ǃKhū hâ ǃoataras ge ǃhūb âsa ra hō-oa
1 Elisab ge ǀgôabab ge ûi-ûiba hâ i tarasa ge mîba, ǃKhūb hû kuriga nî hâ ǃâtsūǀkhāba ǃhūb ǃnâ nî hā kai ǃkhaisa, îs ǁîs omaris din ǀkha doe tsî ǀnî ǃhū-i ǃnâ sī hâ. 2 Os ge kēbo-aob ge mîmā si khami ǁîs di ôananôagub ǀkha doe tsî hû kuriga Filisteǁîn ǃhūb ǃnâ sī ge hâ.
3 Hû kurigu ǀunis ais ge ǁîsa ǁkhawa Israeli ǃnâ ge oaǀkhī. Tsîs ge ǁîs di oms tsî ǃhūb tsîra hō-oas ǃaromas nî ǀkhomase gao-aob tawa ge sī. 4 Elisab di ǃgāb Gehasib ǀkhab gao-aoba ra ǃhoa hîas ge ǁîsa ǁnāpa ge sī. Gao-aob ge Elisab di buruxa dīgu xa gere ǂan ǂgao. 5 Gehasib gao-aoba mâtib ge Elisaba ǁō hâba ûi-ûi ǃkhaisa ra mîba hîas ge tarasa gao-aoba ǁîs di oms tsî ǃhanab tsîn ǃaroma ge ǀkhoma. Ob ge Gehasiba ǁîb ǃoa ge mî: “ǃGôahesa gao-aotse, nēs ge ǁnā tarasa tsî nēb ge ǁîs ôab, Elisab xa ge ǁkhawa ûi-ûiheba.” 6 Gao-aob di dîs ais ge ǁîba hoa xūna ge mîba tsîb ge ǂamkhoeba ǂgai tsî ge mîmā, îs ǁîs di ge i xūn hoana ǁkhawa mā-oahe. ǁNās xōǀkhās ge ǁkhāti ǃhanaba xu ge hû kurigu ǁaeb ǃnâ ǂgâxa hōǂgās di mādawa-ams tsîna nî māhe.
Elisab tsî Siriab di gao-aob Benhadadi
7 Elisab ge Siriab gao-aob Benhadadi ǀaesen hâ hîa Damaskus ǃnâ ge sī. Kēbo-aob Elisab go ǁnāpa sī ǃkhaisab ge mîbahe, 8 ob ge gao-aoba ǁîb ǂamkhoegu di ǀguib, Hasaeli ǃoa ge mî: “ǀKhaexū-e ū, î kēbo-aob ǁga ǃgû, îb ǁîba ǃKhūba dîba te, nē ǀaesenna xu ta nî ǂuru ǃkhaisa.” 9 Ob ge Hasaela ǃkharagaǃnâgu ǃgâi xūn Damaskus dina hakadisi ǃnain ai ǃnao tsî Elisab ǁga ge ǃgû. Tsîb ge Elisab tawab ge sī, o ge mî: “Sa ǃgāb, gao-aob Benhadadi ge go sî te, ǀaesenni âba xub nî ǂurusa ta sats ai nî dîse.”
10 Ob ge Elisaba ge ǃeream: “ǃKhūb ge ǁōb nî ǃkhaisa go ǂhaiǂhaiba te, xawe ǃgû î ǂurub nî, ti sī mîba bi.” 11 Elisab ge Hasaela ge kōma, Hasaeli ge sī ǁkhā ǁoas kōse. Tsîb ge Elisaba ge ā. 12 “ǃGôahesatse, tarexats ra ā?” tib ge Hasaela a dî bi, ob ge Elisaba ge ǃeream: “Israelǁîn ǀkhats nî dī tsū xūna ta a ǂan xui-ao. Sats ge ǁîn di ǁkhui-omga khauǃkhū, ǁîn di ǂkham khoega ǃgam, ǁîn ôarona ǂnauǃan tsî ǁîn di ǀgamǀkhā tarade nî ǃgaoǃā.”
13 Xaweb ge Hasaela ge mî: “Mâti ta ǁnāti ī xū-e a dī ǁkhā, tita kom xūtama khoe tao?”
Ob ge Elisaba ge mî: “ǃKhūb ge Siriab ǂamats nî gao-ao kai ǃkhaisa go ǁgau te.”
14 Hasaeli ge Benhadadi ǁga ge oa tsî sīb ge, ob ge ǁîba “Mâti go mîba tsi Elisaba?” ti ge dî bi.
Ob ge Hasaela “ǁÎb ge ǂanǂansasets ge nî ǂgau” ti go mî. 15 Xaweb ge Hasaela sao ra tsēs ai ǃkhai-e ū tsî ǁgam-i ǃnâ ǀhari tsî ǁî-i ǀkha gao-aob aisa ǃgū-ai tsî ge ǀhomǀom bi.
Hasaeli ge Benhadada gao-aose ge saoǃgon.
Jorammi ge ra Judab di gao-ao kai
(2 Kroniks 21:1-20)16 Koroǁî kurib Axab ôab, Israeli gao-aob Jorammi di ǂgaeǂguis dib ǃnâb ge Josafati ôab Joramma ge Judab di gao-ao kai. 17 ǁÎb ge ǃnonadisiǀgamǀa kurixab a hîa ge gao-ao kai tsîb ge ǁkhaisa kuriga Jerusalems ǃnâ ge ǂgaeǂgui. 18 ǁÎb ge Axab ôasa tarase ge ūhâ i tsî Axab surib ǁkhāb khami Israeli gao-aogu di ǂkhaba daogu ǃnâ gere ǃgû. ǁÎb ge ǃKhūb mûǁae a ǂkhabana gere dī, 19 xaweb ge ǃKhūba ǁîb di ǃgāb Davidi ǃaroma Judaba ge hîkākā ǂgao tama hâ i. ǃKhūb ge Davida ôananôagub âb di ǀgui-i hoaǁae nî ǂgaeǂgui ti mîmâiba hâ i xui-ao.
20 Jorammi ǂgaeǂguis ǁaeb ǃnâb ge Edomma khâikhâisen tsî ge ǁîmâbasen hâ gaosi kai. 21 Ob ge Joramma ǁîb torokunidi ǀkha Sairs ǃoa ge ǂgaekhâi. Edomǁîgu xa gu ge xāǂgāhe, o gu ge ǁîb tsî ǁîb torokunidi di ǂamkhoegu tsîna tsuxuba ǁîga ǁnāǂam tsî ge ûiǂoa; tsî gu ge ǁîb toroǃkhamaoga omdi âgu ǁga ge ǁhâ. 22 Edommi ge nētsēs kōse Judab ǃoagu a mâǃoaxa. ǁNā ǁaeb ǁkhāb ǃnâs ge Libnas tsîna ge khâikhâisen.
23 Jorammi ge dī xūn hoan ge ǃNaeǃkhaidi ǂKhanis Judab Gao-aogu dis ǃnâ a xoamâisa. 24 Jorammi ge ǁō tsî ǁîb aboxagu di ǀhobas ǃnâ Davidi ǃĀs ǃnâ ge ǁkhōhe, tsîb ge ǁîb ôab Ahasiaba ǁîb soas ǃnâ ge gao-ao kai.
Judab di gao-aob Ahasiab
(2 Kroniks 22:1-6)25 Disiǀgamǀaǁî kurib Axab ôab Israeli gao-aob Jorammi di ǂgaeǂguis dib ǃnâb ge Jorammi ôab Ahasiaba ge Judab gao-ao kai. 26 ǁÎb ge ǀgamdisiǀgamǀa kurixab a hîa ge gao-ao kai tsî ǀgui kuriba Jerusalems ǃnâ ge ǂgaeǂgui. ǁÎb îs ge gao-aob Axab ôas Atalias, Israeli gao-aob Omrib ǁnurisa. 27 Ahasiab ge ǃgameb ǃnâ-u gao-aob Axab ǀkha ǀuigu tsî Axab surib ǁkhāb khami ǃKhūb mûǁae ǂkhabana gere dī.
28 Tsîb ge Israeli gao-aob Jorammi ǀkha Siriab gao-aob Hasaeli ǃoagu toroba Ramots, Gileadi dis tawa ǃkham tsî ǁnāpa ge tsuihe. 29 Ob ge ǁnāpa xu Jesreels ǁga ge oa, ǁnāb ge tsuihe ǀhapide xub nî ǂgauga tsî gao-aob Ahasiab ge ǁîba ǀaeǁgoeb hâ hîa ge sari.
ǃKhū hâ ǃoataras ge ǃhūb âsa ra hō-oa
1 Elisab ge ǀgôabab ge ûi-ûiba hâ i tarasa ge mîba, ǃKhūb hû kuriga nî hâ ǃâtsūǀkhāba ǃhūb ǃnâ nî hā kai ǃkhaisa, îs ǁîs omaris din ǀkha doe tsî ǀnî ǃhū-i ǃnâ sī hâ. 2 Os ge kēbo-aob ge mîmā si khami ǁîs di ôananôagub ǀkha doe tsî hû kuriga Filisteǁîn ǃhūb ǃnâ sī ge hâ.
3 Hû kurigu ǀunis ais ge ǁîsa ǁkhawa Israeli ǃnâ ge oaǀkhī. Tsîs ge ǁîs di oms tsî ǃhūb tsîra hō-oas ǃaromas nî ǀkhomase gao-aob tawa ge sī. 4 Elisab di ǃgāb Gehasib ǀkhab gao-aoba ra ǃhoa hîas ge ǁîsa ǁnāpa ge sī. Gao-aob ge Elisab di buruxa dīgu xa gere ǂan ǂgao. 5 Gehasib gao-aoba mâtib ge Elisaba ǁō hâba ûi-ûi ǃkhaisa ra mîba hîas ge tarasa gao-aoba ǁîs di oms tsî ǃhanab tsîn ǃaroma ge ǀkhoma. Ob ge Gehasiba ǁîb ǃoa ge mî: “ǃGôahesa gao-aotse, nēs ge ǁnā tarasa tsî nēb ge ǁîs ôab, Elisab xa ge ǁkhawa ûi-ûiheba.” 6 Gao-aob di dîs ais ge ǁîba hoa xūna ge mîba tsîb ge ǂamkhoeba ǂgai tsî ge mîmā, îs ǁîs di ge i xūn hoana ǁkhawa mā-oahe. ǁNās xōǀkhās ge ǁkhāti ǃhanaba xu ge hû kurigu ǁaeb ǃnâ ǂgâxa hōǂgās di mādawa-ams tsîna nî māhe.
Elisab tsî Siriab di gao-aob Benhadadi
7 Elisab ge Siriab gao-aob Benhadadi ǀaesen hâ hîa Damaskus ǃnâ ge sī. Kēbo-aob Elisab go ǁnāpa sī ǃkhaisab ge mîbahe, 8 ob ge gao-aoba ǁîb ǂamkhoegu di ǀguib, Hasaeli ǃoa ge mî: “ǀKhaexū-e ū, î kēbo-aob ǁga ǃgû, îb ǁîba ǃKhūba dîba te, nē ǀaesenna xu ta nî ǂuru ǃkhaisa.” 9 Ob ge Hasaela ǃkharagaǃnâgu ǃgâi xūn Damaskus dina hakadisi ǃnain ai ǃnao tsî Elisab ǁga ge ǃgû. Tsîb ge Elisab tawab ge sī, o ge mî: “Sa ǃgāb, gao-aob Benhadadi ge go sî te, ǀaesenni âba xub nî ǂurusa ta sats ai nî dîse.”
10 Ob ge Elisaba ge ǃeream: “ǃKhūb ge ǁōb nî ǃkhaisa go ǂhaiǂhaiba te, xawe ǃgû î ǂurub nî, ti sī mîba bi.” 11 Elisab ge Hasaela ge kōma, Hasaeli ge sī ǁkhā ǁoas kōse. Tsîb ge Elisaba ge ā. 12 “ǃGôahesatse, tarexats ra ā?” tib ge Hasaela a dî bi, ob ge Elisaba ge ǃeream: “Israelǁîn ǀkhats nî dī tsū xūna ta a ǂan xui-ao. Sats ge ǁîn di ǁkhui-omga khauǃkhū, ǁîn di ǂkham khoega ǃgam, ǁîn ôarona ǂnauǃan tsî ǁîn di ǀgamǀkhā tarade nî ǃgaoǃā.”
13 Xaweb ge Hasaela ge mî: “Mâti ta ǁnāti ī xū-e a dī ǁkhā, tita kom xūtama khoe tao?”
Ob ge Elisaba ge mî: “ǃKhūb ge Siriab ǂamats nî gao-ao kai ǃkhaisa go ǁgau te.”
14 Hasaeli ge Benhadadi ǁga ge oa tsî sīb ge, ob ge ǁîba “Mâti go mîba tsi Elisaba?” ti ge dî bi.
Ob ge Hasaela “ǁÎb ge ǂanǂansasets ge nî ǂgau” ti go mî. 15 Xaweb ge Hasaela sao ra tsēs ai ǃkhai-e ū tsî ǁgam-i ǃnâ ǀhari tsî ǁî-i ǀkha gao-aob aisa ǃgū-ai tsî ge ǀhomǀom bi.
Hasaeli ge Benhadada gao-aose ge saoǃgon.
Jorammi ge ra Judab di gao-ao kai
(2 Kroniks 21:1-20)16 Koroǁî kurib Axab ôab, Israeli gao-aob Jorammi di ǂgaeǂguis dib ǃnâb ge Josafati ôab Joramma ge Judab di gao-ao kai. 17 ǁÎb ge ǃnonadisiǀgamǀa kurixab a hîa ge gao-ao kai tsîb ge ǁkhaisa kuriga Jerusalems ǃnâ ge ǂgaeǂgui. 18 ǁÎb ge Axab ôasa tarase ge ūhâ i tsî Axab surib ǁkhāb khami Israeli gao-aogu di ǂkhaba daogu ǃnâ gere ǃgû. ǁÎb ge ǃKhūb mûǁae a ǂkhabana gere dī, 19 xaweb ge ǃKhūba ǁîb di ǃgāb Davidi ǃaroma Judaba ge hîkākā ǂgao tama hâ i. ǃKhūb ge Davida ôananôagub âb di ǀgui-i hoaǁae nî ǂgaeǂgui ti mîmâiba hâ i xui-ao.
20 Jorammi ǂgaeǂguis ǁaeb ǃnâb ge Edomma khâikhâisen tsî ge ǁîmâbasen hâ gaosi kai. 21 Ob ge Joramma ǁîb torokunidi ǀkha Sairs ǃoa ge ǂgaekhâi. Edomǁîgu xa gu ge xāǂgāhe, o gu ge ǁîb tsî ǁîb torokunidi di ǂamkhoegu tsîna tsuxuba ǁîga ǁnāǂam tsî ge ûiǂoa; tsî gu ge ǁîb toroǃkhamaoga omdi âgu ǁga ge ǁhâ. 22 Edommi ge nētsēs kōse Judab ǃoagu a mâǃoaxa. ǁNā ǁaeb ǁkhāb ǃnâs ge Libnas tsîna ge khâikhâisen.
23 Jorammi ge dī xūn hoan ge ǃNaeǃkhaidi ǂKhanis Judab Gao-aogu dis ǃnâ a xoamâisa. 24 Jorammi ge ǁō tsî ǁîb aboxagu di ǀhobas ǃnâ Davidi ǃĀs ǃnâ ge ǁkhōhe, tsîb ge ǁîb ôab Ahasiaba ǁîb soas ǃnâ ge gao-ao kai.
Judab di gao-aob Ahasiab
(2 Kroniks 22:1-6)25 Disiǀgamǀaǁî kurib Axab ôab Israeli gao-aob Jorammi di ǂgaeǂguis dib ǃnâb ge Jorammi ôab Ahasiaba ge Judab gao-ao kai. 26 ǁÎb ge ǀgamdisiǀgamǀa kurixab a hîa ge gao-ao kai tsî ǀgui kuriba Jerusalems ǃnâ ge ǂgaeǂgui. ǁÎb îs ge gao-aob Axab ôas Atalias, Israeli gao-aob Omrib ǁnurisa. 27 Ahasiab ge ǃgameb ǃnâ-u gao-aob Axab ǀkha ǀuigu tsî Axab surib ǁkhāb khami ǃKhūb mûǁae ǂkhabana gere dī.
28 Tsîb ge Israeli gao-aob Jorammi ǀkha Siriab gao-aob Hasaeli ǃoagu toroba Ramots, Gileadi dis tawa ǃkham tsî ǁnāpa ge tsuihe. 29 Ob ge ǁnāpa xu Jesreels ǁga ge oa, ǁnāb ge tsuihe ǀhapide xub nî ǂgauga tsî gao-aob Ahasiab ge ǁîba ǀaeǁgoeb hâ hîa ge sari.
