Aleksanderi Kaib
1 Filipub Masedoniaǁîb ôab, Aleksanderi Kaib, Kitimǃhūba xu ge hāb ge gao-aob Dariub, Persiab tsî Mediab diba dans khaoǃgâ Aleksandera gao-aose ge saoǃgon. 2 ǁÎb ge ǂgui toroga ǃkham, ǀgaisa hâǃkhaide ǀhana tsî ǀkharib di gao-aoga ge ǃgam. 3 Tsîb ge ǃhūbaib di ǀkhâuǀams kōse aiǃgû tsî ǂgui ǁaede ge hîkākā. Tsî ǃhūbaibab ge dan, ob ge ǂnīsa tsî ge ǀgapiǂâixa. 4 ǁÎb ge ǀgaisa toroǂnubisa ǀhaoǀhao tsî hoaraga ǁaedi tsî ǁîdi ǂgaeǂgui-aogu tsîna ge gaoǂam, tsî ǁîna mâ-i hoa-i nî ǁgui-aimarisa matare ǃkhaisa ge ǁgari.
5 Nēn hoan khaoǃgâb ge ge ǀae tsî ǁōb ra ǃkhaisab ge hōǃâ, 6 ob ge hoaraga ǂgaeǂgui-aogu, ǁîb ǀkha ge ǂkhamsisa xu kaikhâiga ǂgaiǁare tsî noxopab a ûitsama, hîa ǁîb di gaosiba ǁîgu ǁaegu ge ǀgora. 7 Aleksanderi ge disiǀgamǀa kurigab ǂgaeǂgui hâs khaoǃgâ ǀgui ge ǁō. 8 Tsî gu ge ǁîb ǂamkhoega, mâb hoaba ǁîb ǀkhariba ge ǂgaeǂguitsoatsoa. 9 Aleksanderi di ǁōb khaoǃgâ gu ge ǁî-aitsama ge gaoǀgapasen. ǁÎgu di ôananôagub tsîn ge ǁîgu khaoǃgâ ǂgui kuriga ǁnāti gere dī tsî kai ǂkhabaxasiba ǃhūb ǃnâ ge ǃaroma.
Antioxub Epifaneb tsî ǃgâuxa ge Jodeǁîn
(2 Makabergu 4:7-17)10 ǁÎna xub ge ǂkhabusa ǂgaeǂgui-aob, Antioxub Epifaneb, gao-aob Antioxub di ôab, ǀguikaidisi tsî ǃnonadisihûǀaǁî kurib ǃnâ ge Romes ǃnâ ǃkhōsabese, Siriab di gao-ao kaib nîs aiǃâ ūhe hâ iba ge ǂoaxa.
11 ǁNā tsēdi ǃnâ gu ge ǂhanuba ǃaoǃgâ tama khoega Israelǁaesa xu ǂoaxa tsî ǂgui khoena ge ǂgaeǂhapu, mî raǃâ: “A ge ǃgû tsî sage ǂnamipe hâ Jodeǁî taman ǀkha ǃgaeǀhaosa dī, ǁîna xu da ge ǀgora, on ge ǂgui tsūǀkhāna sada hāǂam xuige.” 12 Nē ǀapes ǀkhan ge khoena ge ǂkhî 13 tsîn ge ǀnîna turaxase gao-aob ǃoa ǃgû tsî ǁîba xu Jodeǁî taman di ǁnaetigan nî sao ǃkhais di mā-amsa ge ǃkhōǃoa. 14 ǁÎn ge Jodeǁî taman di ǁnaetigu ǃoa, ǂkham khoen di ǂgamǂgamsenǃkhaiba Jerusalems ǃnâ ge kuru 15 tsî ǃgaos di saode dībē tsî ǃanu ǃgaeǀhaosa ge ǁnāxū. ǁÎn ge Jodeǁî taman ǀkha ǀhûǁare tsî ǃkharagaǃnâgu ǂkhaba xūna gere dī.
Antioxub ge Egipteba ra ǁnāǂam
16 Antioxub ge ǁîb gaosib ge mâǁapo ǃkhaisab ge mû, o Egipteb tsînab nî dan ǃkhaisa ge mîǁgui, îb ǁnā ǃhūb tsî Siriab tsîkha hoakha ǂgaeǂgui. 17 ǁNā-amagab ge ǁîba Egipteba ǀgaisa toroǂnubis, torokunidi, ǂkhoan, hātoroǃkhamaogu tsî ǂgui torodoe-omdi tsîn ǀkha ge ǁnāǂam. 18 Nē ǁnāǂams ge hā, ob ge Egipteb di gao-aob, Ptolemiba dabasen tsî ge ǃkhoeni, tsî gu ge ǂgui toroǃkhamaogu ǁîb diga ge ǃgamhe. 19 Antioxub ge Egipteb di ǀgaisa ǃāde ǁkhâuǁnâ tsî hoaraga ǃhūba ge hîkākā.
Antioxub ge Jodeǁîna ra ǃgôaǃgon
20 ǀGuikaidisi tsî hakadisiǃnonaǀaǁî kurib ǃnâ, Egiptebab ge dans khaoǃgâb ge Antioxuba kai toroǂnubis ǀkha, Israeli tsî Jerusalems tsîra ǃoa ge ǂgaekhâi. 21 ǁÎb di ǀgapiǂâixasib ǃnâb ge Tempeli ǃnâ ǂgâ tsî ǃhuniǀuri altars, kandelari tsî ǁîb di sîsenūxūn, 22 ǃKhūb di ǁguibaperen di tāb, āǃnâxapadi tsî ǃoredi, ǀaes ra khauǃnâhe ǃhuniǀuri xapadi, ǂgāmâisagu tsî krondi tsî Tempeli aisǀkhāb ai ge hâ i ǃhuniǀuri anixūn tsîn hoana ge ū. 23 ǁKhātib ge ǀhaiǀurib tsî ǃhuniǀurib, ǀgapiǀgau xapan tsî sâusase ge hâ i ǁuib, hîab ge hōb tsîna ū 24 tsî ǁîn hoana ǁîb di ǂhunuma ǃhūb ǃoa ge ǃgû-ū. ǁKhātib ge ǂgui khoena ǃgam tsî nēs xa ǀgapiǂâixase gere koasen. 25 Hoaraga Israeli ǃnâb ge kai ǃoaba ge hâ i.
26 Gao-aogu tsî ǂgaeǂgui-aogu ge tsûaǂgaob xa gere ǃgae.
ǂKham khoegu tsî ǂkham khoedi ge ge ǂkhabu.
Khoedi di îsasib ge ge ǀnoro.
27 Mâ ǃgame-aob hoab ge ǃoatsana-e gere ǁnae,
mâ ǃgame-aos hoas ge ǃoa rase, ǁîs ǃnā-oms ǃnâ ge ǂnôa i.
28 Sida khoen hoan ge taob ǀkha ge anasen hâ i,
tsîb ge sida ǃhūba, ǁîn ǃaroma ge ǀkhū.
29 ǀGam kurikha khaoǃgâb ge Antioxuba, mariǃkhōǃoa-ao-e kai toroǂnubisa Misiasa xu Judeab di ǃādi ǃoa ge sî. Tsî toroǃkhamaogu ge Jerusalems ǃnâ ǂgâ, 30 ob ge ǂgaeǂgui-aoba, gāxaǃnâ ǀgaub ai ǂkhîǂkhîsa mîdi ǀkha khoen ǀkha gere ǃhoa tsîn ge ge ǂgom bi, xaweb ge ǃnapetamase ǃāsa ǁnāǂam, hîkākā tsî ǂgui Israelǁîna ge ǃgam. 31 ǁÎb ge ǃāsa hîkākā, ǀaes ǀkha khauǃkhū tsî omdi tsî ǂnubiǂgoagu tsîna ge khôaǁnâ. 32 ǁÎb tsî ǁîb di toroǂnubis tsîn ge khoedi tsî ǀgôan tsîna ǃkhōsis ǃnâ ū tsî ûitsama xūna ge ǁkhâuǁnâ.
33 Antioxub tsî ǁîb di toroǃkhamaogu tsîgu ge Tempeli di ǀapasǀkhāb ǃnâ ǁgoe ǃkhaiba, ǀgapi ǂnubiǂgoab ǀkha omǂnami, ǀgaisa ǂgō-omga ǁîb ai om tsî ǁîba toroǃkhamaogu hâǃkhaib ase ge dī. 34 Tsî ǁnāpa ǁorexa tsî ǂhanuoǃnâ khoena ge hâ kai. 35 ǁÎgu ge ǁkhāti ǁâtanin, ǂûn tsî Jerusalems ǃnâ gu ge ǁkhâuǁnâ xūn tsîna ǁnāpa ge sâu tsî ǁnā ǀgaus ai ǃāsa kai ǃaorosasiba ge ǃkhōǂgāba.
36 Toro-ommi ge Tempela ǁnoase ge iba,
ǀamo ǂkhabasib ase Israelǁaesa.
37 ǀHapio khoen ge altars ǂnamipe ge ǃgamhe,
ǃAnu ǃKhaib ge ǃgamaogu xa ge ǀuriǀurihe.
38 Jerusalems khoen ge ǃaob xa ge ǃkhoeni
tsîs ge ǃāsa ge ǃhaokhoen di hâǃkhai kai.
Jerusalems ge ǁîs di ǂhunuma khoen,
ǁîsa xu ge ǁgaribēhena, ǃhaoǃāse ge iba.
39 ǁÎs di Tempeli ge ǃgaroǃhūb khami ge ǀkhaiǃnâ;
ǁîs di ǁâudīgu ge ǃoab di tsēdi ǃnâ ge dabahe,
ǁîs Sabbattsēs di ǃgâiaǂgaoba, taosib ǃnâ.
ǁÎs di ǃgôasib ge ge ǃhōxū kai.
40 ǁÎs di taosib ge aibekam ǂkhaisib âs ǀkha ge ǀguitikō,
tsî ǁîs di ǂnīsasib ge ǃoab ǃnâ ge ǀkharaǀkharahe.
41-43 Gao-aob Antioxub ge ǁîb di gaosib ǃnâ hâ ǃhaodi hoadi nî ǁîdi ǃhaoǃnāsi ǁnaetiga mîǁnâ, tsîs ǁîb di gaosib ǃnâ ǀgui ǁaes ǀguisa nî hâ ǃkhaisa ge mîmā. Hoa Jodeǁî taman ge nē ǃkhaisa ge ūǃoa. ǂGuin Israelǁîn din tsîn ge nēsa ūǃoa tsî ǀūben di ǂgomsa ǁîxūdībasen, ǁgôa-elona ǁguibade dība tsî Sabbattsēsa ǃaruǀî ǃgôa tama ge i.
44 Gao-aob ge ǁkhāti sîsabega sîǂkhanidi ǀkha Jerusalems tsî hoaraga ǃādi Judeab didi ǃoa ge sî, în ǃhūb ǃnâ ge ǃhao i ǁnaetiga sao. 45 ǁÎb ge khauǁguibadi, ǃhoroǁguibadi, tamas ka io ǂauxûiǁguibadi tsîn Tempeli ǃnâ nî dīhesa ge ǂkhā, tsî Sabbattsēdi tsî ǁâudītsēdi nî ǁnaetisa sîsentsēdi ase sîsenūhesa ge mîmā. 46 ǁÎn ge ǁkhāti Tempeli tsî ǁîb ǃnâ hâ ǃanu xūn tsî pristerga ǀuriǀuri, 47 ǀūben altardi tsî ǀgoreǀîǃkhaiga ǂnubi, tsîn hāgūn tsî ǀnî ǃanuoǃnâ ǀgurun tsî xamarina nî ǁguiba ǃkhais tsîna ge mîmāhe. 48 ǁÎn ge ǁîn ôaga ǃgaosa ǂkhāhe tsî mâ ǀgaub hoab ain nî ǁkhān as kōse ǃanuoǃnâ kaisen ǃkhaisa ge ǂgaoǀkhāhe, 49 în ǃKhūb ge Moseb ǃnâ-ū mā ǂhanuba ǀuru tsî ǁîb di mîmādi hoade ǁnâuǀnamoǃnâ. 50 Gao-aob di mîmāsa ga ǁnâuǀnamoǃnâ-i di ǁkharab ge ge ǁō i.
51 Nēti ī mîdi ǃnâb ge hoaraga gaosib âb ǃoa ge xoa. ǁÎb ge hoaraga khoen ǂama kōǃgâ-aoga ge ǁgaumâi tsî ǃādi Judab dide ge mîmā, în ǁguibade ǃāsa xu ǃās ǁga dī. 52 ǂGui khoen hîa ge ǂhanuba mîǁnân ge ǁîga ge sao tsî ǂkhababa ǃhūb ǃnâ ge dī 53 tsî ǁnā ǀgaub ǀkha Israelǁîna gau ǁkhān a ǃkhain hoan ai gere gau kai.
54 Disikoroǀaǁî tsēs Kislef dis ai, ǀguikaidisi tsî hakadisikoroǀaǁî kurib ǃnâb ge gao-aob Antioxuba ǃhuriǃhurisa ǃgôaoǃnâsiba Tempeli di altars ai mâi, tsî ǀūben altarde Judeab ǃnâ hâ ǃādi hoadi ǃnâ ge ǂnubi. 55 ǀŪben di ǁguibadi ge omdi ais ai tsî ǃgangu ǃnâ gere dīhe. 56 ǂHanub di ǂkhanin hîa gu ge hōna gu ge doaǃā tsî ge ǂhubiǂui. 57 Khoe-i hîa ga ǃgaeǀhaos ǂkhanisa ūhâse hōhe tamas ka io ga ǂhanuba ǁnâuǀnam-i hoa-i ge gao-aob di mîmās ǃoa ǁōb ǃoa gere ǀgoraǃgâhe. 58 ǁKhâba xu ǁkhâb ǁga gu ge nē ǂkhaba khoega ǁîgu di ǀgaiba Israelǁîn ǃoagu sîsenū tsî ǁîna ǃādi ǃnâ ǃkhōsis ǃnâ gere ū.
59 ǀGamdisikoroǀaǁî tsēs ǁkhâb dis ai gu ge ǁkhā ǂkhaba khoega ǁguibade ǀūben altars, khauǁguiba altars ǀgapise ge ǂnubihe hâ is, ai gere ǁguiba. 60 ǁGûdi hîa ǁîdi ôaroga ge ǃgao kaidi, 61 ǁîdi ǀgūkhoen tsî ǁnān hîa ge ǀgôaga ǃgaon ge gao-aob di mîmās ǃoa ge ǃgamhe, tsî gu ge ǀgôaroga ǁîgu ǃaogu ai gere ǂgāmâihe. 62 Xawe ǂgui Israelǁîn ge gao-aob di mîmāsa ǀgaisase ge mâǃoa, tsî ǃanuoǃnâ ǂû-e ǂû ǂgao tama ge i. 63 ǁÎn ge ǂû-i xan nî ǃanuoǃnâ kaihe tamas ka ion ǃanu ǃgaeǀhaosa nî khôas ǃās ǃnân nî ǁō ǃkhaisa ǁhûi tsî ge ǁō. 64 ǁÎb di ǁaib ǃnâb ge Eloba Israelǁaesa ǃgomse ge tsâ kai.
