Menelaub ge ra ǃgamhe
1 ǀGuikaidisi tsî hakadisikhoeseǀaǁî kurib ǃnâ gu ge Judab Makabaeub tsî ǁîb di saoǃgonaoga, Antioxub Eupatori kai toroǂnubis ǀkha Judeab ǃoagu ǂgaekhâi 2 tsîb Lisiab, ǂkham gao-aob di ǃûi-ao tsî ǂhanub di danakhoes tsîna ge i iba ǁîb ǀkha hâ ǃkhaisa ge ǂan. ǁÎgu ge Grike toroǂnubis hîa ge ǀguikaidisi tsî disiǀoadisi hātoroǃkhamaogu, koroǀoadisi tsî ǃnonakaidisi ǀnūtoroǃkhamaogu, ǀgamdisiǀgamǀa ǂkhoagu tsî ǃnonakaidisi torokunidi, ǀā gôaga ge ǀnūdi ai ūhâ ide ge ūhâ i.
3 Menelaub tsîn ge ǁîb di ǀhôagaosib ǀkha ǁîgu tawa ge ǃamǂgāsen tsî ǁîb di ǃhūb ǃaromas ose, xawe ǀgapipristerseb nî mâihe ǃkhaisab gere ǃâubasen xui-ao Antioxuba gere ǂgaoǂgaoǃnâ. 4 Xawe Elob, gao-aogu di gao-aob ge Antioxuba, Menelaub ǃoagu ge ǁaixa kai. Lisiab ge nē khoeb ge hoa ǃgomsiga ǁîba ǃaromaba ǃkhaisa Antioxuba ge mîba. Ob ge Antioxuba, Menelaub nî Bereas ǃoa ǃgû-ūhe tsî ǁnāpa ra ǁnaetisase dīhe khami ǁōb ǃoa ǀgoraǃgâhe ti Lisiaba ge mîmā. 5 ǁNā ǃās ǃnâb ge ǀgamdisiǀgamǀa meterga ǀgapi ǂgō-omma mâ. ǁÎb ge tsaob xa ǀoa hâ tsî ǂganagab ǃnâb ge ǂkhanu-ūdab tsaob ǃnâ ra ǁgôaba hâ. 6 Khoen hîa elon ǃoagun ge dī tamas ka io ǀnî ǃaorosa tsūdīn ǃaroma ǀhapimāhen ge ǁnāpa ǁōn nîga gere aoǂgāhe. 7 Menelaub ge ǁnā ǀgaub ai ge ǃgamhe tsî ǁkhōhes xawes tsîna hîhe tama ge i, 8 tsîs ge ǁnāsa ge ǂhanu i. ǁÎb ge ǂgui ǁorena altars di ǀaes tsî ǃanu tsaob tsîra ǃoagu ge dī tsî ǁnā-amagab ge tsaob ǃnâ ge ǁō.
Modeins ǀgūse hâ torob
9 Gao-aob Antioxub ge ǁîǃgôasen hâse ǁîb di ora ǁnāǂamdi Judeab ǃoagub gere dīdi ǀkha ge aiǃgû. ǁÎb ge ǁîb di îb ge Jodeǁîn ǃoagu dīs ǃgâ-aib nî ǁîna ǁkhōse sîsenū ǃkhaisa ge ǂâibasen hâ i. 10 Xawe Judab ge nēnab ge ǁnâu, o khoena ǁîn ǃaorosasib, ǁîn di ǂhanub, ǃhūb tsî ǃanu Tempela ǂoaǃnâs dib ǃnâ hâ, xui-ao tsēs tsî tsuxub tsîra nî ǃKhūb ǃoa ǀgore ǃkhaisa ge mîmā. Hūgas ǃgâ-ain ge ǁîb di huib tsî sâub tsîna, 11 ǁîn di ǀasaǀasahe ge ǃhūb, eloxoresa Jodeǁî taman di ǃomgu ǃnâ ǁnā tidega ge ǂhâba hâ i. 12 ǃNona tsēdi ǀgaiban ge khoena xū-i tsîna dī tamase ais ǂama ǃhūb ai ǁgoe, ǂûtama* hâ tsî ā tsî ǀkhomxaǃnâ ǃKhūb di huiba gere ǀkhoma. ǁNā ǁaeb ǃnâb ge Judaba khoen âba ǂgaoǂgaoǃnâ tsî ǂhomisenn nî ǃkhaisa ge mîmā.
13 ǁNās khaoǃgâb ge Judaba Jodeǁî ǂgaeǂgui-aogu ǀkha ǂganǃgâsib ǃnâ ǀhao tsî ge mîǀgui, î gu Elob di huib ǀkha Antioxub nî Judeaba ǁnāǂam tsî Jerusalemsa ǀhanas aiǃâ gao-aob ǃoagu ǃkham. 14 ǁNās khaoǃgâ ǀamǂoas torob disa Kuru-aob ǃhūbaib diba māǁôa, î ǁkhoaǂgaoxase sago ǂhanub, Tempeli, Jerusalems, sago ǃhūb tsî sago di hoaraga ûib ǃaroma ǃkham, tib ge Judaba ǁîb di khoega ge ǂgan. 15 Judab ge ǁîb di ǂganǃgâsa mîs: “Dans ge Eloba xu ra hā” ti ra mîsa toroǃkhamaoga ge mā tsî ǁnā tsuxuba ǁhûiǂuisa ǁkhoaǂgaoxa ǂkham khoegu ǀkha gao-aob tentomma ǁnāǂam tsî ǀgamǀoadisis xa ǃnāsa khoega ge ǃgam. ǁKhātib ge ǂgaeǂgui gere ǂkhoab tsî ǁîb di ǃgapi-aob tsîkha ge ǃkhāǃan. 16 Hâǃkhaib ǃnâ ge hâ i khoe-i hoa-i ge ǃaob tsî ǁkhapis ǃnâ Judab ge ǁîb khoegu ǀkha dan hâse 17 sores ǂgâb aiǃâ ǂoa, o ge hâ i. ǃKhūb di huib tsî sâub ge nēn hoana ge īǁkhā kai.
Antioxub ge Jodeǁîn ǀkha ǃgaeǀhaosa ra dī
(1 Makabergu 6:48-63)18 Jodeǁîn di ǁkhoaǂgaosib ge gao-aob Antioxub nî ǁnā Jodeǁî ǃāde ǃomǁae hō ǃkhais ǃaroma ge ǂâu hâ i. 19 ǁÎb ge Jodeǁîn di ǁkhui-ommi Betsurs dibab ge ǁnāǂam, xawe ǃnākorobe ǃkhamǃoahe tsî ǀunis ai ge danhe. 20 Judab ge ǂhâǂhâsa xūna ǁkhui-omma gere ǁkhauba khoega ge sîba, 21 xaweb ge Jodeǁî toroǃkhamaob, Rodoku ti ǀon hâba ǂganǃgâsa ǂanǂansa khākhoen ǃoa ge māǃkharu. Xaweb ge ǂanǃnâhe, ǃkhōhe tsî ge ǃgamhe. 22 Gao-aob ge ǀgamǁî ǃnāsa Betsurs khoen ǀkha ge ǁgamǁare tsî ǁîn ǀkhab ge mîǀgui, o ǁîb toroǃkhamaoga ge ǂgae-oa. ǁNās khaoǃgâb ge Judaba ge ǁnāǂam, xaweb ge ǁkhawa ge danhe. 23 ǁNā ǁaeb ǃnâb ge Filipuba ǂhanuba nî ǂgaeǂguise Antioxs ǃnâ ge ǁnāxūhe, xaweb ge gao-aob Antioxuba ǁîb ra nau ǂgaeǂgui-aogu ǃoagu khâikhâisen ǃkhaisa ge ǁnâu. Gao-aob ge ge tare-eb nî dī ǃkhaisab ge ǀū i, xui-ao ǂkhîb di ǃhoaǁarede Jodeǁîn ǀkha tsoatsoa, ǁîn di mîǀgaugu ǃnâ māsen tsî ǁîb xan ra sîsenūhe ǀgaub ǃnâ māsen ǃkhaisa ge mîmâi. Nē ǃgaeǀhaosa ǁapoǁapos ǃaromab ge ǁguiba-e dī tsî māǂgaoxase ǀkhaexū-e Tempela nî ǃgôasiba ǁgause mā 24 tsî tsauraǃnâse Judab Makabaeuba ge ǃkhōǃoa. ǁNās khaoǃgâb ge gao-aoba Hegemonideba, Ptolemais tsî Gerars tsîra ǁaegu ge ǁgoe i ǀkharib di ǂgaeǂgui-aose ǁgaumâi 25 tsî ǁîb ǂûba Ptolemais ǃoa ge ǃgû. ǁNāpa ge ǁan hâ i khoen ge kaise ǁîb ge Jodeǁîn ǀkha dī ǃgaeǀhaos xa ge ǁaixa. ǁNātikōse ǁaixa tsîn ge ǃgaeǀhoas nî mîǁnâhe ǃkhaisa ge ǂhâba. 26 Xaweb ge Lisiaba ǂhaisa ǃhoasa ūhâ tsî ǁkhāb as kōse nē ǃgaeǀhaosa gere ǁkhauba. Khoenab ge ǃgēǃgē tsî ǂhanu i asa mîdans khaoǃgâb ge Antioxs ǃoa ge oa.
ǁNātis ge gao-aob Antioxub di ǁnāǂamsa ǂgae-oasens ǃnâ ge dabasen.
