1 Saulub ge ǁnān Stefanub di ǃgamsa ge ǀoasase gere ǃkhōǃgân di ǀgui ge i.
Saulub ge ǂgomsabena ra ǃgôaǃgon
ǁNā tsēs ais ge kai ǃgôaǃgonsa ge tsoatsoa Jerusalems kerkheb ǃoagu tsîn ge hoaraga ǂgomsabena ge ǀgaruǀgaruhe tsî Judeab tsî Samariab* ǁga ge ǃhū, apostelgu* ǀguigu ose. 2 Tsî gu ge ǀnî eloǃaoǃgâxa khoega Stefanuba sī ge ǁkhō tsî gu ge ǁîb ǂama kaise ǃoa tsî ge ā. 3 Tsîb ge Sauluba hoaraga kerkheba gere hîkākā ǂgao. ǁÎb ge omsa xu oms ǁga ǃgû tsî aogu tsî taradi tsîna omdi âna xu ūǂui tsî ǃkhō-oms ǃnâ gere aoǂgā.
Filipub ge ǃGâiǂhôasa Samariab ǃnâ ra aoǁnâ
4 Xawen ge nē ǂgomsaben Jerusalemsa xu ge ǀgaruǀgaruhena ǃGâiǂhôasa aoǁnâsa ge ǀû tama hâ i. 5 Ob ge Filipuba Samariab ǃnâ ǂnôa ǃās ǁga ǃgû tsî ǁnāpa sī khoena Xristub* xa gere aoǁnâba. 6 ǁÎn ge kaise ǂōrisase tare-eb Filipuba ra mî ǃkhaisa ǃgâ tsî saodi hîab gere dīde gere mû. 7 ǁÎb ge ǂgui ǃanuoǃnâ gagagu ǃau rase ǁîn gao hâ khoena xu gere ǂoana, ǁîna xu gere ǃhaeǂui. ǁKhātin ge ǂgui ǃhom hân tsî ǃhorana ge ǂgauǂgauhe. 8 Tsîn ge nē ǃās di khoena kaise gere ǃgâiaǂgao.
9 Tsîb ge Samariab ǃnâ Simon ti ǀon hâ khoeba ge hâ i. ǁÎb ge ǁîb di ǃgaidīs di sîsengu ǀkha Samariaǁîna gere burugâ kai, ǁkhātib gere ǁîb di ǂoaǂamsasib xa kaise koasen xui-ao. 10 Tsîn ge hoa ûiǃnôagu tsî ǃharode xu hâ Samariaǁîna Simonna kaise ǂōrisase gere ǃgâ tsîn ge “Nēb ge Elob di ǀgaiba tsîb ge ‘Kai ǀGaib’ ti a ǂansa” ti gere mî. 11 Kaiseb ge ǁîba ǁnā ǃgaidīs ǃnâ-u ǁîb di sîsenni xa buru tsî ge ǂomxa ǁaeba ǁîba gere sao khoena ge ūhâ i. 12 Xawen ge ǁîna Filipub di aoǁnâs ǃGâiǂhôas Elob Gaosib dis tsî Jesub Xristub di ǀons xa ra ǃgûsa ǁnâu tsî ge ǂgom, tsîn ge ǂguin âna ge ǁāǁnâhe. 13 Tsîb ge Simonni ona ǂgom tsî ge ǁāǁnâhe. Tsîb ge ǁîba Filipuba gere saoma tsîb ge kaise Filipub gere dī saodi tsî kai buruxa dīn xa gere burugâ.
14 Tsî noxopa gu Jerusalems ǃnâ hâ hîa gu ge apostelga Samariab khoen go Elob di mîsa ǃkhōǃoa ǃkhaisa ge ǁnâu, o gu ge Petrub tsî Johaneb tsîkha ǁnāǀî ge sî. 15 Tsî sī kha ge o kha ge ǂgomsabena ge ǀgorebatsoatsoa ǃAnu Gagaban nî ǃkhōǃoase. 16 ǃAnu Gagab ge noxopa ǁîn ai ge hā tama hâ i, ǁîn ge ǃKhūb Jesub di ǀons ǃnâ ǀgui ǁāǁnâhe hâ i xui-ao. 17 O kha ge Petrub tsî Johaneb tsîkha ǁîna ǃomga ge ǁgui-ai tsîn ge ǁnātimîsi ǃAnu Gagaba ge ǃkhōǃoa.
18 Tsî ǃomgu di ǁgui-ais ǀkhan ge khoena ǃAnu Gagaba māhe ǃkhaisab ge mû, ob ge Simonna nē apostelkha ai mari-i ǀkha nē ǁkhāsiba gere ǁama ǂgao. 19 Tsîb ge “Tita tsîna nē ǁkhāsiba mā re, în ǃomma ta ga ǁgui-ai khoena ǃAnu Gagaba ǃkhōǃoa ǁkhā!” ti ge mî.
20 Ob ge Petruba Simonna ge ǃeream: “Satsa Elob di mās mari-i ǀkha ǁamahe ǁkhā ti ra ǂâi? O satsa sa mari-i hoa-i ǀkha kāǁō! 21 Nēs ǃnâts kom satsa amǃnâ-e ūhâ ǁoao, sa ǂgaob Elob aiǃâ ǂhanu tama hâ xui-ao. 22 ǁNā-amaga ǃhobasen sa tsū tsî a ǂkhaba daoga xu, îts ǃKhūb ǃoa ǀgore. ǀNîsib kom ǁîba satsa sa ǂkhaba ǂgaoba nî ǀûbao, 23 mû ta ra xui-ao, surib di ǃgāxasib tsî ǁoreb di khobosis ǃnâts satsa hâsa.”
24 Ob ge Simonna ge mî: “O ǁnâi ǃKhūb ǃoa ǀgoreba te re, în nē ǁkhōǁkhōsa xūn sakho go mîna tā tita ǀkha ī.”
25 ǁÎkha di ǃkhō-amdi tsî ǃKhūb mîsa aoǁnâs ǀkha kha ge toa, o kha ge Petrub tsî Johaneb tsîkha Jerusalems ǁga ge oa. Xawe kha ge garu kha a daob ǃnâ ǂgui ǃarodi Samariab didi ǃnâ ǃGâiǂhôasa gere aoǁnâ.
Filipub ge Etopiab di ǂhanuǁîb ǀkha ra ǀhao
26 Tsî i ge ǃKhūb di ǀhomǃgā-e Filipub ǃoa ge mî: “Khâi îts ǃkhawagasǀkhāb ǁga ǃgû, Jerusalemsa xu Gasas ǁga garu ǃū-aisa daob ǃoa.” (Nē daob ge nēsi ǃaruǀî sîsenūhe tama hâ.) 27 Tsîb ge mîmāheb ge khami khâi tsî ge ǃgû tsîb ge Etopiab di ǂhanuǁîb, Etiopiab di gao-aos Kandakes di marimûǂamaob ǀkha ge ǀhao. ǁÎb ge ǀgoreǀîb nîse Jerusalems ǁga ge ǃgû hâ i, 28 tsî ǁaruǃgoaxab a daob aib ge kunis ǃnâ kēbo-aob Jesajab di ǂkhanisa xu gere khomai. 29 Ob ge Filipuba ǃAnu Gagab xa ge mîbahe: “ǃGûsī îts ǁnā kunis xōǀkhā sī ǃgû.” 30 Tsî nēsab ge ǁnâu, ob ge Filipuba kunis tawa ǃkhoesī tsî kēbo-aob Jesajab di ǂkhanisa xub ra nē ǂammâisaba khomai ǃkhaisa ge ǁnâu. Ob ge “Nēts ra khomai xūna ǁnâuǃāts ra?” ti ge dî bi.
31 Ob ge “Mâti ta kha nî ǁnâuǃā ǁguiǃāba te nî khoe-i a ǀkhai hîa?” ti ǃeream tsî ge ǁkhau bi, kunis ai ǂoa tsîb ǁîb tawa nî ǂnû ǃkhaisa. 32 ǁÎb ge sao ra khomaiǃâs Xoas disa gere khomai:
“ǁKhao-i khamib ge ǂāheb nîse ǂgaeǂguihe,
tsî gū-i ǂkhomaob â-i aiǃâ a ǃgome-i ǁkhā-i
khamib ge ams âba khowa tama ge i.
33 ǁÎb di ǁauǃgôahes ǃnâs ge
ǀgoraǃgâs âba ǁîba xu ge ūbēhe.
Tsî tari-e kha ûiǁaeb âba gowaǂui ǁkhā?
Ûitsaman di ǃhūba xub ge ūbēhe xui-ao.”
34 Ob ge nē ǂammâisaba Filipuba ge dî: “Ob kha kēbo-aob Jesajaba ǁîb xa tamas ka io ǀnî khoe-i xa nēpa gere ǃhoa?” 35 Ob ge Filipuba ǁîba ǁkhā Xoas ǀkha tsoatsoa tsî ǀnî xoaǃâdi tsîna ra sîsenūse Jesub di ǃGâiǂhôas xa ge ǃhoabatsoatsoa. 36 Tsî ganupe kha kunis ǃnâ ǃnari garu hîa kha ge ǁgam-i tawa sī ob ge nē ǂammâisaba Filipub ǃoa “Kō, nē-i kom ǁgam-e hâo, tare-i ǃaroma ta kha ǁāǁnâ kaisen ǁoa?” ti ge dî. [37 Ob ge Filipuba “A, ǁāǁnâhe ǁkhāts ge a, sa ǂgaob hoab ǀkhats ga ǂgomo” ti ge ǃeream bi. Tsîb ge nē ǂammâisaba “Tita ge ra ǂgom Jesub Xristub a Elob Ôa ǃkhaisa” ti ge ǃeream.] 38 Tsîb ge kunis nî ǂgaemâihe ǃkhaisa ge mîmā tsî kha ge ǁgammi ǁga ge ǁgôa tsîb ge Filipuba ge ǁāǁnâ bi.
39 Tsî ǁgamma xu kha ge ǂoaxa ob ge Filipuba ǃKhūb di Gagab xa ge ūbēhe tsîb ge nē ǂammâisaba ǁkhawa mû bi tama ge i. Xaweb ge ǁîb daoba ge ǃaruǀî ǃgû, ǂgaob âb ǃnâ ra ǃgâiaǂgaose. 40 Ob ge Filipuba Asotus ǃnâ ge ǀhao-ūhe. Tsîb ge ǁkhāti Kaesareas tawab nî sīs kōse, ǁaegu ǂnôa ǃādi hoadi ǃnâ ǃGâiǂhôasa gere aoǁnâ.
1 Saulub ge ǁnān Stefanub di ǃgamsa ge ǀoasase gere ǃkhōǃgân di ǀgui ge i.
Saulub ge ǂgomsabena ra ǃgôaǃgon
ǁNā tsēs ais ge kai ǃgôaǃgonsa ge tsoatsoa Jerusalems kerkheb ǃoagu tsîn ge hoaraga ǂgomsabena ge ǀgaruǀgaruhe tsî Judeab tsî Samariab* ǁga ge ǃhū, apostelgu* ǀguigu ose. 2 Tsî gu ge ǀnî eloǃaoǃgâxa khoega Stefanuba sī ge ǁkhō tsî gu ge ǁîb ǂama kaise ǃoa tsî ge ā. 3 Tsîb ge Sauluba hoaraga kerkheba gere hîkākā ǂgao. ǁÎb ge omsa xu oms ǁga ǃgû tsî aogu tsî taradi tsîna omdi âna xu ūǂui tsî ǃkhō-oms ǃnâ gere aoǂgā.
Filipub ge ǃGâiǂhôasa Samariab ǃnâ ra aoǁnâ
4 Xawen ge nē ǂgomsaben Jerusalemsa xu ge ǀgaruǀgaruhena ǃGâiǂhôasa aoǁnâsa ge ǀû tama hâ i. 5 Ob ge Filipuba Samariab ǃnâ ǂnôa ǃās ǁga ǃgû tsî ǁnāpa sī khoena Xristub* xa gere aoǁnâba. 6 ǁÎn ge kaise ǂōrisase tare-eb Filipuba ra mî ǃkhaisa ǃgâ tsî saodi hîab gere dīde gere mû. 7 ǁÎb ge ǂgui ǃanuoǃnâ gagagu ǃau rase ǁîn gao hâ khoena xu gere ǂoana, ǁîna xu gere ǃhaeǂui. ǁKhātin ge ǂgui ǃhom hân tsî ǃhorana ge ǂgauǂgauhe. 8 Tsîn ge nē ǃās di khoena kaise gere ǃgâiaǂgao.
9 Tsîb ge Samariab ǃnâ Simon ti ǀon hâ khoeba ge hâ i. ǁÎb ge ǁîb di ǃgaidīs di sîsengu ǀkha Samariaǁîna gere burugâ kai, ǁkhātib gere ǁîb di ǂoaǂamsasib xa kaise koasen xui-ao. 10 Tsîn ge hoa ûiǃnôagu tsî ǃharode xu hâ Samariaǁîna Simonna kaise ǂōrisase gere ǃgâ tsîn ge “Nēb ge Elob di ǀgaiba tsîb ge ‘Kai ǀGaib’ ti a ǂansa” ti gere mî. 11 Kaiseb ge ǁîba ǁnā ǃgaidīs ǃnâ-u ǁîb di sîsenni xa buru tsî ge ǂomxa ǁaeba ǁîba gere sao khoena ge ūhâ i. 12 Xawen ge ǁîna Filipub di aoǁnâs ǃGâiǂhôas Elob Gaosib dis tsî Jesub Xristub di ǀons xa ra ǃgûsa ǁnâu tsî ge ǂgom, tsîn ge ǂguin âna ge ǁāǁnâhe. 13 Tsîb ge Simonni ona ǂgom tsî ge ǁāǁnâhe. Tsîb ge ǁîba Filipuba gere saoma tsîb ge kaise Filipub gere dī saodi tsî kai buruxa dīn xa gere burugâ.
14 Tsî noxopa gu Jerusalems ǃnâ hâ hîa gu ge apostelga Samariab khoen go Elob di mîsa ǃkhōǃoa ǃkhaisa ge ǁnâu, o gu ge Petrub tsî Johaneb tsîkha ǁnāǀî ge sî. 15 Tsî sī kha ge o kha ge ǂgomsabena ge ǀgorebatsoatsoa ǃAnu Gagaban nî ǃkhōǃoase. 16 ǃAnu Gagab ge noxopa ǁîn ai ge hā tama hâ i, ǁîn ge ǃKhūb Jesub di ǀons ǃnâ ǀgui ǁāǁnâhe hâ i xui-ao. 17 O kha ge Petrub tsî Johaneb tsîkha ǁîna ǃomga ge ǁgui-ai tsîn ge ǁnātimîsi ǃAnu Gagaba ge ǃkhōǃoa.
18 Tsî ǃomgu di ǁgui-ais ǀkhan ge khoena ǃAnu Gagaba māhe ǃkhaisab ge mû, ob ge Simonna nē apostelkha ai mari-i ǀkha nē ǁkhāsiba gere ǁama ǂgao. 19 Tsîb ge “Tita tsîna nē ǁkhāsiba mā re, în ǃomma ta ga ǁgui-ai khoena ǃAnu Gagaba ǃkhōǃoa ǁkhā!” ti ge mî.
20 Ob ge Petruba Simonna ge ǃeream: “Satsa Elob di mās mari-i ǀkha ǁamahe ǁkhā ti ra ǂâi? O satsa sa mari-i hoa-i ǀkha kāǁō! 21 Nēs ǃnâts kom satsa amǃnâ-e ūhâ ǁoao, sa ǂgaob Elob aiǃâ ǂhanu tama hâ xui-ao. 22 ǁNā-amaga ǃhobasen sa tsū tsî a ǂkhaba daoga xu, îts ǃKhūb ǃoa ǀgore. ǀNîsib kom ǁîba satsa sa ǂkhaba ǂgaoba nî ǀûbao, 23 mû ta ra xui-ao, surib di ǃgāxasib tsî ǁoreb di khobosis ǃnâts satsa hâsa.”
24 Ob ge Simonna ge mî: “O ǁnâi ǃKhūb ǃoa ǀgoreba te re, în nē ǁkhōǁkhōsa xūn sakho go mîna tā tita ǀkha ī.”
25 ǁÎkha di ǃkhō-amdi tsî ǃKhūb mîsa aoǁnâs ǀkha kha ge toa, o kha ge Petrub tsî Johaneb tsîkha Jerusalems ǁga ge oa. Xawe kha ge garu kha a daob ǃnâ ǂgui ǃarodi Samariab didi ǃnâ ǃGâiǂhôasa gere aoǁnâ.
Filipub ge Etopiab di ǂhanuǁîb ǀkha ra ǀhao
26 Tsî i ge ǃKhūb di ǀhomǃgā-e Filipub ǃoa ge mî: “Khâi îts ǃkhawagasǀkhāb ǁga ǃgû, Jerusalemsa xu Gasas ǁga garu ǃū-aisa daob ǃoa.” (Nē daob ge nēsi ǃaruǀî sîsenūhe tama hâ.) 27 Tsîb ge mîmāheb ge khami khâi tsî ge ǃgû tsîb ge Etopiab di ǂhanuǁîb, Etiopiab di gao-aos Kandakes di marimûǂamaob ǀkha ge ǀhao. ǁÎb ge ǀgoreǀîb nîse Jerusalems ǁga ge ǃgû hâ i, 28 tsî ǁaruǃgoaxab a daob aib ge kunis ǃnâ kēbo-aob Jesajab di ǂkhanisa xu gere khomai. 29 Ob ge Filipuba ǃAnu Gagab xa ge mîbahe: “ǃGûsī îts ǁnā kunis xōǀkhā sī ǃgû.” 30 Tsî nēsab ge ǁnâu, ob ge Filipuba kunis tawa ǃkhoesī tsî kēbo-aob Jesajab di ǂkhanisa xub ra nē ǂammâisaba khomai ǃkhaisa ge ǁnâu. Ob ge “Nēts ra khomai xūna ǁnâuǃāts ra?” ti ge dî bi.
31 Ob ge “Mâti ta kha nî ǁnâuǃā ǁguiǃāba te nî khoe-i a ǀkhai hîa?” ti ǃeream tsî ge ǁkhau bi, kunis ai ǂoa tsîb ǁîb tawa nî ǂnû ǃkhaisa. 32 ǁÎb ge sao ra khomaiǃâs Xoas disa gere khomai:
“ǁKhao-i khamib ge ǂāheb nîse ǂgaeǂguihe,
tsî gū-i ǂkhomaob â-i aiǃâ a ǃgome-i ǁkhā-i
khamib ge ams âba khowa tama ge i.
33 ǁÎb di ǁauǃgôahes ǃnâs ge
ǀgoraǃgâs âba ǁîba xu ge ūbēhe.
Tsî tari-e kha ûiǁaeb âba gowaǂui ǁkhā?
Ûitsaman di ǃhūba xub ge ūbēhe xui-ao.”
34 Ob ge nē ǂammâisaba Filipuba ge dî: “Ob kha kēbo-aob Jesajaba ǁîb xa tamas ka io ǀnî khoe-i xa nēpa gere ǃhoa?” 35 Ob ge Filipuba ǁîba ǁkhā Xoas ǀkha tsoatsoa tsî ǀnî xoaǃâdi tsîna ra sîsenūse Jesub di ǃGâiǂhôas xa ge ǃhoabatsoatsoa. 36 Tsî ganupe kha kunis ǃnâ ǃnari garu hîa kha ge ǁgam-i tawa sī ob ge nē ǂammâisaba Filipub ǃoa “Kō, nē-i kom ǁgam-e hâo, tare-i ǃaroma ta kha ǁāǁnâ kaisen ǁoa?” ti ge dî. [37 Ob ge Filipuba “A, ǁāǁnâhe ǁkhāts ge a, sa ǂgaob hoab ǀkhats ga ǂgomo” ti ge ǃeream bi. Tsîb ge nē ǂammâisaba “Tita ge ra ǂgom Jesub Xristub a Elob Ôa ǃkhaisa” ti ge ǃeream.] 38 Tsîb ge kunis nî ǂgaemâihe ǃkhaisa ge mîmā tsî kha ge ǁgammi ǁga ge ǁgôa tsîb ge Filipuba ge ǁāǁnâ bi.
39 Tsî ǁgamma xu kha ge ǂoaxa ob ge Filipuba ǃKhūb di Gagab xa ge ūbēhe tsîb ge nē ǂammâisaba ǁkhawa mû bi tama ge i. Xaweb ge ǁîb daoba ge ǃaruǀî ǃgû, ǂgaob âb ǃnâ ra ǃgâiaǂgaose. 40 Ob ge Filipuba Asotus ǃnâ ge ǀhao-ūhe. Tsîb ge ǁkhāti Kaesareas tawab nî sīs kōse, ǁaegu ǂnôa ǃādi hoadi ǃnâ ǃGâiǂhôasa gere aoǁnâ.
