Judab Makabaeub ge Lisiaba ra dan
(1 Makabergu 4:26-35)1 Timoteub ge danhes khaoǃgâb ge Lisiab, gao-aob di ǃûi-ao, khoexakhoe tsî ge gaosis di dana iba taren ge ī ǃkhaisa ge ǁnâu. ǁÎb ge ǁaixa 2 tsî ǁkhaisadisiǀoadisi ǀnūtoroǃkhamaogu tsî hoaraga hātoroǃkhamaogu ǁîb dīga ū tsî Jodeǁîn ǃoagu Jerusalemsa nî Grike ǃās ase dīse ge ǂgaeǂgui. 3 Tempeli ge Jodeǁî taman ra ǃoabade dī ǃkhaigu ǁkhāgu khami ǁgui-aimarisa nî matare tsî ǀgapipristersisa kurikorobe nî ǁamaxūhe. 4 Lisiab ge ǁîb di disiǀoadisi ǀnūtoroǃkhamaogu, ǀoadisi hātoroǃkhamaogu tsî ǁkhaisadisi ǂkhoagu ai ǂnīsa i xui-ao tātsēs tsîna Elob di ǁkhāsib xa ge ǂâi tama hâ i. 5 ǁÎb ge Judeaba ǁnāǂam tsî Betsurs di ǁkhui-ommi ǁaubexa ge ǃnonadisi kilometerga Jerusalems di ǃkhawagas ǃnâ ge mâ iba ge ǁnāǂam.
6 Judab tsî ǁîb khoegu ge Lisiab ge ǁkhui-omga xāǂgā ǃkhaisa gu ge ǁnâu, on ge ǁîgu tsî hoaraga khoen tsîna ā tsî ǃKhūba ge ǀkhoma, îb ǃgâi ǀhomǃgāb ǁîna nî sâuba ǁîna sîba. 7 Judab ge ǂgurose ǁîb di ǁâtanina ge ū tsî nauna ǁîb ǀkha ǀhao tsîn nî ǁîn ûiba horesa ǃgâsanna nî huise mā ǃkhaisa ge ǂgaoǂgaoǃnâ. ǁÎn ge kai māsenxasib ǀkha ǀhaosase ǁnāǀî ge ǂoa. 8 Xawen ge Jerusalemsa xun ǃnū tama hîa ǃuri sarana ana tsî ǃhuniǀuri ǁâtaninna tani hâ hāǃgapi-aob xan ǂgaeǂguihe hâ ǃkhaisa ge mû. 9 ǁNātimîsin ge hoana ǀhao tsî Eloba ǁîb di ǀkhomxaǂgaosib ǃaroma ge gangan. ǁÎb ge khoegu ǀguiga gu ǁnāǂam tide tsî gu nî ǃkhausa ǀgurun tamas ka io ǀurib ǀkha kurusa ǂnubiǂgoagu tsîna ǁnāǂam ǃkhais di ǁkhoaǂgaoxasiba ǁîga ge mā. 10 ǁÎgu ge torodīǀgaub ai ge dāǁnâ tsîb ge ǁîgu ǀkha ǁnāb hîab ge ǃKhūba ǁîb di ǀkhommi ǃnâ, ǁîgu di ǀkhāba xu nî ǃkhamse sîba ǁîgu ǀkha ge ǃgû. 11 ǁÎgu ge ǁaixa xamgu khami khākhoegu ǃnâ ge ǂgâ tsî disiǀguiǀaǀoadisi ǀnūtoroǃkhamaogu tsî ǀguiǀoadisi tsî ǃnanikaidisi hātoroǃkhamaogu tsîna ge ǃgam, tsî ǃgau ge khākhoegu ge ge ǃkhoeni. 12 ǂGuigu ǃkhoeni gegu digu ge ge tsuihe hâ i tsî ǁîgu ǁâtanina ge ǂoaǃnâ. Lisiab tsîn ge taotaosaseb ge ǃaoǃnâ khoe-i khami ǃkhoeni amaga ǀgui ge ûiǂoa.
Lisiab ge Jodeǁîn ǀkha ǂkhîba ra dī
(1 Makabergu 6:56-61)13 Gâ tamab ge hâ i xui-aob ge Lisiaba nē ǂoaǃnâs, hîab ge hōsa ǂâiǃgâ tsî Hoaǀgaixa Elob ge Jodeǁîna ǃkhamba tsîb hūga ǁîna dan tide ǃkhaisa ge mûǂan. ǁNā-amagab ge Jodeǁîna haisi-am-e sîba 14 tsî ǁîn ǀkha hoa ǀgaugu ai ǂkhîb ǃnâ hâ tsîb gao-aob tsîna ǁîn ǀkhab khoexaguse nî hâ ǃkhaisa gowadan ti ge mîmâi. 15 Judab Makabaeub tare-i ǁîb khoen ǃaroma ǃgâi ǃkhaisa ǂâiǃgâ tsî hoa aoǁguigu Lisiab ge dīga ge ǃkhō-am. Gao-aob ge xoa tsî ǂgan hâ i xūn hoanab ge Judaba Lisiaba ge mā-am.
Lisiab di sîǂkhanis Jodeǁîn ǃoa
16 Nēb ge Lisiab ge Jodeǁîn ǃoa xoa sîǂkhanis di xoaǁnâba:
“Lisiaba xu Jodeǁîn ǃoa hâ tawedes. 17 Sadu di ǂnûǁkhaeba-aokha, Johaneb tsî Absalommi hâkha ge ǂhanusi ǁgauǁgauǂkhani-i, sats ge ǁîkha ǀkha sî-e tita ge ǁkhaeǁnâba tsî ǁnāpa xoahe hâ xūna ta nî ǃkhō-am ǃkhaisa ge ǂgan te. 18 Tita ge gao-aoba, ǂâisa nî ǂnûi-aihe xūn xa ge ǂanǂan tsîb ge īǁkhā as kōseb nî ǁnāsa dī ǃkhaisa ge ǃkhō-am. 19 Sadu ga ǂhanub ǃoagu îǂhôase ǁgausen, o ta ge ǃgoaxaǁaeb ǃnâ ǁaes di ǃgâib ǃoa ǃgâi xūna dība du ǁkhā. 20 Ti ǂnûǁkhaeba-aogu tsî sagu tsîna ta ge sa ǀkha ǀhao tsî gu nî ǂōrisase ī ge xūna ǃhoaǂam ǃkhaisa ge mîmā. 21 An hoa xūna sats ǀkha ǃgâise ǃgû re. ǀGamdisihakaǀaǁî tsēs Dioskorintiuǁkhâb dis, ǀguikaidisi tsî hakadisiǁkhaisaǀaǁî kurib ǃnâ.”
Gao-aoba xu Lisiab ǃoa hâ sîǂkhanis
22 Nēb ge gao-aob sîǂkhanis di xoaǁnâba:
“Gao-aob Antioxuba xu ǃgâsab Lisiab ǃoa, tawedes. 23 Ti îb ge elogu ǀkha nî hâse ǃgû, o ge ge ra ǁkhore, în ti gaosib di ǁanǂgāsabena ǂhanihe tamase ǁîn di sîsengu ǀkha aiǃgû. 24 Jodeǁîn ge Grike ûiǀgauga, ti îb ge ǂhâba hâ i khami ūǃoa ǂgao tama hâ, xawe ǁîn di ûiǀgaub ǀkha ǁîn di ǁnaetigu ǃoa ra aiǃgû ǂgao, tita ge ra ǁnâuǃā. 25 ǁNā-amaga ge ge nē ǁaes nî ǂkhîb ǃnâ xūhe tsî ǁîn di Tempela nî mā-oahesa ra ǁkhore tsî ra mîmā, în ǁîn aboxagu di ǁnaetigu ǃoan nî ûi ǃkhaisa mā-amhe. 26 ǁÎna toxopa nē mîǁguiba mîba tsî ǁîna ta ūba hâ khoexaǃnâsiba ǁapoǁapoba re, în ǁîn di sîsenga ǂkhîb ǃnâ dī tsî ǃaruǀî tā xū-i xare-i xa ǂâiǂhansen.”
27 Nēb ge gao-aob di sîǂkhanis Jodeǁîn ǃoa hâs di ǁgâiǁnâba:
“Gao-aob Antioxuba xu Jodeǁî ǂgaeǂgui-aogu tsî Jodeǁîn ǃoa, tawedes. 28 ǃGâise du hâ ǃkhaisa ta ge ra ǂgom. Tita ge ǃgâi ǂurusib ǃnâ hâ. 29 Menelaub ge sadu di hâǃkhais ǃoa oa tsî sadu di ǂhunuma xūna dīs di turaba du ūhâ ǃkhaisa ge ǂanǂan te. 30 ǁNā-amagan ge ǃnonadisis Santikuǁkhâb kōse nî oahāna xū-i xare-e ǃao tide. 31 ǃAruǀî du ge sadu ǂûn ǂhanugu tsî nau ǂhanugu tsîna ǀnai du gere dī ǀgaub ai nî dī tsî i ǀgui Jodeǁî-i tsîna ǀūǂamsib ǃnâ i ge dī hâ i ǂkhabadī-i ǃaroma ǁkharahe tide. 32 Sadob nî ǂgaoǂgaoǃnâga ta ge Menelauba ra sî. 33 An hoa xūna sadu ǀkha ǃgâise ǃgû. Disikoroǀaǁî tsēs, Santikuǁkhâb dis, ǀguikaidisi tsî hakadisiǁkhaisaǀaǁî kurib ǃnâ.”
Romeǁîn di sîǂkhanis Jodeǁîn ǃoa
34 Romeǁîn tsîn ge Jodeǁîna sao ra sîǂkhanisa ge xoaba:
“Kwintub Memiub tsî Titub Maniub, Romeǁîn ǂnûǁkhaeba-aokha xu Jodeǁîn ǃoa, tawedes. 35 Gao-aob di ǀaokhoeb Lisiab ge sado mān ǀkhas tsîna da ge ǂkhî. 36 Sige ge nēsi Antioxs ǃoa garu, xuige toxopa Lisiab ra gao-aob ǁga ǁgau-oa xūna ǂōrisase ôaǃnâ. ǁNās khaoǃgâ ǃhaese sige ǃeream, î ge sadu di ǃgâi dīna ǁîb aiǃâ ǂanǂan. Nēsa īǁkhā as kōse ǃnoesase dī, 37 î ge tarena du ge mîǁgui ǃkhaisa ǂan ǁkhā. 38 An hoa xūna sadu ǀkha ǃgâise ǃgû. Disikoroǀaǁî tsēs, Santikuǁkhâb dis, ǀguikaidisi tsî hakadisiǁkhaisaǀaǁî kurib ǃnâ.”
