Judits ge ǀapeǁguib âs ǀkha ra tsoatsoa
1 Holoferneb ge ǁîb khoega ge mîmā, î gu Juditsa ǁîb ǀhaiǀuri ǂûǃnâxapan hâ ǃkhaib ǃoa ǃgû-ū tsî ǀō-aisa ān tsî ǂûn tsîn ǀkha tāba ǂhomiba. 2 Judits ge ǂkhā tsî “ǂÛ ta kao, o ta nî Elob di ǂhanuba khôa, xui-ao ta ge sa ǂûna a ǂû ǁoa. Tita ge tita hā-ū hâ ǂûn ǀguina nî ǂû” ti ge mî.
3 “Tare-es nî dī sa ǂûn ga toao? Mâpa ge ǀnî ǂû-e nî hōba si? Nēpa i kom ǀguis khami i Israelǁî-i tsîna ǀkhaio?” tib ge Holoferneba ge dî si.
4 Os ge “ǃGôahesatse, sats ûi hâ ǃkhais ao, ti ǃKhūb nî sîsenū te tsî ta ǁîb di ǀapesa nî dīǀoaǀoas kōse ta ge ǂâu hâ ǂû-e ūhâ” ti ge ǃeream.
5 On ge Holoferneb ǃgāna Juditsa ǀnî tentom-i ǃoa ge ǃgû-ū. ǁÎs ge tsuxubǃgâs kōse ge ǁom tsî ǃnauǁgoaga, sores ǁhaib aiǃâ khâimâ 6 tsî Holoferneba ge haisiba, îs ǃgoaǃnāb ǃoa ǁgôa tsî si ǀgoresa mā-amhe. 7 Holoferneb ge ǁîb ǃûi-aoga ge mîmā, î gu tā Juditsa ǂhani. Judits ge ǁaubexa ǃnona tsēde toroǃkhamaogu di hâǃkhaib ǃnâ ge hâ i tsîs ge tsuxub hoaba Betulias ǀgūse ǁgoe ǃgoaǃnāb ǃoa ǃgû tsî ǀaus tawa sī gere ǁāsen. 8 Tsî ǁāsentoas ka, os ge ǃKhūb Elob ǃoa gere ǀgore, îs ǁîs di ǀapes ǃnâ mâxōǀkhāhe tsî Israelǁîna dansa hā-ūba. 9 Tsîs ge tentoms ǃoa gagasise ǃanuse oahā tsî ǃuis ǂûsas nî ǂûtoas kōse tentoms ǃnâ gere hâ.
Judits ge Holoferneba ra ǁhāǁnâdana
10 Hakaǁî tsēs, toroǃkhamaogu di hâǃkhaib ǃnâs ge Juditsa hâ is dis aib ge Holoferneba ǁîb di ǀgapi danakhoega ǂûǁaresa ge dība, xaweb ge nau danakhoegu, sîsenni ai ge hâ i gu xa ǀguib tsîna ge ǁkhauǂui tama hâ i. 11 Ob ge Bagoab, ǂgomǂgomsa ǂammâisa tsî ǁkhāti ǁîb di ǂhunuma xūn di kōǃgâ-aos tsîna ge i ib ǃoa ge mî: “ǃGû îts ǁnā Hebreǁî tarekhoes, sa ǃûiǃgâs ǃnâ hâsa sī gowadan, îs ti tentoms ǃoa ǀkhī tsî sage ǀkha ǂû tsî ā. 12 ǁNāti ī khoes ǀkha ǁgoeǁares ǃēsa ǃkharu kais ge tita taosib ase ība. ǁÎsa ta ga ǂgaeǂhaputsâ tama i, os ge nî âiǂui te.”
13 Ob ge Bagoaba Holoferneba xu Judits tawa sī tsî ge mî: “ǀNamsa khoese, ǃkhōdana-aob Holoferneb ge ǂauxûi-e āǀhaos ǃaroma ǁîb tentoms ǃoa ra ǁkhauǂui si. Hā, î Asiriaǁî tarekhoe-i hîa Nebukadnesari gao-ommi ǃnâ ra ǃoaba-i khami, ǁîb ǀkha ǃgâiaǂgaoǀhao re. Nēb ge a kai ǃgôasi.”
14 “ǃGâiaǂgaob ǀkha ta nî ūǃoa. Mâti ta nî ǂkhā? Tita ge ûi ta hâs kōse nē ǃgâiaǂgaoxa tsēsa ǀuru tide” tis ge ge ǃeream.
15 Os ge Juditsa khâi tsî ǁîs di hoan xa îsa sarana ge ana. ǁÎs di khobos ge ǁîs aiǃâ ǃgû tsî Holoferneb ais ai Bagoab xas ge Juditsa ǂûs ka, os nî ǂnû-ai ga māhe hâ i ǂgoaga ge ǀgâiǁgui. 16 Tsîs ge Juditsa tentoms ǃnâ ǂgâ tsî ǁnā ǂgoagu ai ge ǂnû. Holoferneb ge ǁîsa mû, ob ge ǁkhae-aihe ǁoasa turaba ǁîs ǀkhab nî ǀnamma ǀhuruse ge hō. ǂGuro tsēs hîab ge ǁîsa a mûsa xub ge ǁîsab nî ǂgaeǂhapu ǁaeb ǀguiba ge ǃâu hâ i. 17 Ob ge Holoferneba “Toxopa, sige ǀkha ā, î ǃgâiǃgâisen re” ti ǁîs ǃoa ge mî.
18 Os ge Juditsa ge ǃeream: “ǃGôahesatse, ǃgâiaǂgaob ǀkha ta nî ā, nēs a ti ûib ǃnâ ǂoaǂamsa tsē xui-ao.” 19 Xawes ge Juditsa ǁîs di khobos xas ge aiǂhomibahe hâ i ā-i tsî ǂûn ǀguina ǂû tsî gere ā. 20 Holoferneb ge kaise ǁîs xa ge ǃgâibahe i tsîb ge ǁîb di hoaraga ûib ǃnâb ge noxopa ǂauxûi-e ā tama hâ i khami ge ā.
