kuru. Sats ge ǁîb huiba ǂhâba hâ, ǁnā-amaga sa tawa ūhâ bi. 13 Sa ǂurusib sōǀôadī-aob ǃomǁae nî hâ ǁaegu ge nî hā. 14 Sōǀôadī-aob ge ǃKhūb ǃoa nî ǀgore, îb ǁîb ǀaekhoen di tsûba ǃopoǃopo tsî ǁîn di ûiba sâus ǃaroma ǂgauǂgausa hōba. 15 ǁÎ-i di sōǀôadī-aob ǃoagu ǀgapiǂâixa khoe-i ge ǁî-i di Kuru-aob ǃoagu ra ǁore.
ǁŌ hân ǃaroma ǃoas
16 Ti ôatse, khoe-i ga ǁō, ots ge nî ǃoa. Matikōsets ǃoa hâ ǃkhaisa ās tsî ǃgaes ǀkha ǁgau. ǁÎ-i sorosa anusa ǀgaub ai ǁkhōs ǃaroma aiǂhomi, î ǁî-i di ǁkhōs tawa hâ. 17 ǁŌ hâ-i di ǃgôasiba ǁgaus ǃaroma tsûsase ā. Ūǃoahesa ǁaeb ǃnâ nē khoe-e āba. Nēsa ǀnî tsēde dī, în khoena tā ǂhanusets ǃoa tama ti ǀau tsi, î ǁnās khaoǃgâ nē khoe-i ǃaroma ǃoaǀû. 18 ǃOaǀû tamats ga i, ots ge ǂkhabu tsî ǁō ǁkhās tsîna i. 19 ǁKhōs ǀkhab ge ǃoaba nî ǃkharu; ûib di tsūǀkhāb ge ǂgaob di ǃoatsâsi.
20 Tā ǃoab ǃnâ māǁnâsen, î ǃoaǀû. Sada hoada ǀguitsē nî ǁō ǃkhaisa ǂâis ǃnâ ūhâ. 21 ǁŌ hâ khoe-ets ûiba ǁkhawa hō-oa kai ǁoa ǃkhaisa tā ǀuru. ǃOab ǀkhats ge sats ǀguitsa ra tsûtsûsen; sats ge ǁō hâ-e hui tama hâ. 22 ǂÂis ǃnâ ūhâ, nētsē i ge ǁî-e ǁō hâ tsî ǁarits ge sats tsîna a ǁō ǁkhā. 23 ǁŌ hânats ga ǁkhō tsîn go sâ, o ǁîn xa ǂâiǀû. ǁÎn ga ǁō, o an nauna ǁkhaeǂgao tsi.
Gā-aisib ǁgauǃnâ-aogu tsî ǀnî sîsengu
24 ǁKhāǁkhāsen ragu ge gā-ai ǂgao gu ka, o ǂâuna ǁaeba ǁkhāǁkhāsens ǃaroma ūhâ tsî nau sîsenǃnôana xu nî ǃnorasa. 25 Mâtib ǂgari-aoba ǂansa hō ǁkhā hoaraga ǁaebab ga ǁîb di tsaugomagu ǀkha ǀgui a sîseno? Hūs xū-i ǁîba ra ǂkhîǂkhî i ge mâtikō ǃgâiseb ǁîb di ǂgarisîsenna ra dī ǃkhais tsî ǂgaris xa ǃhoas ǀguisab ǂansa. 26 ǁÎb ge ǂâis âba ǂhanu ǁgaraga ǃhūǃgaos ai ra ǂnûi tsî tsuxub kōse ûitsama xūnab nî ǂûmāga ra sîsenǃkharu.
27 ǁNāti i ge ǃomsîsenaob ǀkha ī. ǁÎb ge ǂōrisase tsuxub tsî tsēs tsîna ra sîsen tsî kuruǃnôaga ǃgomǀgausa ǀkhunuǂnûidadi tsî ǀuidi ai ra ǃgaoǂui. ǁÎb ge mâ kuruǃnôa-i hoa-i nî nau-e xu ǃkharaga ǃkhais tsî ǀoasa aiǁgausa i ǂnuruǁnuib ǃnâ i ga ǁgâiǁnâheo ǁnāxū ǃkhais tsîna ra ǁapoǁapo. ǁÎb ge gaxuse tsuxub kōse, sîsennab nî dītoaga ra sîsen.
28 ǁNātib ge ǀurikuru-aob, hîa ǀurinab ra ǂnau-ai xūs tawa mâb tsî ǀuriǃâro-i sîsenūb ra-i xa ra ǂâib ǀkha ǁkhāti ī. ǁGanomsa xu ra ǂoaxa ǁhabub ge khōb âba ra dao tsîb ge ǁganoms di ǀgammi xa ra aosen kaihe. Hamers ǀkhab ra ǀuriba ǂnau tsî ǂōrisase ǀurib hîab ra sîsen aib garu ra ǀkhara ǀgausa kō hîab ge hamers di ǀōba ra ǂganaǂgae kai bi. ǁÎb ge tsuxub kōse ǁgui-aisase nî sîsen, îb kurub go xū-e ǀoasase dītoa.
29 ǁNāti i ge ǁkhāti sūǂnubi-aob, sîsenni âb tawa ǂnû tsî ǁîb ǂaira ǀkha ǀnūsa ra ǃkhoe kaib ǀkha ǁkhāti ī. ǁÎb ge ǁîb sîsenni ai ǂâisa ra ǂnûi tsî mâtikō xūnab kuru ǁkhā ǃkhais xa ra ǂâiǂhansen. 30 ǁÎb ge ǂgoa-e ǁîb ǂaira ǀkha ra dāǃnâ. ǁÎb ge sūsa ǁîb ǃomkha ǀkha ǂnubi tsî ǁîsa ǁnās khaoǃgâ ǃamkuse ra ǂkhanuǂkhanuǀkhā. ǁÎb ge ǁganomsab nî ǃanuǃanuse, tsuxub kōse ra sîsen.
31 Nē khoegu hoagu ge ǃomgu ǀkha sîsens ǁkhāsiba ūhâ, mâb hoab ge ǁîb ǃharib ai ǂhunuma kuruǁkhāsiba ūhâ. 32 ǁNāti ī khoegu ose di ge kai ǃāde hâ ǁkhā tide; khoe-i xare-i ge ǁnāti ī ǃkhai-i ai hâ ǂgao tide tamas ka io ǁnāpa sari tide. 33 Xawen ge khoena ǁîga ǃās di ǀapemāǃnans ǃnâ gu nî sîsen tamas ka io gu nî ǃās di ǂhâǂhâsa ǂgaeǂgui-ao kaise ǂgan tama hâ. ǁÎgu ge ǀgoraǃgâ-ao kai tama hâ tsî ǂhanusi ǁhōga ǁnâuǃā tama hâ. ǁÎgu ge ǁkhāǁkhāsen-i tamas ka io ǃgâi ǂūna ūhâ tama hâ tsîts ge ǁîga tātsē ǂansa khoen ǁaegu mû tide. 34 Xawe ǁîgu ra dī sîsenni ge mâ-i hoa-i ǃgâi ûiba nî ûiga ra hui. ǁÎgu di sîsenna gu ga dī, os ge ǁnāsa ǁguibaǀgores ǁkhās khami ī.
