Ragueli di oms tawa
1 Tobiab tsî Rafaeli tsîkha ge Ekbatanasa ǃnâ sī ǂgâ, ob ge Tobiaba ge mî: “Asaria, ti horesatse, ī ǁkhā i as kōse ǃhaese Ragueli tawa sī-ū te.” Ob ge ǀhomǃgāba ǁîba, Ragueli oms tawa, dao-ams tawab Raguela ǂnôa hîa ge sī-ū. Rafaeli tsî Tobiab tsîkha ge ǁîba ǂguro ge tawede. Ob ge “Ti horesakho-e ǂgâxa re. Ti oms ǃnâ ǁkhoreǁharehe hâse tsâsen re” ti ge mî.
Tsîb ge Raguela ǁîb di oms ǃnâ ǂgâ-ū kha 2 tsî ǁîb taras Ednas ǃoa ge mî: “Nē ǂkham khoeba kha ti ǁnurib Tobiti khami ī tamab hâ?”
3 Os ge Ednasa: “Mâpa xu kho ra hā, ti ǃgâsakho?” ti ge dî kha. O kha ge ǁîkha ge ǃeream: “Sikhom ge Naftalib ǃhaosa xu hâ Israelǁîkhomma, xawe khom ge nēsi ǃkhōsabese Asiriab ǃnâ, Nineves ǃnâ ǁan hâ.”
4 Os ge Ednasa ge mî: “Sim di ǁnuriǃgâsab, Tobita ǂan kho a?”
“Sikhom ge a ǂan bi” ti kha ge ge ǃeream.
“ǂUrub a?” tis ge ge dî.
5 “ǁÎb ge a ûitsama tsî ǃgâi ǂurusib ǃnâ hâ” ti kha ge ge ǃeream.
Ob ge Tobiaba “Tobiti ge ti îba” ti ge ǀaro. 6 Ob ge Raguela ǃgâiaǂgaob xa ǁgamrogu xa ǀoa hâ mûra ǀkha urikhâi tsî Tobiaba ge ǁnam. 7 Tsîb ge ge mî: “Ab Eloba ǀkhae tsi, ti ôatse. Sa îb ge ǃgôaǃgôasa tsî ǃgâi aoba. Tarebe ǃhuriǃhurisa, ǃaoǃaosasiba ǁnā ǂhanu-ai tsî māǂgaoxa khoeb nî ǁîb di mûǁkhāsiba ǂoaǃnâ hâ isa!” Ragueli ge Tobiaba ǁnam tsî ǁîb ǃhōs ai gere ā. 8 ǁÎb taras Ednas tsî ôasas Saras tsîn ge ǁkhāti Tobita ge āba.
Ragueli ge Tobiab tsî Rafaeli tsîkha ǃgâise ǁkhoreǁhare tsî sîsenaon nî ǂûna aiǂhomise ǁîb baigu di ǀguiba ge ǂā. Sari-aokha ǁānǃomtoa tsî ǂû kha nîse nî ǂnûs aiǃâb ge Tobiaba, Rafaeli ǂgaes ǃnâ “Asaria, ti horesatse Raguela nēsi ǂgan, îb mā-am te î ta Saras ǀkha ǃgame” ti ge tuwu.
9 Xaweb ge Raguela dîsa ǃgâǁnâ tsî Tobiab ǃoa ge mî: 10 “Ā, ǂû îts nēǃoe ǃgâiaǂgao. Sats ge Saras ǀkha ǃgames ǂhanuba ūhâ, sats a ti ǀgū ǀaokhoe amaga tsî ta ge ǀnî khoe-i xare-e ǁîsa ǃgamesa mā-am tide. Xawe ta ge amaba Saras xa nî mîba tsi, ti ôatse. 11 Tita ge ǁîsa ǀnai hû aogu, ǁîgu tsîn a ǀaokhoega ǁîs ǀkha gu nî ǃgamese ge mā hâ i. Mâ hoab ge ǂguro ǃoes ǃgameb dis ai, ǁomǃnâǃnā-oms ǃnâb ra ǂgâ hîa gere ǁō. Xawe nēsi ti ôatse, ǂû î ā re. ǃKhūb saro hoaro nî sâu xuige.”
Ob ge Tobiaba “Tita ge Sarasats tarase nî mā te ǃkhaisats mîmâiba te tama hîa ǂû tsî ā tide” ti ge ǃeream.
12 Ragueli ge ge ǃkhō-am: “Amase, tita ge ǁîsa Moseb ǂhanub ra mîmā khami satsa nî mā. Elob ǀhommi ǃnâ hâb ge nē ǃgameba go aiǂhomi, xuige ǁîsa sa tarase ū re. Nēsisa xu ro ge saro a ǀgui. Tsîs ge Sarasa nētsē tsî ǀamos kōse a sa. Ab Elob ǀhommi diba saro hoaro nēǃoe sâu re. Ab saro ǀkhomxa tsî ǃgâiǀî.”
ǃGameb di xoaǁguisa dīǀgaub
13 Ob ge Raguela ǀgôas âba ǂgaiǂgâxa, ǃommi ai ǃkhō tsî Tobiaba sao ra ǀkhaemîdi ǀkha ge mā: “Moseb ǂhanub ǁkhāǁkhādi ǃoa sa taras ase ǁîsa ū, î ǃnorasase sa îb di ǁgâusa ǃoa ǃgû-ū. Ab ǀhommi di Eloba ǃgâiǃgâxa ûiba mā ro.”
14 Ragueli ge ǁîb taras tawa, ǃgaeǁares mîmâisab nî xoa-aise, xoaǃnâsa tama ǂkhani-e ge ǂgan. Ednas ge nē ǂkhani-e hā-ū, ob ge Raguela Saras ge Tobiaba tarase Moseb ǂhanub di ǁkhāǁkhādi ǃoa māhe, ti ra mî mîǀguisa ge xoa. 15 Xoaǁguisa dīǀgaub ge toas khaoǃgâs ge ǂûsa ge tsoatsoa.
16 Ragueli ge ǁîb tarasa ǂgai tsî “Ti ǀnamsase, ǀnî ǃnā-om-e Sarasa ǂhomiba, î ǁnāpa sī-ū si” ti ge mî.
17 Ednas ge Ragueli ge mî khami kharoba ǂhomi tsî Sarasa ǃnā-oms ǃnâ ge ǂgâ-ū, os ge Sarasa ge ātsoatsoa. Xawes ge Ednasa, Saras ǁgamroga ǀom tsî ǁîs ǃoa ge mî: 18 “Sarase, tā ǂâiǂhansen re. Tita ge ra ǂgom ǃKhūb ǀhommi dib nî sasa ǂkhî kai tsîb ǃoa kai si tidesa, xuige dâ re ti ôase.” ǁNāti mî tsîs ge Ednasa ǃnā-omsa xu ge ǂoa.
Ragueli di oms tawa
1 Tobiab tsî Rafaeli tsîkha ge Ekbatanasa ǃnâ sī ǂgâ, ob ge Tobiaba ge mî: “Asaria, ti horesatse, ī ǁkhā i as kōse ǃhaese Ragueli tawa sī-ū te.” Ob ge ǀhomǃgāba ǁîba, Ragueli oms tawa, dao-ams tawab Raguela ǂnôa hîa ge sī-ū. Rafaeli tsî Tobiab tsîkha ge ǁîba ǂguro ge tawede. Ob ge “Ti horesakho-e ǂgâxa re. Ti oms ǃnâ ǁkhoreǁharehe hâse tsâsen re” ti ge mî.
Tsîb ge Raguela ǁîb di oms ǃnâ ǂgâ-ū kha 2 tsî ǁîb taras Ednas ǃoa ge mî: “Nē ǂkham khoeba kha ti ǁnurib Tobiti khami ī tamab hâ?”
3 Os ge Ednasa: “Mâpa xu kho ra hā, ti ǃgâsakho?” ti ge dî kha. O kha ge ǁîkha ge ǃeream: “Sikhom ge Naftalib ǃhaosa xu hâ Israelǁîkhomma, xawe khom ge nēsi ǃkhōsabese Asiriab ǃnâ, Nineves ǃnâ ǁan hâ.”
4 Os ge Ednasa ge mî: “Sim di ǁnuriǃgâsab, Tobita ǂan kho a?”
“Sikhom ge a ǂan bi” ti kha ge ge ǃeream.
“ǂUrub a?” tis ge ge dî.
5 “ǁÎb ge a ûitsama tsî ǃgâi ǂurusib ǃnâ hâ” ti kha ge ge ǃeream.
Ob ge Tobiaba “Tobiti ge ti îba” ti ge ǀaro. 6 Ob ge Raguela ǃgâiaǂgaob xa ǁgamrogu xa ǀoa hâ mûra ǀkha urikhâi tsî Tobiaba ge ǁnam. 7 Tsîb ge ge mî: “Ab Eloba ǀkhae tsi, ti ôatse. Sa îb ge ǃgôaǃgôasa tsî ǃgâi aoba. Tarebe ǃhuriǃhurisa, ǃaoǃaosasiba ǁnā ǂhanu-ai tsî māǂgaoxa khoeb nî ǁîb di mûǁkhāsiba ǂoaǃnâ hâ isa!” Ragueli ge Tobiaba ǁnam tsî ǁîb ǃhōs ai gere ā. 8 ǁÎb taras Ednas tsî ôasas Saras tsîn ge ǁkhāti Tobita ge āba.
Ragueli ge Tobiab tsî Rafaeli tsîkha ǃgâise ǁkhoreǁhare tsî sîsenaon nî ǂûna aiǂhomise ǁîb baigu di ǀguiba ge ǂā. Sari-aokha ǁānǃomtoa tsî ǂû kha nîse nî ǂnûs aiǃâb ge Tobiaba, Rafaeli ǂgaes ǃnâ “Asaria, ti horesatse Raguela nēsi ǂgan, îb mā-am te î ta Saras ǀkha ǃgame” ti ge tuwu.
9 Xaweb ge Raguela dîsa ǃgâǁnâ tsî Tobiab ǃoa ge mî: 10 “Ā, ǂû îts nēǃoe ǃgâiaǂgao. Sats ge Saras ǀkha ǃgames ǂhanuba ūhâ, sats a ti ǀgū ǀaokhoe amaga tsî ta ge ǀnî khoe-i xare-e ǁîsa ǃgamesa mā-am tide. Xawe ta ge amaba Saras xa nî mîba tsi, ti ôatse. 11 Tita ge ǁîsa ǀnai hû aogu, ǁîgu tsîn a ǀaokhoega ǁîs ǀkha gu nî ǃgamese ge mā hâ i. Mâ hoab ge ǂguro ǃoes ǃgameb dis ai, ǁomǃnâǃnā-oms ǃnâb ra ǂgâ hîa gere ǁō. Xawe nēsi ti ôatse, ǂû î ā re. ǃKhūb saro hoaro nî sâu xuige.”
Ob ge Tobiaba “Tita ge Sarasats tarase nî mā te ǃkhaisats mîmâiba te tama hîa ǂû tsî ā tide” ti ge ǃeream.
12 Ragueli ge ge ǃkhō-am: “Amase, tita ge ǁîsa Moseb ǂhanub ra mîmā khami satsa nî mā. Elob ǀhommi ǃnâ hâb ge nē ǃgameba go aiǂhomi, xuige ǁîsa sa tarase ū re. Nēsisa xu ro ge saro a ǀgui. Tsîs ge Sarasa nētsē tsî ǀamos kōse a sa. Ab Elob ǀhommi diba saro hoaro nēǃoe sâu re. Ab saro ǀkhomxa tsî ǃgâiǀî.”
ǃGameb di xoaǁguisa dīǀgaub
13 Ob ge Raguela ǀgôas âba ǂgaiǂgâxa, ǃommi ai ǃkhō tsî Tobiaba sao ra ǀkhaemîdi ǀkha ge mā: “Moseb ǂhanub ǁkhāǁkhādi ǃoa sa taras ase ǁîsa ū, î ǃnorasase sa îb di ǁgâusa ǃoa ǃgû-ū. Ab ǀhommi di Eloba ǃgâiǃgâxa ûiba mā ro.”
14 Ragueli ge ǁîb taras tawa, ǃgaeǁares mîmâisab nî xoa-aise, xoaǃnâsa tama ǂkhani-e ge ǂgan. Ednas ge nē ǂkhani-e hā-ū, ob ge Raguela Saras ge Tobiaba tarase Moseb ǂhanub di ǁkhāǁkhādi ǃoa māhe, ti ra mî mîǀguisa ge xoa. 15 Xoaǁguisa dīǀgaub ge toas khaoǃgâs ge ǂûsa ge tsoatsoa.
16 Ragueli ge ǁîb tarasa ǂgai tsî “Ti ǀnamsase, ǀnî ǃnā-om-e Sarasa ǂhomiba, î ǁnāpa sī-ū si” ti ge mî.
17 Ednas ge Ragueli ge mî khami kharoba ǂhomi tsî Sarasa ǃnā-oms ǃnâ ge ǂgâ-ū, os ge Sarasa ge ātsoatsoa. Xawes ge Ednasa, Saras ǁgamroga ǀom tsî ǁîs ǃoa ge mî: 18 “Sarase, tā ǂâiǂhansen re. Tita ge ra ǂgom ǃKhūb ǀhommi dib nî sasa ǂkhî kai tsîb ǃoa kai si tidesa, xuige dâ re ti ôase.” ǁNāti mî tsîs ge Ednasa ǃnā-omsa xu ge ǂoa.
