Romeǁîn ǀkha hâ ǃgaeǀhaos
1 Judab ge Romeǁîn di koahegomxasib tsî toroǀgaib xa ge ǁnâu. ǁÎb ge hoan Romeǁîn ǀkha ge ǃgaeǀhaosa dīn ge ǁîn xa ǁkhoreǁharehe tsî ǁnān, Romes ǃoa ge hān ge khoexaǃnâsiba mîmâibahe ǃkhais tsîna ge ǂan i. 2 Khoen ge Romeǁîn ge ǃkham torogu tsî ǃgari-aosi sîsengu Gaulǁîn ǁaegun ge dīgu, mâtin ge ǁîna dan tsî ǁgui-aimarisa matare kai ǃkhais tsîna ǁîba ge mîba. 3 ǁÎb ge tarena gu ge Spanjeb ǃnâ, ǁnāpa gu ge ǀhaiǀuri tsî ǃhuniǀuriǃgaesenga a ǀhanao, dī ǃkhaisa ge mîbahe. 4 ǂŌrisa ǀapeǁguib tsî ǀû tamase aiǃgûs ǀkha gu ge Romesa xub ge ǃnū i, xawe hoaraga ǃhūba ge dan. ǁÎgu ge ǁîgu ǃoagu gere ǃnū ǃhūga xu hā ǃkham gao-aoga ge dan. ǁÎga gu ge ǁgaise ge hîkākā tsîn ge ûiǃgau gena ǁgui-aimarisa gere matare. 5 ǁÎgu ge Masedoniab di gao-aokha Filipub tsî Perseub hâkha tsî ǁîkha ǀkha ge Romes ǃoagu khâikhâisen khoen tsîn ǃoagu ǃkham tsî ge dan. 6 ǁÎgu ge ǁkhāti Asiab di gao-aob Antioxub Kaib, hîa ge ǁîga ǀguikaidisiǀgamdisi ǂkhoagu, hātoroǃkhamaogu, torokunidi tsî ǀgaisa toroǂnubis ǀkha ǁnāǂamga ge hîkākā. 7 Tsîgu ge ǁîba ûitsamase ǃkhō tsî ǁîb di saoǃgonaona kai ǁgui-aimarisa matare, ǃkhōsaben mā tsîn ǁîn di ǂoaǂamsa ǃhūgu, 8 Indiab, Mediab tsî Lidiab tsîga nî māǁnā ǃkhaisa ge ǂgaoǀkhā. ǁÎgu ge nē ǃhūga ǁîba xu ū tsî gao-aob Eumeneba ge mā.
9 Grikeǁîgu ge ǁîga ǁnāǂam tsî gu nî hîkākā ǃkhaisa ge ǀape, 10 xawe gu ge Romeǁîga nē ǃkhaisa ǂanǃnâ tsî ǃkhōdana-aoba Grikeǁîgu ǃoagu nî ǃkhamse ge sî. Romeǁîgu ge ǂgui Grikeǁîga ǃgam, ǁîgu taradi tsî ǀgôan tsîna ǃkhōsis ǃnâ ū, ǁîgu xūna ǁkhâuǁnâ, ǃhūb âga ū, ǀgaisa hâǃkhaiga khôaǁnâ tsî ǁîna nētsēs kōse ge khobodī. 11 ǁKhāti gu ge nau gaosigu, ǃnāǃnuidi tsî mâ-i hoa-i, ǁîgu ǃoagu gere ǃkham-e hîkākā tamas ka io gere khobodī. 12 Xawe gu ge ǁnān hîa ǁîgu xa nî ǁkhaubahese ǁîgu ǀkha ǃgaeǀhaosa ūhân ǀkha khoexaǃnâsiba ge ǃkhōǀgaipe. ǁÎgu ge ǀgūse tsî ǃnūse hâ gao-aoga ge dan tsî i ge ǁîgu di koahegomxasib xa gere ǁnâu-i hoa-e ǁîgu xa ge gere ǃao. 13 ǁÎgu ge ǀnî khoega gao-ao kai gu nîse ge hui tsî nauga ge ǂnûiǁnâ. Tsî gu ge ǁnā ǃkhais ǃaroma kaise ge ǀgapiǀgapihe. 14 Nēn hoan gere ī, xaweb ge ǀguib âgu tsîna kronsa ǀgapa tamas ka io gaosi ǂhoaǀapa anaǂamsaraba ana tama ge i. 15 ǁÎgu ge ǀapemāǃnan-e ge ǂnubi tsî gu ge ǃnonakaidisi tsî ǀgamdisi ǀapemā-aoga tsēkorobe ǀhao tsî khoen di ǃgomsigu tsî ǁîn di ǃgâise hâsa gere ǃhoaǂam. 16 Mâ kurib hoabab ge ǀgui khoeba, khoen tsî hoaraga ǁanǀkharib di ǂgaeǂguis di ǃereamsa gere ǂgomǃgâbahe. Hoagu ge nē khoeba gere ǁnâuǀnam tsîb ge surib tamas ka io tauxasib xaweba ǁîgu ǃnâ ge ǀkhai i.
17 Judab ge Johaneb di ôa tsî Akkosi ǁnuriǀgôab Eupolemub tsî Eleasari ôab Jasonni tsîkha ǁhûi tsî khoexaǃnâsib ǃgaeǀhaosa nî Romeǁîn ǀkha dīse Romes ǃoa ge sî. 18 Nēsab ge Siriaǁîn di ǁgâiǀāba xub nî ǃnorase ge dī, Jodeǁîn ge ǁkhāti mâtin ǁîn khoena ra khobodīhe ǃkhaisa ge mû xui-ao. 19 Kaise gaxu tsî ǃgom ǃgûs khaoǃgâ kha ge Eupolemub tsî Jasonni hâkha Romes ǃnâ sī tsî ǀApemāǃnans ommi ǃnâ ge ǂgâ. ǁÎkha ge ǂnûsa sao rase ge gowaǀî: 20 “Judab Makabaeub, ǁîb ǃgâsagu tsî Jodeǁîn ge sadu ǀkha khom nî torob ǃnâ huigus tsî ǂkhîb di ǃgaeǀhaosa dīse go sî khom, î da xoaǁguisa ǃgaeǀhaos ǃnâ-u sadu di ǀhōsa kai.”
21 Romeǁîn ge aoǁguiba ge ǃkhōǃoa 22 tsî sao rab ge sîǂkhanis di ǁgâiǁnâb, hîa ge brons ǂgapagu ai xoahe tsî Jerusalems ǃoa, ǂkhîb ǃgaeǀhaos di xoaǁguib aseb ǁnāpa nî hâse sîheba.
23 “An hoa xūna Romeǁîn tsî ǃhūb ǃnâ tsî hurib ai hâ Jodeǁîn ǃaroma ǀamose ǃgâise ǃgû! An tātsē tā khākhoena ūhâ tsî toro-e ǃkham! 24 Xawe torob ga ǂgurose Romeǁîn tamas ka io ǁîn ǀkha ǃgaeǀhaosa ūhâ khoen ai hā, 25 on ge Jodeǁîna ǁîs ǃoa hā tsî ǁîsa ǂgaob hoab ǀkha, mâsib ga mā-am ǀgaub ai nî mâxōǀkhā. 26 ǁNā khākhoen ǁîs ǃoagu ra torodīnab ge ǂû-i, ǁâtanin, mari-i tamas ka io doe-omde mā tide, Romes ǃnâ i ge mîǀguihe khami. Tsîn ge ǁîn di mîǁguide hōdawa-am-i ose nî dīǀoaǀoa.
27 “ǁNā ǀgaub ǀguib ai torob ga ǂguro Jodeǁîn ǃoa hā, on ge Romeǁîna ǂgaob hoab ǀkha mâsib ra ǁgausen ǀgaub hoab ai ǁîna nî mâxōǀkhā. 28 Romes ǃnâ i ge mîǀguihe khamin ge khākhoena ǂû-i, ǁâtanin, mari-i tsî doe-omgu tsîna māhe tide.
29 “Nētin ge Romeǁîna, Jodeǁîn ǀkha ǃgaeǀhaosa ge dī. 30 Xawe ǃgoaxaǁaeb ǃnâ ra ge hoa ǃnanra xū-e ūbē tamas ka io ǀarosa nî mîǀguis kara, on ge ǁîn di mîǀguib ai nî sîsen tsî i ge ǀarohe tamas ka io ra ūbēhe xū-e ǀgaiba nî ūhâ.
31 “ǃAruǀî ge ge gao-aob Demetriub ra Jodeǁîn ǃoagu dī tsū dīgu xa ǁîb ǃoa nēti ge xoa: ‘Tare-i ǃaromats sida ǀhōsan tsî ǁîn ǀkha da ǃgaeǀhaosa dī hâ Jodeǁîna ǁkhōse gere sîsenū? 32 ǁKhawan ga sats ǃoagu huiba sige tawa ǀkhoma, o ge ge ǁîna ǂkhâǃnâ tsî toroba sats ǃoagu ǃhūb tsî ǁgammi ai nî dī.’ ”
